Mae Esgob Bangor - y Gwir Barchedig Andy John - yn falch o gyhoeddi penodiad y Parchedig Miriam Beecroft fel Arweinydd Ardal Weinidogaeth Bro Cyfeiliog a Mawddwy, yn gwasanaethu eglwysi a chymunedau Dyffryn Dyfi yng nghylch Machynlleth, Cemaes, Corris, Darowen, Llanbrynmair, Llanwrin a Mallwyd.

Curad presennol Ardal Weinidogaeth Bro Ardudwy ydy Miriam, yn gwasanaethu eglwysi a chymunedau’r Bermo a Harlech.

Yn wreiddiol o Formby ger Lerpwl, daeth Miriam i astudio yn y brifysgol yn Aberystwyth yn 2004, ac yma yng Nghymru mae hi wedi bod ers hynny. Bu’n gweinidogaethu fel person lleyg yn Aberystwyth ac yn Llys-faen, Caerdydd. Cafodd 2 flynedd o hyfforddiant yng Ngholeg Mihangel Sant yn Llandaf cyn ei hordeinio yng Nghadeirlan Bangor yn 2015.

Mae Miriam yn briod â Darren, ac mae iddyn nhw ferch ifanc, Anwen, gydag ail blentyn ar y ffordd!

Dywedodd Esgob Bangor - y Gwir Barchedig Andy John, “Mae hi bob amser yn bleser rhodio ochr yn ochr â chlerigwyr ordeiniedig newydd ar bererindod eu gweinidogaeth.

Mae gan Miriam y potensial i fod yn Arweinydd Ardal Weinidogaeth ardderchog ac mae Bro Cyfeiliog a Mawddwy yn ffodus i fod yn ennill clerigwraig ifanc ysbrydoledig i arwain y Tîm Gweinidogaeth yno ac i adeiladu ar weinidogaethau’r Canon Kath Rogers a’r Parch Roland Barnes.

Hoffwn longyfarch Miriam a Darren ar newyddion eu hail blentyn. Cofiwch weddïo dros Miriam, Darren ac Anwen, yn ogystal â phobl a thimau Bro Cyfeiliog a Mawddwy a Bro Ardudwy.”

Wrth edrych ymlaen at symud, dywedodd Miriam, “Mae gweithio ochr yn ochr â’r Canon Beth Bailey ym Mro Ardudwy wedi bod yn faes hyfforddiant rhagorol i mi allu mynd i’r afael â sut i arwain ardal weinidogaeth, ac rydw i’n ddiolchgar i’r holl eglwysi yno am y fath groeso gefais yno fel eu curad.

Erbyn hyn, rydyn ni’n teimlo’n gyffrous fel teulu i fod yn symud i ardal Machynlleth. Dwi’n edrych ymlaen at weithio gyda’r tîm gweinidogaethu a phobl Bro Cyfeiliog a Mawddwy er mwyn cael dirnad sut orau i addoli Duw, tyfu Ei Eglwys a charu Ei fyd gyda’n gilydd yn y cymunedau hyn.”

Meddai Canon Beth Bailey, Arweinydd Ardal Weinidogaeth Bro Ardudwy, sydd wedi bod yn goruchwylio ffurfiant Miriam fel ficer ers ei hordeiniad, “Mae hi wedi bod yn bleser rhannu’r weinidogaeth gyda Miriam. Mae eglwysi a chymunedau Bro Ardudwy wedi eu bendithio’n fawr trwy ei hamrywiol ddoniau: yn enwedig ei gallu i gyfathrebu’r efengyl mewn modd clir, heriol a real, ochr yn ochr â’i deallusrwydd, gonestrwydd, ei synnwyr clên o hwyl, a’i chalon gynnes, fugeiliol.

Mae Miriam wedi cryfhau ein cysylltiadau gyda theuluoedd a phlant trwy ei gweinidogaeth greadigol yn ein hysgolion, clybiau a digwyddiadau estyn allan, ond bod cariad go iawn tuag ati hefyd, ar yr un pryd, ymysg aelodau hŷn ein cymunedau.

Fel gweinidog ifanc, mae Miriam wedi rhoi mewnwelediad gwerthfawr inni o heriau cenhadu ac efengylu, a thrwy ddefnydd ei doniau fel cerddor a chantores, wedi galluogi inni archwilio ffyrdd ystyrlon eraill o addoli, ynghyd â’r traddodiadol.

Bydd eglwysi Bro Ardudwy yn drist iawn o weld Miriam yn eu gadael. Fodd bynnag, rydyn ni’n hyderus y bydd ei dull addfwyn o arwain, ei pharodrwydd i wrando a dysgu, ac yn fwy pwysig, ei dyhead dwfn i wasanaethu’r Arglwydd ac i rannu ei gariad ag eraill, yn dod â chystal bendith i bobl Bro Cyfeiliog a Mawddwy.

Fe fyddwn ni’n gweddïo dros Miriam, Darren ac Anwen wrth iddyn nhw ganfod eu traed yn eu gweinidogaeth newydd.”

Cynhelir gwasanaeth arbennig i nodi dechrau gweinidogaeth newydd Miriam am 7yh ar Nos Iau Dyrchafael yn Eglwys Pedr Sant, Machynlleth.