Annwyl gyfeillion

Pob gras a thangnefedd i chi.

“Llawenycha fy nghalon, a rhof foliant ar gân”

Mae'r salm i'w defnyddio yn y Cymun heddiw, Dydd Gŵyl Asaff Sant, yn gyfran o Salm 28:

Bendigedig fyddo'r Arglwydd am iddo wrando ar lef fy ngweddi. Yr Arglwydd yw fy nerth a'm tarian; ynddo yr ymddiried fy nghalon; yn sicr caf gymorth, a llawenycha fy nghalon, a rhof foliant iddo ar gân. (28:6-7)

Dyma eiriau all fod yn anodd eu dweud a’u gweddïo ar hyn o bryd, a ninnau wedi ein rhwymo gan ofod ac amser a gwendid, ar goll mewn môr o ddinistr a dioddefaint a thristwch. Rydyn ni'n gwybod nad rhywbeth syml a hawdd yw’r ffordd y mae Duw yn gwrando ar lef ein gweddi ac yn rhoi inni ei gymorth.

Ond rydyn ni hefyd yn adnabod grym bywyd yn nyfnder pethau - y grym hwnnw sy'n ein clymu ni oll â'n gilydd, â'r greadigaeth gyfan, ac yn y pen draw â Duw ein crëwr a'n tynged. Ac fe wyddom ni bod y grym hwnnw, y bywyd hwn, yn llifo atom ni oddi wrth Iesu Grist, y clywfedig a’r atgyfodedig, yn hwn sy’n cyfrannu o’n dynoliaeth, a’r hwn ddaw â gras undeb â Duw agos atom ni. Ac felly “llawenycha fy nghalon, a rhof foliant iddo ar gân.”

Yn y llythyr byr hwn ar ddechrau'r wythnos hon, rwyf am ganolbwyntio ar ychydig o bethau sy’n foddion bywyd, gobaith a ffyddlondeb ar hyn o bryd.

Wythnos Cymorth Cristnogol

Cynhelir Wythnos Cymorth Cristnogol ar 10-16 Mai, felly mae'n cychwyn y dydd Sul nesaf. 

Mae Cymorth Cristnogol yn bartner pwysig i ni yn yr esgobaeth, ac mae iddo wreiddiau dwfn yn ein heglwysi a'n capeli yng Nghymru. Mae galwedigaeth Cymorth Cristnogol i garu'r byd yn y lleoedd mwyaf anghenus o werth drudfawr.

Mae Wythnos Cymorth Cristnogol yn bwysig iawn er mwyn cynnal y gwaith gwerthfawr hwnnw, ac rwy’n siŵr y bydd gan Cymorth Cristnogol bryderon ariannol ar hyn o bryd. 

A gaf felly annog pob un ohonom i wneud yr hyn a allwn i gefnogi eu cenhadaeth a'u gweinidogaeth yn ystod Wythnos Cymorth Cristnogol eleni.

Ceir ar wefan Cymorth Cristnogol:

• Ffordd hawdd o roi rhodd. Rwy’n falch ein bod wedi gallu rhoi rhodd frys cymedrol oddi wrth Fwrdd Cyllid yr Esgobaeth eleni.
• Ffordd o anfon Amlen-e at ffrindiau a theulu i annog eraill i wneud rhodd flynyddol. Mae hyn yn ffordd wych o gadw ysbryd ac egni y casgliad Wythnos Cymorth Cristnogol blynyddol yn fyw.
• Adnoddau i nodi'r Wythnos. Mae adnoddau addoli a gweddi dwyieithog ar y dudalen hon (gweler y adran New resources), ynghyd â dolenni i'r gweithgareddau ar-lein cenedlaethol arloesol y mae Cymorth Cristnogol yn eu cynnal eleni. 

Byddaf yn gwneud Wythnos Cymorth Cristnogol yn ganolbwynt fy myfyrdod y dydd Sul hwn, ac anogaf bob un ohonom i gofio Cymorth Cristnogol yn ein haddoliad, ein pregethau, ein myfyrdodau e-bost a'n gweddïau y penwythnos hwn.

Diwrnod VE

Mae’n 75 mlynedd ers Diwrnod Buddigoliaeth yr Ewrop ddydd Gwener, 8 Mai. 

Er na fydd y digwyddiadau cenedlaethol a gynlluniwyd ar gyfer y diwrnod hwn bellach yn gallu cymryd lle, mae'n bwysig peidio ag anghofio’r foment hon. 

Mae'n gyfle i goffáu gwasanaeth, gwytnwch ac aberth cenhedlaeth yr Ail Ryfel Byd, ac i weddïo am heddwch yn ein dyddiau ni.

• Rwy'n ddiolchgar i Ruth Hansford sydd rhsannu deunydd addoli a gweddi y bu iddi ei lunio i'w ddefnyddio ym Mro Ystumanner, ac sydd wedi'i gynnwys yn ein hadran o adnoddau a gasglwyd o bob rhan o'r esgobaeth.
• Mae yna hefyd gyfoeth o adnoddau ar gael ar wefan y Lleng Brydeinig Frenhinol, gan gynnwys deunyddiau dysgu i blant, a newyddion am y digwyddiadau ar-lein a theledu a fydd yn eu cynnal.

