Dywedwch ychydig wrtha’i amdanoch eich hun.

Dwi’n gweithio’n llawn amser ym maes ymchwil cnydau a hyfforddi ffermwyr, gan fwyaf o gartref. Dwi hefyd yn ofalwr i’m mam oedrannus, sy’n byw efo fi. Dathlodd mam ei phen-blwydd yn 99 oed yr wythnos diwethaf. Felly mae gwaith, gofalu am mam a gofalu am Eglwys Tudno Sant (fel warden) yn mynd â’r rhan fwyaf o f’amser. Dwi hefyd yn mwynhau darllen a cherdded. Dwi’n weithgar efo Cyfeillion Dyffryn Dedwydd a Gerddi Haulfre a dwi’n gwirfoddoli gyda’r Ymddiriedolaeth Cadwraeth Cacwn. Roeddwn i’n arfer byw yn Swydd Lincoln nes i mi berswadio fy rheolwr ar y pryd y gallwn weithio gartref.

Felly beth ddaeth â chi draw yma?

Roedd fy nhad yn dod o Ddeganwy yn wreiddiol ac roedd fy mam yma am gyfnod yn ystod y Rhyfel. Roeddwn wrth fy modd efo’r ardal o’r adeg y daethon ni yma am wyliau teuluol am y tro cyntaf. Roedd hynny yn y dyddiau pan fyddai torfeydd yn eistedd ar y cerrig beddau. Fe wnes i fy ngradd ym Mangor ac yna treulio gweddill fy amser yn ceisio dychwelyd yma. Eglwys Tudno Sant ydi un o’r rhesymau pam wnes i ddewis dod i Landudno yn hytrach nag i rywle arall yng Ngogledd Cymru.

O wirfoddoli yn yr eglwys i gael eich trwyddedu. Sut ddigwyddodd hynny?

Symudais i mewn ar y nos Iau ac ar ddydd Sul roeddwn i yn Eglwys Tudno Sant yn dweud, "Oes na unrhyw beth y galla’i wneud i helpu?" Dwi wedi bod yn weithgar ar hyd yr adeg, o ddechrau grŵp ieuenctid yr eglwys i fod yn ymwneud â llawer o wahanol feysydd.

Mi ges alwad ffôn gan Dominic yn dweud fy mod wedi cael fy newis am sgwrs ynghylch trwyddedu. Roeddwn i’n barod i wneud yr hyfforddiant Arweinydd Addoliad fel y gallen ni ofalu am Eglwys Tudno Sant pan na fyddai clerigion ar gael. Roedd yn dipyn o syndod i mi sylweddoli bod y sgwrs ynglŷn â swydd Gweinidog Arloesol. Dwi’n yn synnu i mi gael fy newis.

Pa wahaniaeth, os o gwbl, ydych chi’n meddwl y bydd cael eich trwyddedu yn ei wneud?

Does gen i wir ddim syniad pa wahaniaeth y bydd yn ei wneud! Mae ynglŷn â gwneud pethau’n wahanol. Dwi’n edrych ymlaen at yr hyn gallwn ni ei wneud. Rydyn ni’n eithaf ffodus bod tair ohonon ni’n cael ein trwyddedu’r un pryd o Fro Tudno – gallwn ni weithio efo’n gilydd.

Beth sy’n eich cyffroi am Eglwys Tudno Sant a’ch gweinidogaeth chi yno?

Mae ein prif wasanaethau yn yr awyr agored drwy gydol yr haf. Mae hynny wedi bod yn digwydd ers 1857 o leiaf felly dydi o ddim yn draddodiad newydd. Mae’n wasanaeth anffurfiol a hygyrch. Rydyn ni’n cael llawer o ymwelwyr. Mae pobol yn dod i eistedd ar y cyrion gan nad ydyn nhw efallai’n teimlo’n hyderus am ddod i ymuno ond byddan nhw’n gwrando ymhellach i ffwrdd yn y fynwent.

Mae’r eglwys ei hun yn un o’r llefydd yma sy’n cael eu disgrifio fel lle tenau. Mi allwch chi deimlo bod pobl wedi bod yn gweddïo yno ers canrifoedd.

Rydyn ni’n ceisio cynnal pethau a fydd yn apelio at bobol eraill, rhywbeth na fyddai pobol efallai’n ei ystyried yn wasanaeth eglwys arferol. Rydyn ni wedi bod yn gwneud pethau ar gyfer y Great Get Together ond ddim eleni gan ein bod yn dal i fod yn ofalus. Rydyn ni hefyd yn ceisio defnyddio’r fynwent gymaint ag y gallwn. Gyda Chyfeillion Eglwys Tudno Sant, ni yw’r fynwent eglwys gyntaf yn yr Esgobaeth i ennill Baner Werdd Gymunedol wrth i ni reoli’r fynwent er budd bywyd gwyllt gan sefydlu llwybrau mynwent. Rydyn ni’n ceisio defnyddio hynny i ennyn diddordeb pobol, i’w tynnu i mewn i sylweddoli nad ydi’r Eglwys yn rhywbeth estron na brawychus.

Beth mae eich ffydd yn ei olygu i chi? A yw’r Eglwys wastad wedi bod yn rhan o’ch bywyd?

Mi gefais i fy magu ynddi. Mae wedi bod yn rhan o fy mywyd erioed. Alla i ddim dychmygu bod heb ffydd. Mae’n anodd disgrifio’r peth mewn unrhyw ffordd arall.

Pa un ydi’ch hoff fisgeden?

Roeddwn i’n trio ffindio os ydi Jaffa Cake yn dal yn fisgeden ta ydi hi’n swyddogol yn gacen!

Pe bai rhywun yn dweud wrthych eu bod yn meddwl bod Duw am iddyn nhw gynnig mwy, beth allech chi ei ddweud wrthyn nhw?

Dewch i siarad â rhywun. Mae cymaint o bethau y gall pobol eu gwneud mewn cymaint o wahanol ffyrdd. Mae yna rôl i bawb.Efallai nad ydi pobol yn meddwl bod ganddyn nhw rywbeth i’w gynnig ond, byddwch yn agored i’r hyn mae pobol eraill yn ei weld ynddyn nhw.Cymerwch y cam nesaf ar y daith.