Yn Llythyr yr Esgob a gyhoeddwyd ar 2 Mai, efallai i chi weld y negus ganlynol oddi wrth yr Esgob yn yr adran o’r enw Yr effaith ariannol ar gyllid Ardaloedd Gweinidogaeth a'r esgobaeth:

Yr effaith ariannol ar gyllid Ardaloedd Gweinidogaeth a'r esgobaeth

(1) Cyfarfodydd

Mae nifer o gyfarfodydd pwysig wedi cael eu cynnal yr wythnos ddiwethaf hon i fynd i’r afael â goblygiadau ariannol yr argyfwng coronafirws ar yr esgobaeth.

• Cyfarfu tri chydweithiwr o’r esgobaeth sy’n aelodau o Gorff Cynrychiolwyr yr Eglwys yng Nghymru - y corff sy’n rheoli asedau hanesyddol cenedlaethol yr Eglwys - â chyd-aelodau o bob rhan o Gymru mewn cyfarfod cynhadledd fideo ddydd Llun.
• Cyfarfu Cyngor yr Esgob ar gyfer ei gyfarfod rheolaidd yn ddiweddarach yn yr wythnos.
• Ddydd Iau, cyfarfu aelodau Cyngor yr Esgobaeth, sy'n gweithredu fel ymddiriedolwyr Bwrdd Cyllid yr Esgobaeth, ar gyfer eu cyfarfod cynhadledd fideo cyntaf.

(2) Ymateb unedig

Bydd yn amlwg i bawb y bydd goblygiadau ariannol y sefyllfa bresennol yn ddifrifol, ac y bydd angen i'n hymateb fod yn unedig ac yn egnïol ar draws pob rhan o'r Eglwys.

Yn yr un modd ag y mae'n rhaid i ni gloddio'n ddwfn i'n cronfeydd o amynedd a ffydd ar hyn o bryd, bydd angen i ni hefyd, ar bob lefel o fywyd yr Eglwys, gloddio'n ddwfn i'n gymwynasgarwch a haelioni os am gamu y tu hwnt i'r argyfwng presennol hwn i ddyddiau gwell o ail-ymgynnull ac ailadeiladu.

(3) Ffyrdd ymlaen

Rwy’n falch iawn bod Corff Cynrychiolwyr yr Eglwys yng Nghymru wedi gallu ymrwymo i dynnu ei bwysau wrth ein helpu i fynd i’r afael â rhai o’n anghenion ariannol brys.

Mae pecyn o gymorth ariannol am y cyfnod o dri mis rhwng Ebrill a Mehefin wedi ei ddarparu gan Gorff y Cynrychiolwyr, a bydd yn sail ar gyfer trafodaethau yn ystod yr wythnos i ddod gyda phob un o Ardaloedd Gweinidogaeth yr esgobaeth ynghylch eu sefyllfa ariannol.

Bydd yn bwysig gallu trafod â phob Ardal Weinidogaeth am y cyfraniad y gall ei gwneud neu'r cymorth ychwanegol y gallai fod ei hangen arni.

Bydd y trafodaethau hyn yn cael eu harwain gan yr Archddiaconiaid a byddant yn cychwyn cyn gynted â phosibl.

Rwy'n hyderus bod gennym becyn o becyn cymorth ariannol pwrpasol a fydd yn ein galluogi i leihau pwysau ariannol acíwt, wrth barhau i gwrdd â'r costau gweinidogaethol a chenhadol sy'n rhan o'n cyllideb esgobaethol ar y cyd.

(4) Haelioni unigolion a theuluoedd

Fel sydd wastad yn wir, mae sylfaen ein cyllid eglwysig wedi ei ffurfio gan haelioni unigolion a theuluoedd sy’n rhoi’n aberthol. Mae eu hwy - trwy roi’n rheolaidd a thrwy ddigwyddiadau codi arian - yn hanfodol i ariannu ein cenhadaeth a'n gweinidogaeth o fewn Ardaloedd Gweinidogaeth a ledled yr esgobaeth.

Er bod cyfleoedd codi arian yn gyfyngedig ar hyn o bryd, ac er nad yw casgliadau rheolaidd mewn gwasanaethau yn amlwg yn medru digwydd, rwyf wedi fy nghalonogi gan newydd am ddwy fenter.

1. Yn gyntaf, gan ddefnyddio'r dudalen “Rhoi yn Syth” ar-lein newydd, mae rhoddion rheolaidd newydd, gyda Chymorth Rhodd, wedi'u sefydlu gan nifer o unigolion sy'n dymuno cynnal neu gynyddu eu rhoddion er na allant wneud hynny ar y plât mwyach. Rwy’n ddiolchgar iawn i’r rhai sydd wedi cymryd y cam hwn, ac yn ein hannog ni i gyd i rannu pwysigrwydd rhoi’n rheolaidd fel hyn.
2. Yn ail, mae wedi bod yn galonogol clywed am lwyddiant apeliadau codi arian mewn sawl Ardal Weinidogaeth, pan fo cyswllt trwy e-bost a'r post wedi ei ddefnyddio i wneud pobl yn ymwybodol o effaith ariannol yr argyfwng ar yr Eglwys, gan arwain at roddion ac addewidion ariannol newydd. Unwaith eto, a gaf ein hannog i wneud popeth o fewn ein gallu i alluogi unigolion a theuluoedd i gynnig eu cefnogaeth ariannol mewn ffyrdd newydd.

