Mae Esgob Bangor – y Gwir Barchedig Andy John – yn falch o allu cyhoeddi penodiad y Parchedig Sara Roberts fel curad Ardal Weinidogaeth Bro Madryn.

Fel curad, mae Sara ar hyn o bryd wedi gwasanaethu chwe mis, allan o gyfnod sy’n dair blynedd o hyd fel arfer, lle mae’n gweinidogaethu ochr yn ochr â chydweithwyr ordeiniedig eraill.

Bydd Sara, sydd hefyd yn ymgyrchwraig ddiflino dros ffoaduriaid a’r rhai hynny y mae cymdeithas yn ei chael hi’n gyfleus i’w hanghofio, yn symud o fod yn gwasanaethu yn Ardal Weinidogaeth Bro Enlli ar ran ddeheuol Penrhyn Llŷn, i fod yn rhan o’r tîm yn Ardal Weinidogaeth Bro Madryn, sy’n gwasanaethu’r cymunedau o amgylch Nefyn, Edern a Botwnnog ar ochr ogleddol Pen Llŷn.

Wrth edrych ymlaen at ei rôl newydd, dywedodd Sara, 'Ym Mro Enlli, cefais fwynhau’r profiad o weithio o fewn tîm newydd a thraddodiad eglwysig gwahanol. Fe fu’n fraint i ddod i nabod y cymunedau, cynulleidfaoedd a’r gwirfoddolwyr. Dwi wedi gwerthfawrogi’n fawr pob profiad, megis gweld bywyd yr Eglwys yn y gymuned yn tyfu trwy waith y banc bwyd.

Bellach, rydw i’n edrych ymlaen at fod yn rhan o gymunedau eraill, ac i ddysgu am hanes, gobeithion a dyfodol Bro Madryn.'

Meddai ficer presennol Sara, ac Arweinydd Ardal Weinidogaeth Bro Enlli, yr Hybarch Andrew Jones, 'Yn ystod y flwyddyn a aeth heibio, mae dau beth ynglŷn â Sara sydd wedi gwneud argraff arna i. Yn gyntaf, y ffordd y bu iddi gyfuno ei hastudiaethau parhaus yn Athrofa Padarn Sant gyda’i gweinidogaeth ym Mro Enlli a’i bywyd personol. Yn ail, mae hi wedi arddangos sgiliau bugeiliol ardderchog ac mae pobl Bro Enlli’n adrodd yn gyson wrtha i am ei phwyslais hithau ar bwysigrwydd gweinidogaeth fugeiliol.

Rydw i’n ei chymeradwyo’n galonnog a gyda hyder i weinidogaethu ym Mro Madryn ac yn diolch iddi am bopeth a ddaeth hithau aton ni yma ym Mro Enlli.'

Dywedodd ficer newydd Sara, ac Arweinydd Ardal Weinidogaeth Bro Madryn - y Parchedig Richard Wood, 'Mae’n gyffrous meddwl bod Sara’n dod i wasanaethu yma gyda ni fel Curad ym Mro Madryn. Mae sôn wedi bod ar led am ei hangerdd, ei brwdfrydedd a’i gallu tra bu ym Mro Enlli. Mae Bro Madryn bellach yn edrych ymlaen at ei chroesawu i bregethu yma mewn gwasanaeth ar y cyd yn ystod y Grawys, ac yna pan ddaw hi aton ni dros yr haf.'

Ychwanegodd Esgob Bangor, y Gwir Barchedig Andy John, ‘Mae hi wedi bod yn bleser bod yn llygad-dyst i ddatblygiad gweinidogaeth Sara, fel ymgyrchydd a bellach fel cydweithiwr ordeiniedig newydd. Cafodd y gallu gan Dduw i ysbrydoli a chefnogi eraill mewn gweithred, yn ogystal â gweithredu mewn cariad ac mewn gair sylfeini gweinidogaeth fugeiliol ordeiniedig. Edrychaf ymlaen at ei gweld yn datblygu ymhellach yn ei chyfnod gyda’r tîm ym Mro Madryn.

Gweddïwch dros Sara, ei theulu a phobl a thimau gweinidogaeth Bro Madryn a Bro Enlli.'

Caiff Sara ei thrwyddedu i’w gweinidogaeth ym Mro Madryn mewn gwasanaeth arbennig yn ystod yr haf.