Mae'r Lleng Brydeinig Frenhinol yn galw ar bobl ledled y wlad i ymuno mewn moment o fyfyrio a Choffáu am 11am ddydd Gwener, ac oedi am Dawelwch Dau Funud. Byddaf yn cadw'r Tawelwch Dau Funud, ac yn gobeithio y byddwch yn gallu ymuno â mi i wneud hynny ledled yr esgobaeth.

Llan

Rwy’n falch iawn o rannu’r newydd bod tîm staff craidd ein prosiect Cronfa Efengylu, Llan, wedi dechrau ar ei waith dros yr wythnosau diwethaf.

Penodwyd James Tout yn Gyfarwyddwr Llan i arwain y prosiect. Rydym hefyd wedi penodi Jules Burnand fel Cyfarwyddwr ar y Cyd i weithio ysgwydd yn ysgwydd â James, gan helpu i sefydlu'r fenter newydd a chyffrous hon.

James Tout | Cyfarfwyddwr Llan

Hyfforddodd James fel athro ysgol uwchradd ar ôl cwblhau ei radd baglor ym Mhrifysgol Caerdydd. 

Cyn ymuno â'r esgobaeth, bu James yn gweithio yn Ysgol y Gororau yng Nghroesoswallt fel Cyfarwyddwr Gwyddoniaeth a Phennaeth Cynorthwyol ar y Cyd. 

Ordeiniwyd James yn Ddiacon ym mis Mehefin 2019 ac ar hyn o bryd mae’n cynorthwyo yn Eglwys Plwyf Sant Silyn yn Wrecsam fel Curad Cynorthwyol Hunan-Gynhaliol. 

Rwy’n falch iawn o groesawu James fel rhan o Dîm Deiniol. Mae ei gefndir proffesiynol ynghyd â’i brofiad o fewn yr Eglwys yn gyfuniad ardderchog o sgiliau i lansio a datblygu’r gwaith pwysig hwn.

Jules Burnand | Cyfarfwyddwr ar y Cyd Llan 

Bydd Jules yn gyfarwydd i lawer ohonom, am iddi ymuno â'r esgobaeth ar gontract tymor penodol o fewn Tîm Deiniol bron i flwyddyn yn ôl. Cyn hynny bu Jules yn gweithio mewn swyddi uwch yn y sector addysg awyr agored a Llywodraeth Cymru. 

Bydd ei phrofiad mewn cynllunio a rheoli prosiect yn hynod werthfawr wrth i ni sefydlu a datblygu cydrannau niferus y prosiect ar draws sawl safle a thîm yn yr esgobaeth. 

Rydym yn falch iawn bod Jules wedi dewis parhau i weithio gyda ni ac i gyflawni'r rôl bwysig hon.

Sylwch, yn ystod yr argyfwng cyfredol hwn, bydd Jules yn parhau i ddarparu cymorth gweinyddol o ddydd i ddydd am dri diwrnod yr wythnos.

Dechrau'r gwaith

Nid dyma ddechrau'r prosiect yr oeddem wedi'i ragweld. 

Fodd bynnag, law yn law â heriau'r dyddiau hyn fe ddaw hefyd rhyw ychydig o ofod i fyfyrio a chynllunio. 

Ac felly mae modd i’r cyfnod cychwynnol hwn yng ngwaith James a Jules ganolbwyntio’n ffrwythlon ar sefydlu’r tîm, adeiladu partneriaethau cryf a gosod sylfeini cadarn ar gyfer gwaith y saith mlynedd a ddaw.

Rwy'n gobeithio gallu darparu diweddariadau rheolaidd yn y llythyrau hyn am waith datblygol y prosiect. Bydd tîm Llan hefyd yn adrodd yn ôl yn rheolaidd i Gyngor yr Esgob, ac i bob cyfarfod o gyfarfod Cyngor yr Esgobaeth, gan ddechrau gyda’i gyfarfod nesaf ar ddiwedd mis Gorffennaf

Llanelwy ar Ddydd Gŵyl Asaff Sant

At Ddydd Gŵyl Asaff Sant, ymunwch â’m gweddi i dros Esgob Gregory a holl glerigion a phobl Esgobaeth Llanelwy, gan ddiolch am ein partneriaeth yn yr Efengyl ac am yr holl waith arloesol sy'n digwydd yn Llanelwy i gyfrannu yng nghenhadaeth Duw.

Hollalluog a thragwyddol Dduw, a elwaist Asaff i fod yn esgob yn dy Eglwys ac i gyhoeddi’r efengyl i’r genedl hon: dyro i ni, dy weision, y fath ffydd a grym cariad, fel, wrth i ni lawenhau yn ei oruchafiaeth, y byddwn yn elwa ar ei esiampl; trwy Iesu Grist ein Harglwydd, yr hwn trwy nerth yr Ysbryd Glân a gyfodaist i fywyd gyda thi, ei Dduw a’i Dad, byth bythoedd. Amen.