Esgob Cynorthwyol newydd ar gyfer ein hesgobaeth

Rydym wrth ein bodd yn rhannu’r newyddion bod yr Archesgob wedi penodi Archddiacon Bangor, Mary Stallard, yn Esgob Cynorthwyol yn Esgobaeth Bangor.

Bydd ein Hesgob Cynorthwyol newydd yn cymryd yr awenau o fewn Esgobaeth Bangor mewn nifer o feysydd allweddol, er mwyn sicrhau parhad mewn arweinyddiaeth esgobol ofalus ac effeithiol o fewn yr esgobaeth a chynrychiolaeth yr esgobaeth o fewn y dalaith, tra’n galluogi’r Archesgob i ymgymryd â’i gyfrifoldebau arwyddocaol newydd ledled yr Eglwys yng Nghymru.

Bydd hyn yn newid sylweddol i ni o fewn yr esgobaeth, wrth i’r Archddiacon gofleidio’r rôl newydd hon a'i phlethu â'i gweinidogaeth fel Archddiacon, a fydd yn parhau. Bydd ein Hesgob Cynorthwyol yn cael ei chysegru mewn gwasanaeth taleithiol ddiwedd mis Chwefror, ochr yn ochr ag Esgob newydd Abertawe ac Aberhonddu (a fydd o reidrwydd yn ddigwyddiad â thocynnau mynediad). Ar 1 Mawrth, bydd gwasanaeth esgobaethol yng Nghadeirlan Deiniol Sant, lle bydd pawb o bob cwr o’r esgobaeth yn gallu croesawu’r Esgob Cynorthwyol newydd, a’i sicrhau o’n gweddïau dros ei gweinidogaeth newydd yn ein plith.

Isod fe welwch destun llawn cyhoeddiad y penodiad a wneir gan yr Eglwys yng Nghymru y bore yma, yn ogystal â gwybodaeth bellach am ein cynlluniau cychwynnol oddi mewn i'w esgobaeth i gefnogi a chroesawu ein Hesgob Cynorthwyol newydd.

Archesgob Cymru yn cyhoeddi penodiad Esgob Cynorthwyol newydd

Enwebwyd Mary Stallard, a wasanaethodd fel Archddiacon Bangor am y pedair blynedd ddiwethaf, yn Esgob Cynorthwyol yn Esgobaeth Bangor. Bydd yn rhannu arweinyddiaeth yr esgobaeth tra bydd Esgob Bangor, Andrew John, yn gwasanaethu fel Archesgob Cymru. Caiff ei chysegru fel esgob yng Nghadeirlan Bangor ar 26 Chwefror.

Talodd yr Archesgob Andrew deyrnged i galon fugeiliol a gweledigaeth strategol Mary. Dywedodd,

Rwy’n hynod falch y cytunodd Mary gymryd cyfrifoldeb gweithredol am lawer o fywyd ein Hesgobaeth i fy nghynorthwyo tra byddaf yn rôl Archesgob Cymru. Mae gan Mary galon am weinidogaeth ac mae’n arwain gyda sensitifrwydd bugeiliol, cydymdeimlad a doethineb. Mae ganddi gyfoeth o brofiad, gan fod wedi gwasanaethu ym mhedair o chwech esgobaeth yr Eglwys ac ar draws ystod o arbenigeddau. Mae ei hymagwedd broffesiynol a’i gweledigaethol strategol yn hysbys iawn ac mae ei phenodiad yn gam cadarnhaol i esgobaeth Bangor.

Dywedodd yr Archddiacon Mary,

Mae’r alwad i fod yn Gristion a gwasanaethu mewn gweinidogaeth ordeiniedig fel diacon ac offeiriad yn un a gefais bob amser yn gyffrous a hefyd yn un a all godi ychydig o fraw. Mae’r cyfle newydd hwn i ymchwilio a chynnig rhoddion eraill arweinyddiaeth fel esgob cynorthwyol gyda’r tîm gwych ym Mangor yn teimlo fel buddsoddiad mawr o ymddiriedaeth. Gwnaf fy ngorau i ymateb i’r galwad newydd hwn ac i anrhydeddu’r ymddiriedaeth honno, gan geisio adeiladu ar y gwaith a ddechreuwyd eisoes i addoli Duw, tyfu’r eglwys a charu’r byd.

