Addasiadau coronafirws

Cyhoeddwyd diweddariad i ganllawiau cenedlaethol yr Eglwys yng Nghymru yn ystod yr wythnos ddiwethaf ynghylch canu cynulleidfaol. A gaf i annog cydweithwyr clerigol i ymgynghori'n fanwl â'r canllawiau cyn gwneud unrhyw newidiadau, a thalu sylw arbennig i dabl cyffredinrwydd coronafirws fesul awdurdod lleol.

Y Tra Pharchg Kathy Jones

Cafodd Deon Kathy ei phenodi’n Ddeon Eglwys Gadeiriol Bangor yn 2015, cyn cael ei sefydlu’n gynnar yn 2016. 

Yn ei chyfweliad, perswadiodd y gymysgedd o weledigaeth glir a greddfau bugeiliol cadarn y rhai oedd yn ei chyfweld mai Kathy oedd y person delfrydol ar gyfer y swydd. Byddai’r doniau hyn yn dod i’r golwg yn fynych. 

Rwy’n mor falch fy mod yn gallu diolch i Kathy am ei gweinidogaeth dros y pum mlynedd. Roedd yn camu i’w swydd pan oedd Ardal Weinidogaeth Bro Deiniol newydd ei ffurfio, ac yn ei babandod. Roedd dwy o eglwysi’r ddinas newydd gau a'r Eglwys Gadeiriol wedi cael cyfnod o wrthdaro a dwys ystyried. Gydol ei hamser byddai Kathy’n gatalydd dros dawelwch ac iachau. Mae ei gofal cyson ac addfwyn wedi datrys y trafferthion hynny ac wedi galluogi’r Eglwys Gadeiriol a'r Ardal Weinidogaeth symud ymlaen. 

Yn ogystal â'r newidiadau hyn, mae Kathy wedi dod ag ymrwymiad newydd i’r gymuned ehangach. Mae’r Eglwys Gadeiriol wedi cynnal nifer o arddangosfeydd, wedi bod yn bartner ag asiantaethau a sefydliadau ac wedi meithrin perthynasau cryf gyda chrefyddau eraill, yn enwedig gyda’r gymuned Foslemaidd leol. Bydd llawer ohonom yn cofio, ar ôl yr ymosodiad gan derfysgwyr ar Gristnogion yn Sri Lanka yn ystod y Pasg 2019, fod y Moslemiaid, y Sul dilynol, yn sefyll y tu allan i’r Eglwys Gadeiriol mewn undod gyda’r Cristnogion oedd wedi dod i addoli. 

Fel rhan o Gyngor yr Esgobion, mae Kathy wedi bod yn gydweithiwr amhrisiadwy ac mae’i doethineb a’i phrofiad wedi galluogi’r esgobaeth i ddatblygu ei hymrwymiad i’r weledigaeth rydym yn ei rhannu. Mae’i phrofiad yn y Gwasanaeth Iechyd wedi ffurfio ysbrydolrwydd ble mae cariad dwfn Duw am fywyd dynol yn mynegi ei hunan mewn addoliad yn cael ei rhannu ac mewn cynllunio strategol. 

Rwy’n ymwybodol fod penodiad Kathy i swydd newydd y tu allan i’r esgobaeth yn golled, nid yn unig i mi fel Esgob ac i’m cydweithwyr, ond o fewn yr Eglwys Gadeiriol hefyd. Rwy’n falch ein bod yn gallu diolch i Kathy’n gyhoeddus ar ei Sul olaf yn yr Eglwys Gadeiriol ar ddiwedd y mis yn dilyn Ordeiniadau a Thrwyddedau’r Esgobaeth ac yn dymuno iddi hi ac i Paul bob hapusrwydd yn eu cartref a’u cymuned newydd.

Pride a chynnydd

Wrth i ni agosáu at ddiwedd mis Pride, rwyf am fyfyrio ar bwysigrwydd sefyll law yn llaw mewn undod a balchder gyda'n cymunedau LGBTQI+.

Nawr, yn fwy nag erioed, wrth i droseddau casineb barhau i effeithio ar fywydau a dynoliaeth ein caredigion yng Nghrist, rhaid i bobl o bob ffydd gydnabod yr niwed a wnaed yn ein henw ac edifarhau. Nawr hefyd yw'r amser i gadarnhau a chofleidio'r amrywiaeth rhyfeddol a geir yng nghxreadigaeth Duw, ac i ymroi i barhau â'n gwaith i herio rhagfarn yn ein heglwysi a'n cymunedau ehangach. Wrth wneud hynny, rydym hefyd yn anrhydeddu'r brwydr cymunedau LGBTQI+ i fod yn ddiogel a byw eu bywydau yn eu cyflawnder.

