Bydd y Parch Janet Fletcher yn cael ei thrwyddedu fel Ficer ar y Cyd Bro Enlli a Swyddog Ysbrydolrwydd a Phererindod ar 6 Medi am 6yh yn Eglwys Sant Hywyn, Aberdaron.

Mae Esgob Bangor – y Gwir Barchedig Andy John – yn falch o allu cyhoeddi penodiad y Parchedig Janet Fletcher fel Ficer ar y Cyd yn Ardal Weinidogaeth Bro Enlli. Mae Ardal Weinidogaeth Bro Enlli’n gwasanaethu’r cymunedau yn nalgylch Pwllheli, Llanbedrog ac Aberdaron.

Bydd Janet yn symud o’i rôl bresennol fel Ficer ar y Cyd Ardal Weinidogaeth Bro Ystumanner, sy’n gwasanaethu cymunedau o amgylch Tywyn ac Aberdyfi, i fyw yn Aberdaron, ar ben pellaf Penrhyn Llŷn.

Ordeiniwyd Janet yn Esgobaeth Lerpwl yn 2000 gan wasanaethu mewn sawl plwyf yno cyn dod i Fywoliaeth Reithorol Bangor 2011. Symudodd i Ardal Weinidogaeth Ystumanner fel Ficer Cynorthwyol yn 2015.

Bydd Janet yn parhau i gyfuno ei gweinidogaeth ym Mro Enlli gyda’i rôl fel Swyddog Ysbrydolrwydd Esgobaeth Bangor. Mae hi’n awdures gyhoeddedig, yn ogystal â llunio llyfrynnau astudio’r Adfent a’r Grawys ar gyfer Esgobaeth Bangor.

Wrth edrych ymlaen at ei symudiad, meddai Janet, “Dwi wedi mwynhau bod yn rhan o Fro Ystumanner ac mae gen i sawl atgof hapus ar gof a chadw o’r bobl, yr eglwysi a’r fro.

Roedd hi’n syrpreis hyfryd i gael fy ngwahodd i fod yn Ficer Cynorthwyol ym Mro Enlli. Dwi’n edrych ymlaen at y cam nesaf hwn yn fy ngweinidogaeth, ac i ddarganfod yr hyn y gallaf innau ei gyfrannu at yr ardal weinidogaeth. Wrth symud i Aberdaron, dwi’n gobeithio gallu astudio gwaith R.S.Thomas a Jim Cotter ac eraill, er mwyn gweld sut y medren nhw ysbrydoli fy sgwennu innau ymhellach.

O fewn fy rôl esgobaethol fel Swyddog Ysbrydolrwydd, fe fydd gen i bellach yr her ychwanegol o’r brîff ar bererindota, lle fydda i, ynghyd ag eraill, yn gweithio ar y llwybr o Fangor i Enlli.“

Dywedodd y Parch Nigel Adams, Deon Ardal Synod De Meirionnydd, “Bydd pobl Ystumanner yn drist o weld Janet yn symud, gan fod ei gweinidogaeth wedi ei werthfawrogi’n fawr. Mae hi hefyd wedi delio â’r holl faterion gweinyddol sy’n codi pan fo swydd yn dod yn wag yn yr Ardal Weinidogaeth ac am hynny, rydw i’n ddiolchgar iawn. Mae pawb yn cydnabod pwysigrwydd y gwaith mae hi’n ei wneud fel Swyddog Ysbrydolrwydd Esgobaethol ac yn falch y bydd hi’n parhau gyda’r rôl honno. Bydd ein meddyliau a’n gweddïau gyda hi wrth iddi symud i’r cyfnod newydd hwn yn ei gweinidogaeth. Fe fydd hi’n dal i fod gyda ni mewn ffordd real iawn wrth inni ddefnyddio’r llenyddiaeth mae hi wedi’i chynhyrchu.”

Dyma oedd ymateb Ficer ac Arweinydd Ardal Weinidogaeth Bro Enlli, yr Hybarch Andrew Jones, “Dw i wrth fy modd bod Janet am ymuno â thîm Bro Enlli. Dwi wedi nabod Janet ers blynyddoedd lawer ac edrychaf ymlaen at weithio’n agos gyda hi yn yr Ardal Weinidogaeth yn ogystal ag ochr yn ochr â hi wrth iddi barhau fel Swyddog Ysbrydolrwydd yr Esgobaeth.

Yr hyn sy’n fy nghyffroi ynglŷn â’i rôl ysbrydolrwydd ydy bod yr Esgob wedi ychwanegu brîff pererindota. Mae Bro Enlli wrth wraidd taith y pererinion i Ynys Enlli ac mae cael Janet yn gydymaith yn canolbwyntio ar bererindota yn amserol ac yn ardderchog. Mae’r diddordeb mewn llwybrau pererinion a chyrchfannau pererindota ledled Ewrop wedi arwain at dwf o fewn i’r eglwys mewn gwledydd eraill, felly mae’r ffocws hwn yn ddelfrydol, wrth i ninnau geisio tyfu’r eglwys gyda’n gilydd fel esgobaeth.”

Dywedodd Esgob Bangor - y Gwir Barchedig Andy John - "Mae Janet yn offeiriad ardderchog sy'n gwasanaethu ein hesgobaeth yn Esgobaeth gydag ymroddiad, boed hynny ei gweinidogaeth ym Mangor a Bro Ystumanner neu drwy ei hysgrifennu, lle mae hi wedi cyffwrdd ag enaid llawer un a'u helpu i ddod yn agosach at Dduw. Bydd hi'n ased gwerthfawr i dîm gweinidogaeth ym Mro Enlli.

Mae gan Fro Enlli - ac yn Aberdaron yn arbennig - hanes da o glerigwyr sy'n awduron. Gobeithiaf a gweddïaf y bydd y bobl, y dirwedd a'r profiad o fyw yn y rhan honno o Lŷn yn ysbrydoli Janet, ac edrychaf ymlaen at synhwyro’r dylanwad yn ei gwaith ysgrifenedig.

Gweddïwch dros Janet, yn ogystal â phobl Bro Enlli a Bro Ystumanner. "

Disgwylir y bydd Janet yn symud yn yr haf, pan gynhelir gwasanaeth arbennig i ddathlu dechreuad ei rôl newydd ym Mro Enlli.