Dywedwch ychydig amdanoch chi’ch hun.

Rwy’n fab fferm a gafodd ei fagu ar fferm fynydd yn Nyffrynnoedd Swydd Efrog, felly rwy’n deall rhythmau’r flwyddyn ffermio defaid, ond treuliais 25 mlynedd gyntaf fy mywyd fel oedolyn yn byw ac yn gweithio yng nghanol dinas Birmingham yn datblygu prosiectau cymunedol yn yr eglwys.

Cyn ymddeol bedair blynedd yn ôl a dod i fyw i Fynydd Llandygai roeddwn i’n rheithor St Bridget’s, West Kirby, ar Gilgwri. Yn ogystal ag ymrwymiadau teuluol a chymryd gwasanaethau Sul ym Mro Ogwen, rwy’n mwynhau mynd ar fy meic trydan ledled Gogledd Cymru. Yn ystod y ddwy flynedd ddiwethaf mae hyn wedi cynnwys reidio fersiynau ffordd o Lwybr Pererinion Gogledd Cymru a Ffordd Cadfan.

Beth wnaeth eich ysbrydoli chi i ymgymryd â rôl Caplan i Offeiriaid sydd wedi ymddeol yn ein hesgobaeth ni?

Byddai’n well gennyf i ddweud bod y rôl wedi fy narganfod i! Dyna sydd i’w weld yn digwydd i mi yn aml yn ystod 40 mlynedd o weinidogaeth Gristnogol lawn amser... Doeddwn i ddim yn ystyried y math hwn o rôl caplaniaeth o gwbl - ond yna daeth y cyfle ar adeg sy’n ymddangos fel amser a roddwyd gan Dduw. Mae gennyf i ddiddordeb mewn pobl, ac rwy’n mwynhau casglu grwpiau at ei gilydd a chynnal lle, gwneud cysylltiadau. Ac mae gennyf i’r profiad uniongyrchol o fy mhroses bontio fy hun i ymddeoliad dros y blynyddoedd diwethaf.

Beth ydych chi’n meddwl yw anghenion ysbrydol offeiriaid sydd wedi ymddeol a sut ydych chi’n gobeithio eu cefnogi nhw?

Bydd pawb yn wahanol - fy nod cychwynnol yw dod i adnabod ein clerigwyr sydd wedi ymddeol drwy gael sgyrsiau â nhw, gwrando arnyn nhw, a darganfod pa fath o help neu gefnogaeth fyddan nhw’n ei groesawu.

Yn fuan ar ôl ymddeol efallai bod gan bobl gwestiynau am hunaniaeth: “Pwy ydw i pan nad wyf bellach yn ficer?”; Cwestiynau sy’n codi o ddiffyg strwythur newydd i’n bywyd bob dydd: "Sut ydw i’n cynnal neu adnewyddu fy ngweddïau?" neu "Sut ydw i’n dysgu bod yn llonydd ar ôl bywyd gwaith prysur yn gwasanaethu eraill?" Bydd eraill yn ceisio defnyddio’r doethineb sydd wedi’i ennill o oes o brofiad gweinidogaeth mewn ffyrdd newydd.

Ac mae clerigwyr yn wynebu’r un problemau â phob person hŷn arall wrth ddysgu sut i ollwng gafael ar bethau, sut i ollwng gafael ar iechyd, efallai, nes bod yn rhaid i ni ollwng gafael ar fywyd ei hun. Sut allwn ni wynebu marwolaeth gyda gras? A sut gallwn ni gefnogi eraill ar y daith honno?

Sut gall esgobaeth wasanaethu orau offeiriaid sydd wedi ymddeol?

Trwy ddweud "Diolch" am yr holl ffyrdd y mae ein clerigwyr sydd wedi ymddeol yn cefnogi addoli a gweinidogaeth ein heglwysi a’r clerigwyr cyflogedig (sef yr hyn y mae’r Esgob David yn ei wneud yn y gwasanaeth trwyddedu yr wythnos hon).

Beth fydd eich rôl yn ei chynnwys?

Mae fy nghytundeb gwaith fel caplan yn amrywio o ddarparu gofal bugeiliol ac ysbrydol unigol pan fydd yr angen yn codi, i drefnu cyfarfodydd anffurfiol o glerigwyr sydd wedi ymddeol er mwyn cael cefnogaeth ac anogaeth ar y cyd, naill ai ar-lein neu wyneb yn wyneb. Gallai pob math o bosibiliadau godi: efallai y byddaf yn cynnal "grŵp llyfrau" rheolaidd i’n helpu ni i astudio a rhannu ein syniadau ar bwnc diwinyddol. Pwy a ŵyr?!