Mae Esgob Bangor- y Gwir Barchedig Andy John – yn falch o gyhoeddi penodiad y Parchedig Tony Hodges fel Ficer ac Arweinydd Ardal Gweinidogaeth Bro Ardudwy, sy’n gwasanaethu’r cymunedau yn nalgylch Harlech, Dyffryn Ardudwy a’r Bermo. Ers flwyddyn mae Tony wedi bod yn Ficer ar y Cyd yn gweinidogaethu ym Mro Ardudwy.

Bydd gweinidogaeth newydd Tony yn dechrau gyda gwasanaeth arbennig am 7yh Nos Fercher 13 Chwefror yn Eglwys Sant Tanwg, Harlech.

• 📅 Nos Fercher 13 February
• ⏰ 7yh
• ⛪️S Tanwg, Harlech

Yn frodor o Ferthyr Tudful, hyfforddodd Tony ar gyfer y weinidogaeth ordeiniedig yng Ngholeg y Santes Fair, Oscott, yn Lloegr a Choleg Sant Padrig, Carlow, yn yr Iwerddon. Fe’i hordeiniwyd yn ddiacon ym 1990 ac yn offeiriad ym 1991, a hynny ar gyfer Archesgobaeth Gatholig Rhufeinig Caerdydd, lle bu’n gweithio fel offeiriad plwyf mewn sawl plwyf ledled de-ddwyrain Cymru.

Bu Tony yn gaplan i bobl Fyddar a Thrwm eu Clyw ers ei ordeinio, gan arwyddo’n gyson ar gyfer gwasanaethau trwy Gymru gyfan. Fe fu hefyd yn gweithio yn Luz – Saint Sauveur yn ne Ffrainc, lle bu’n gofalu, gydag offeiriad arall, am Ardal Fugeiliol Luz, a oedd yn cynnwys 17 eglwys.

Mae’n ei chyfrif hi’n fraint o fod yn aelod o’r Orsedd, anrhydedd a gyflwynwyd iddo fel cydnabyddiaeth o’i waith yn hyrwyddo’r Gymraeg a’i diwylliant fel offeiriad plwyf yng Nghaerdydd. Ei enw barddol ydy Glas y Dorlan.

Mae gan Tony gariad angerddol tuag at fywyd gwyllt a natur ac fe hyfforddodd fel Tywysydd Safaris ac Arweinydd Teithiau yn Botswana a De Affrica. Bu’n gweithio i’r RSPB fel Rheolwr Ardal Canolbarth Cymru dros Ddatblygu Aelodaeth a hyfforddi fel ymgynghorydd ecolegol.

Ar hyn o bryd mae Tony yn byw ym Mhorthmadog gyda’i bartner sifil, Dominic, sydd hefyd yn gweithio i Esgobaeth Bangor, fel Cyfarwyddwr Disgyblaeth a Galwedigaethau. Mae ganddyn nhw dŷ yn Llydaw, sy’n cael ei adnewyddu’n raddol, ac mae’r ddau ohonyn nhw’n mwynhau teithio.

Meddai Tony, ‘Rwy'n llawn cynnwrf i weithio gyda phobl Bro Ardudwy fel Arweinydd Ardal Weinidogaeth. Gyda'n gilydd, byddwn yn wynebu heriau cenhadaeth a gweinidogaeth yn y 21ain ganrif yng Ngwynedd. Rwy'n edrych ymlaen at symud i ardal Bro Ardudwy, ac i fyw yng nghymunedau pobl fy mod wedi gweithio gyda nhw dros y flwyddyn ddiwethaf.

Dywedodd Esgob Bangor – y Gwir Barchedig Andy John, ‘Bu Tony yn ased i dîm gweinidogaeth Bro Ardudwy yn ystod y flwyddyn ddiwethaf, a gweddïwn y bydd ei sgiliau arwain yn galluogi Bro Ardudwy i ffynnu. Gweddïwch dros Tony, Dominic a phobl Bro Ardudwy, os gwelwch yn dda. '

Bydd Tony yn dechrau ei weinidogaeth newydd fel Ficer ac Arweinydd Tîm yr Ardal Gweinidogaeth mewn gwasanaeth arbennig cyn bo hir.