Yn hanu o Birmingham, cafodd yr Archddiacon Mary ei magu mewn rheithordy. Roedd ei thad yn ficer a’i mam yn wyddonydd sy’n golygu iddi gael ei magu mewn cartref lle anogwyd codi cwestiynau am fywyd a ffydd.

Bu Mary yn darllen Diwinyddiaeth yng Ngholeg Selwyn, Caergrawnt ac astudiodd i fod yn athrawes yn Llundain cyn hyfforddi ar gyfer y weinidogaeth yng Ngholeg y Frenhines, Birmingham a Choleg Diwinyddol Tamil Nadu yn India. Gwasanaethodd fel ciwrad yng Nghasnewydd, cyn symud i Esgobaeth Tyddewi fel diacon-mewn-gofal a ficer Ysbyty Cynfyn, Eglwys Newydd a Llantrisant. Yn 2003 penodwyd Mary yn Ganon Preswyl yng Nghadeirlan Llanelwy ac yn Gaplan yr Esgob, gan wasanaethu hefyd fel Cyfarwyddwr Ordinandau yr Esgobaeth a Chadeirydd Bwrdd Gweinidogaeth yr Esgobaeth ac Ysgrifennydd Detholiad Taleithiol.

Rhwng 2011 a 2018 gwasanaethodd fel Caplan Anglicanaidd yn Ysgol Uwchradd Gatholig ac Anglicanaidd Sant Joseff, yn ogystal â bod yn Offeiriad Cyswllt yn Ardal Cenhadaeth Wrecsam. Roedd hefyd yn gyd-gyfarwyddwr Canolfan Addysg Grefyddol a Datblygu Ffydd San Silyn yn Wrecsam. Cafodd ei phenodi yn Archddiacon Bangor ac yn offeiriad cyswllt yn Llandudno yn 2018.

Mae gweinidogaeth darlledu sylweddol y Darpar Esgob Cynorthwyol Mary wedi ei gweld yn ymddangos ar BBC Radio Cymru fel arweinydd Yr Oedfa ac mae wedi cyfrannu at Bwrw Golwg, ar BBC Radio Wales yn all Things Considered, Celebration, Wednesday Word a Weekend Word, ac ar Radio 4 fel arweinydd The Daily Service a Sunday Worship ac fel awdur a chyflwynydd Prayer for the Day.

Mae Mary yn briod â’r Parch Andrew Sully, Arweinydd Ardal Gweinidogaeth Llandudno, ac mae ganddynt ddwy ferch sydd bellach yn oedolion. Mae ei hobïau yn cynnwys coginio, darllen a rhedeg.

Ymddiddan am frefniadau arolygiaeth esgobol newydd

Mae Arweinwyr Ardaloedd Gweinidogaeth, Ficeriaid ar y Cyd, Diaconiaid Ardaloedd Gweinidogaeth ac aelodau Cyngor yr Esgob eisoes yn cwrdd fel Grŵp Cadfan yn Nant Gwrtheyrn ar 21-22 Mawrth.

Bydd hyn yn rhoi cyfle cynnar i’r Esgob Cynorthwyol a’r Archesgob drafod y trefniadau goruchwylio esgobol sy’n deillio o benodiad yr Esgob Cynorthwyol gyda chydweithwyr o bob rhan o’r esgobaeth.

Dyddiadau 2022

Synodau
Meirionydd - Dydd Llun 10am
14 Chwefror, 27 Mehefin, 10 Hydref
Ynys Môn - Dydd Llun 7pm
14 Chwefror, 27 Mehefin, 10 Hydref
Bangor - Dydd Mawrth 10am
15 Chwefror, 28 Mehefin, 11 Hydref

Grŵp Cadfan
Yn Nant Gwrtheyrn - Amser cinio i amser cinio
21 a 22 Mawrth
1 a 2 Rhagfyr

Cynhadledd Clerigion
12 i 15 Medi yn Rhydychen

Cymun y Crism
11 Ebrill - 11am yng Nghadeirlan Deiniol Sant

Gwasanaeth Ordeinio
25 Mehefin - 11am yng Nghadeirlan Deiniol Sant

Cynhadledd yr Esgobaeth
1 Hydref - 2pm yng Nghadeirlan Deiniol Sant