Gweddi ar Sul y Blodau

Hollalluog a thragwyddol Dduw,
a anfonaist dy Fab ein Hiachawdwr Iesu Grist,
o'th gariad tyner at yr hil ddynol
i gymryd ein cnawd,
ac i ddioddef angau ar y groes,
caniatâ inni dilyn esiampl ei amynedd a'i ostyngeiddrwydd
a bod hefyd yn gyfrannog o'i atgyfodiad;
trwy yr un Iesu Grist ein Harglwydd,
sy'n fyw ac yn teyrnasu gyda thi,
yn undod yr Ysbryd Glân,
un Duw, nawr ac am byth.
Amen

Dyddiadur

11 Ebrill
Cymun y Crism
11am
Cadeirlan Deiniol Sant

Caiff cinio ysgafn ei reini yn y Gadeirlan ar ôl y Cymun.

Gwahoddir pob offeiriad sydd â Thrwydded neu Ganiatâd i Weinyddu esgobaethol i gyd-lywyddu (cyd-ddathlu) y Cymun. Gwahoddir offeiriaid cyd-lywyddol i wisgo casog, alb a stola wen / casog-alb a stola wen. Gwahoddir pob diacon neilltuol sydd â Thrwydded neu Ganiatâd i Weinyddu esgobaethol, a phob Darllenydd neu Weinidog Lleyg Trwyddedig sydd â Thrwydded esgobaethol, i wisgo gwisg Côr: casog, gwenwisg a sgarff / casog a chotta. Arwisgir yng Nghapel Mair, erbyn 10.50am fan bellaf. Gwahoddir Gweinidogion Lleyg Trwyddedig sydd â Thrwydded esgobaethol nad ydynt fel arfer yn arwisgo ond sy’n dymuno gorymdeithio hefyd i ymgynnull yng Nghapel Mair erbyn 10.50am.

Bydd Olewau Sanctaidd yn cael eu dosbarthu ar ôl y Cymun o Uwch Fwrdd yr Allor. Dylai clerigion ddod â'u llestri eu hunain.

30 Ebrill
Gorseddiad Archesgob Cymru
2.30pm
Cadeirlan Deiniol Sant ym Mangor
Mae mynediad i'r gwasanaeth taleithiol hwn drwy docyn yn unig. Fodd bynnag, bydd y gwasanaeth yn cael ei ffrydio yn fyw.

19 Mehefin
Dathliad Synod Môn
Rhagor o fanylion

Wrth Esgob Cynorthwyol Bangor

Annwyl Gyfeillion,

Hyfryd oedd gweld Cadeirlan Deinol Sant yn cael ei goleuo fel rhan o dystion Cymorth Cristnogol dros Wcráin y penwythnos diwethaf ac fel symbol o gynifer o weddïau a offrymwyd, ac arian a godwyd ar draws yr Esgobaeth i gynnig cymorth i’n chwiorydd a’n brodyr mewn angen.

Yn ogystal ag ymdrechion dros Wcrain, diolch i chi hefyd am eich gwaith caled parhaus ac am y cymorth hael y mae llawer o gydweithwyr wedi'i ymestyn i'r rhai sydd wedi bod yn ynysu neu'n wael gyda covid. A fyddech cystal â pharhau i gadw mewn cysylltiad â’r Deoniaid Bro a’r Archddiaconiaid lle mae absenoldeb neu salwch, fel y gallwn ofalu am ein gilydd yn briodol.

Ailgyflwyno'r cwpan cyffredin

Mae Canllawiau Covid ar wefan yr Eglwys yng Nghymru wedi’u diweddaru er mwyn galluogi eglwysi i ddod â’r cwpan cyffredin yn ôl lle mae digon o hyder ac awydd am hyn o Sul y Pasg ymlaen. Os gwelwch yn dda, a wnewch chi ailedrych ar eich asesiadau risg ar gyfer addoliad a pharhau i roi sicrwydd i’r rhai nad ydynt yn teimlo y gallant dderbyn o gwpanau cyffredin fod derbyn y Cymun Bendigaid mewn un math yn unig yn parhau’n iawn. Ni ddylai unrhyw un deimlo dan bwysau gan unrhyw newidiadau. Mae’r canllawiau diwygiedig yn cynnwys y canlynol:

“Mae gan eglwysi lleol dri opsiwn ar gyfer gweinyddu’r Cymun Bendigaid.