A gaf i ddiolch eto i bawb ar draws yr esgobaeth sy'n cefnogi'r Eglwys trwy eu rhoi, ac a gaf i ofyn ichi hefyd gynnal yn eich gweddïau y rhai a fydd yn ymgysylltu'n ddwys â thrafodaethau ariannol difrifol yn ystod yr wythnos i ddod.

Rydym am adleisio popeth a ddywedwyd gan yr Esgob, yn enwedig y pwyslais i fod yn unedig a gweithgar ar draws pob rhan o'r Eglwys. 

Mae'n newyddion da bod cefnogaeth ychwanegol ar gael gan Gorff y Cynrychiolwyr, a byddwn i gyd eisiau sicrhau ei fod yn cael ei ddefnyddio yn y ffordd orau bosibl yn ystod y dyddiau heriol hyn.

Camau nesaf

Yn y broses a amlinellwyd gan yr Esgob, rydym nawr yn symud ymlaen i gam o drafodaethau gyda phob Ardal Weinidogaeth yn yr esgobaeth ynghylch y cyfraniad y gallant ei wneud neu'r cymorth ychwanegol y gallai fod ei angen arnynt.

Ein gobaith yw y bydd y trafodaethau hyn, sydd i'w cynnal yn bennaf rhwng Archddiaconiaid ac Arweinwyr Ardaloedd Gweinidogaeth, wedi dod i ben erbyn 28 Mai 2020.

Gwybodaeth gywir ac ymgynghori eang

Ein profiad o broses Cronfa Gweinidogaeth yr Esgob yn y gorffennol yw bod trafodaethau o’r fath yn fwyaf cynhyrchiol pan gânt eu llywio gan wybodaeth gywir, a lle mae trafodaethau blaenorol wedi digwydd o fewn Ardaloedd Gweinidogaeth, ac yn enwedig gyda Thrysoryddion.

Er mwyn helpu hyn ddigwydd, mae'r Archddiaconiaid yn anfon y set hon o gwestiynau i bob Arweinydd Ardal Weinidogaeth, yn y gobaith y gellir casglu atebion cyn i'r drafodaeth rhwng yr Archddiacon a phob Arweinydd Ardal Weinidogaeth ddigwydd.

Efallai na fydd yn bosibl, o ganlyniad yr amgylchiadau presennol, i ateb pob cwestiwn yn llawn; ond mae'n dda sicrhau y gellir rhannu cymaint o wybodaeth â phosibl.

O ystyried efallai fod angen i nifer o bobl ym mhob Ardal Weinidogaeth ddarparu data i alluogi ateb y cwestiynau, mae'r cwestiynau'n cael eu rhannu ag aelodau rhestr bostio cyllid yr esgobaeth, ac rydym yn annog Arweinwyr Ardaloedd Gweinidogaeth i'w rhannu â Thrysoryddion i sicrhau atebion cywir a diweddar. Byddai'n dda i bawb sydd â chyfrifoldeb am stiwardiaeth ariannol yn ein Hardaloedd Gweinidogaeth weld y neges hon, a deall y gefnogaeth sydd ar gael a'r camau sy'n cael eu cymryd nawr.

Yn ogystal â darparu gwybodaeth ddefnyddiol ar gyfer trafodaethau rhwng Archddiaconiaid ac Arweinwyr Ardaloedd Gweinidogaeth, bydd holl atebion i'r cwestiynau gan 27 o Ardaloedd Gweinidogaeth hefyd yn ein helpu i ddatblygu dealltwriaeth gywir ar draws effaith ariannol yr argyfwng presennol ledled yr esgobaeth gyfan. Bydd hyn, yn ei dro, yn llywio sgyrsiau parhaus gyda Chorff Cynrychiolwyr yr Eglwys yng Nghymru ynghylch trefniadau cyllido brys yn y dyfodol.

Ein diolch

Rydym yn ddiolchgar iawn i bawb, ar draws ein Hardaloedd Gweinidogaeth, sy'n parhau i arfer stiwardiaeth mor ofalus o'n hadnoddau ariannol, sydd oll yn rhodd gwerthfawr gan Dduw. Diolch i chi am bopeth a wnewch i gynnig gwasanaeth amhrisiadwy yn y maes hwn i genogi a galluogi cenhadaeth a gweinidogaeth yr Eglwys.

Peidiwch ag oedi a bod mewn cysylltiad â ni neu Owain Pritchard os hoffech gael mwy o wybodaeth am ein hymateb ariannol i'r sefyllfa bresennol.