Testun myfyrdod yr Esgob

Cymorth Cristnogol (Ioan 14:1-14)

Heddiw yw diwrnod cyntaf wythnos Cymorth Cristnogol sydd, fel bywyd pawb erbyn hyn, yn drwm o dan ddylanwad y coronofeirws. Mae cysgod y pandemig ar lawer o’r deunydd y mae Cymorth Cristnogol wedi’i baratoi ac fe hoffwn i gynnig rhai sylwadau ar yr efengyl heddiw, o Ioan 14, er mwyn i ni allu canolbwyntio ar Gymorth Cristnogol.

Y darlun y mae Iesu’n ei gynnig yw tŷ ei Dad lle y mae yna ddigonedd o ystafelloedd. Yn yr hen gyfieithiad Saesneg, roedd y tŷ’n cael ei alw'n 'blas'. Roedd hynny’n swnio’n grand!Ac mae Iesu’n dweud mai trwyddo ef y mae’r ffordd i’r tŷ yma, y porth lle mae gwahoddiad a chroeso i fynd trwyddo. Mae’n ddarlun hudolus, ond, heddiw, efallai fod y darlun ychydig yn wahanol. Erbyn hyn, efallai mai bod mewn ystafell, hyd yn oed un mewn plas, yw’r union beth nad ydyn ni ei eisiau. Rydyn ni wedi cael ein cau am yn ddigon hir ac mae’r wlad a’i phobl yn ein denu!

Ond mae’n rhaid i ni i gyd berthyn, i deimlo fod gennym ni gartref yn rhywle, i ni’n hunain, sy’n ddiogel ac yn noddfa i ni. Mewn gwirionedd, rydyn ni'n byw mewn byd lle mae’r pethau hynny’n gallu bob yn brin. Heddiw, gallai miliynau fod yn wynebu caledi oherwydd nad oes ganddyn nhw yr hawliau personol rydyn ni’n eu cymryd yn ganiataol, neu eu bod yn brin o fwyd a diod i’w cynnal, neu fod heb do uwch eu pennau neu’n byw o dan gysgod ymosodiad neu ryfel.

Mae Cymorth Cristnogol yn tynnu ein sylw at gyflwr pobl a chymunedau sy'n wynebu trafferthion enfawr. Storïau fel un Falmata Bulama a’i phlant Yagana a Bakuva oedd yn gorfod ffoi rhag arswyd Boko Haram. Erbyn hyn, mae’n rhaid iddyn nhw fyw mewn cymuned dros dro ychydig y tu allan i Maiduguri, y dref fwyaf yn nhalaith Borno yn Nigeria. Mae’r amodau'n ddychrynllyd. Oherwydd nad oes yna ddarpariaeth a gwarchodaeth i bobl fel Falmata a’i phlant, lle dros dro fel hyn yw’r peth agosaf sydd ganddyn nhw at ddiogelwch. Neu brofiad Samira, oedd hefyd wedi ffoi o’i phentref pan ymosododd Boko Haram.Roedd yn rhaid iddi wneud taith ofnadwy, filltiroedd lawer, i chwilio am ddiogelwch cyn cyrraedd Maiduguri – ond bu farw pedwar o’r plant oedd yn ei gofal ar y ffordd.Dioddefodd Samira drais difrifol, aeth drwy, a gweld, pethau na ddylai neb wybod dim amdanyn nhw. Gwelodd y gwaethaf mewn dynoliaeth. Er ei bod yn ddiogel erbyn hyn, ychydig o gysur yw hynny ar ôl colli’r plant roedd hi’n gofalu amdanyn nhw a gorfod dioddef creithiau ei dioddefaint sy’n dal i frifo.

Rwy’n credu mai un o agweddau mwyaf nerthol ffydd yw'r ffordd y mae Iesu'n addo bod yna le i ni i gyd. Mae eisiau i ni ddod adref. A’r adref hwnnw yw lle o berthyn, gwella a gobaith. Mae Duw yn hael, ac mae yna le i bawb sy'n dod ato. A phan fyddwn ni’n mynd ato, mae yna le wedi’i baratoi ar ein cyfer ni ac ni all neb nac unrhyw beth ein cau allan. Mae’n hynod o bwysig i mi fel Cristion fod Iesu’n warant i’r sicrwydd hwn. Pwy bynnag ydym ni, beth bynnag rydyn ni wedi bod trwyddo, mae Iesu’n ein gwahodd i ddod i’r lle sydd wedi’i baratoi ar ein cyfer a chanfod yn Nuw gartref a noddfa.

Ond fydd hynny ddim yn ddigon os mai dim ond ni sy’n dod - ar ein pen ein hunain. Beth am y rhai sy’n teimlo fod rhwystrau enfawr ar y ffordd honno Y rhai sydd â’u bywyd yn llawn anobaith oherwydd eu bod nhw wedi cael eu gadael neu eu cam-drin?Y rhai nad yw eu bywyd ond ofn a braw ac nad ydyn nhw’n gweld unrhyw obaith iddyn nhw eu hunain na’u rhai annwyl. Mae’n rhaid i’r ‘adref’ y mae Iesu’n ei addo fod yn fwy na hafan ysbrydol i'r rhai ohonom ni sydd ar ben ein digon. Mae’n rhaid i ni wneud yn siŵr nad oes neb yn cael ei rwystro rhag mynd ato. Mae’n rhaid i fywyd llawn gael yr anghenion sylfaenol fel dŵr, bwyd, diogelwch a dyfodol gwell. Ffurfio dyfodol lle mae hyn yn cael ei wireddu i'r rhai mwyaf bregus yw'r hyn sydd wrth wraidd ein cyfrifoldeb fel Cristnogion.

Ar y wefan lle'r oeddech yn gwylio'r neges hon mae manylion sut y gallwch chi gyfrannu at Gymorth Cristnogol drwy e-amlen. Mae arni hefyd rai gweddïau, darlleniadau a sut y gallwch gadw cysylltiad rheolaidd gyda Chymorth Cristnogol.

Yn nhŷ fy nhad’ meddai ‘y mae llawer o drigfannau’. Mae yna le i ni yno – i bawb ohonom. Does dim rheswm pam y dylai neb gael ei adael ar y tu allan. Dyma wahoddiad Iesu heddiw:dod ac, ie, dod ag eraill hefyd. Amen.