1. Mewn un math (bara yn unig)

2. Trwy weinyddiad cydamserol gan yr offeiriad

3. Yn y ddau fath gyda'r defnydd o'r cwpan cyffredin

Mae Llywodraeth Cymru wedi cadarnhau nad oes unrhyw reswm cyfreithiol pam na ddylai’r cwpan cyffredin gael ei ailgyflwyno ond, yn yr un modd, nid oes gofyniad i wneud hynny – dylai asesiad risg Covid-19 pob eglwys lywio’r penderfyniad i wneud hynny.

Mae Mainc yr Esgobion yn argymell, ar gyfer yr eglwysi hynny sy’n dymuno gwneud hynny ar ôl cynnal asesiad risg gofalus, y gellir adfer y cwpan cyffredin o Ddiwrnod y Pasg 2022 (gan dybio nad oes unrhyw newid i’r fframwaith rheoleiddio).

Lles clerigion

Gyda phryderon am gostau byw cynyddol mae ymwybyddiaeth gynyddol y gallai rhai clerigion fod yn teimlo dan fwy o bwysau ariannol. Mae cymorth a chefnogaeth ar gael gan sefydliadau gan gynnwys Clergy Support Trust. Os hoffai unrhyw un ragor o fanylion neu os hoffai drafod pryderon, cysylltwch â’r archddiaconiaid.

Ymddiriedolaeth Piggott

Mae grantiau bach o hyd at £3k ar gael gan “Ymddiriedolaeth Piggott” ar gyfer prosiectau sy’n ymwneud â grwpiau agored i niwed, plant a phobl ifanc, yr henoed neu ar gyfer gwella mynediad, addysg neu brosiectau ffydd bach. Cynhelir y cyfarfod ariannu nesaf i benderfynu ar geisiadau ddiwedd mis Mai. Mae ffurflenni cais ar gael gan Robert Jones. (Dim ond unwaith mewn 5 mlynedd y gellir rhoi grantiau i Ardal Weinidogaeth, felly peidiwch â gwneud cais os yw eich Ardal Gweinidogaeth wedi derbyn grant gan yr ymddiriedolaeth yn y 5 mlynedd diwethaf.)

Wrth i ni ddechrau’r Wythnos Sanctaidd mae gennym lawer o gyfleoedd i ymgynnull nid yn unig fel teulu Esgobaethol ond yn fwriadol â holl bobl Dduw ledled y byd. Yn ymwybodol o gymaint sydd ar chwâl ar hyn o bryd gadewch inni ddod at ein gilydd mewn addfwynder a gobaith. Cerddwch yn ffordd y groes, gweddïwch y bydd Crist yn ein helpu i fod yn ffyddlon ar gyfer ein taith ac i ymddiried yn nerth iachaol cariad mawr Duw.

Arweinydd newydd i Fro Ogwen

Cafodd ei gyhoeddi ar Ddydd Sul 3 Enrill bod y Parchg Ddr Gareth Lloyd wedi cael ei benodi yn Ficer ac Arweinydd Ardal Bro Ogwen. I ddarllen rhagor am y penodiad defnyddiwch y botwm isod.

Dros yr wythnosau nesaf byddwn yn gweddïo dros:

17 Ebrill
Sul y Pasg

24 Ebrill
Beuno Sant Uwch Gwyrfai

1 Mai
Cyngor yr Esgob a Chyngor yr Esgobaeth

8 Mai
Bro Cybi

Tanysgrifiwch i dderbyn hysbys ar e-bost am Y Ddolen ac hysbysiadau esgobaethol eraill