Mae Pride yn fynegiant llawen, herfeiddiol o gynnydd, penderfyniad a chariad, ac am hyn oll rhown ddiolch.

Bro Cwyfan a Bro Madryn

Roeddwn yn falch iawn o allu trwyddedu Vince Morris yn Arweinydd Ardal Weinidogaeth newydd ym Mro Cwyfan yr wythnos ddiwethaf hon.

Gweddïwch dros weinidogaeth newydd Vince, a thros eglwysi a chymunedau Bro Cwyfan wrth iddyn nhw ddirnad galwad Duw i genhadaeth a thystiolaethu newydd.

Ceir mwy am apwyntiad Vince fan yma.

Rwyf hefyd yn falch fy mod yn gallu lansio heddiw’r broses ddirnad ar gyfer offeiriad i olynu Richard Wood yn Arweinydd Ardal Weinidogaeth Bro Madryn. Mae Bro Madryn yn ymestyn dros ochr gogleddol Pen Llŷn, o Lithfaen i Fryncroes. 

Gellir gweld manylion llawn yr apwyntiad yma.

Rwy'n ddiolchgar iawn i bobl Bro Madryn ac Archddiacon Meirionnydd am y gwaith called y tu ôl i'r proffil.

Gweddïwch dros bawb fydd am glywed galwad Duw ar eu bywydau a’u gweinidogaeth ar yr adeg hon, a thros bawb a fydd yn cymryd rhan yn y broses ddirnad dros yr wythnosau nesaf.

Fforymau Adolygu Ariannol

Rwy'n parhau i fod yn dra diolchgar i bawb sydd, p'un ai trwy eu haelioni personol a'u rhodd aberthol i'r Eglwys, neu trwy gysegriad eu hamser fel trysoryddion ac ymddiriedolwyr, wedi helpu i lywio Ardaloedd Gweinidogaeth a'r esgobaeth gyfan trwy stormydd ariannol y misoedd diwethaf.

Ym mis Mawrth bu inni gynnal Fforwm Adolygu Ariannol ar gyfer pob Archddiaconiaeth ar Zoom, a buont yn sgyrsiau defnyddiol. 

Rwyf felly am gynnull fforymau cyffelyb ym mis Gorffennaf. Bydd y Fforwm yn gyfle:

• i glywed am ddarlun ariannol eang yr esgobaeth a'r dalaith;
• i glywed gan bob Ardal Gweinidogaeth am hynt y flwyddyn ariannol hon, gan rannu hefyd unrhyw arsylwadau, pryderon ac anghenion eraill;
• i ofyn cwestiynau a cheisio cyngor gan yr Archddiacon, Ysgrifennydd yr Esgobaeth, a chan Owain Pritchard, ein Cyfarwyddwr Systemau a Stiwardiaeth

Dyddiadau'r sesiynau yw:

Dydd Mawrth 27 Gorffennaf am 10am
Fforwm Adolygu Ariannol Archddiaconiaeth Meirionnydd

Dydd Mawrth 27 Gorffennaf am 2pm
Fforwm Adolygu Ariannol Archddiaconiaeth Bangor

Dydd Mercher 28 Gorffennaf am 10am
Fforwm Adolygu Ariannol Archddiaconiaeth Ynys Môn

Rwy'n disgwyl i'r fforymau bara am ddim mwy nag awr a hanner.

A gaf i ofyn i Arweinwyr Ardaloedd Gweinidogaeth flaenoriaethu'r Fforwm Adolygu Ariannol yn eu dyddiaduron, ac annog presenoldeb gan Drysoryddion Ardaloedd Gweinidogaeth ac unrhyw ddeiliaid swyddi neu aelodau MAC eraill o'r Ardaloedd Gweinidogaeth a hoffai fod yn bresennol.

Bydd dolenni a chodau Zoom ar gyfer y fforymau yn cael eu cylchredeg i'r rhai ar restr bostio Llythyr yr Esgob yn ystod yr wythnos flaenorol. Gallwch chi gofrestru i ymuno â'r rhestr bostio honno ar waelod y dudalen hon.