Mae Esgob Bangor – y Gwir Barchedig Andy John – yn falch o gyhoeddi penodiad Pam Odam yn Gyfarwyddwraig Gynorthwyol Disgyblaeth a Galwedigaethau Esgobaeth Bangor. Bydd Pam, sy’n gweinidogaethu yn Ardal Weinidogaeth Bro Ardudwy, yn gweithio ochr yn ochr â Chyfarwyddwr Disgyblaeth a Galwedigaethau’r Esgobaeth, y Parch Dominic McClean.

Bydd gan Pam oruchwyliaeth dros les a datblygiad gweinidogion trwyddedig lleyg, yn galluogi i gael mynediad at gefnogaeth briodol ar gyfer eu gweinidogaeth drwyddedig leyg o’r Esgobaeth a’r Dalaith, yn ogystal â chydlynu’r adolygiadau teirblwyddol ar gyfer gweinidogion trwyddedig lleyg a diwrnod myfyrdod blynyddol newydd.

Wrth edrych ymlaen at ei rôl newydd, dywed Pam, “Ers imi gael fy nhrwyddedu yn Ddarllenydd, mae hi wedi bod yn fraint imi wasanaethu ar Fyrddau Darllenwyr yr Esgobaeth a’r Dalaith, yn ogystal ag ar Gyngor Gweithredol y Darllenwyr Canolog, lle cefais y cyfle i helpu llunio Gweinidogaeth Drwyddedig Leyg yn yr amrywiol ffurfiau y’i gwelir heddiw. Mae hi wedi bod yn fraint i fod yn rhan o dîm yr esgobaeth sy’n gwerthfawrogi’r ymrwymiad i addoliad a gweinidogaeth y mae Gweinidogion Trwyddedig Lleyg yn ei wneud. Mae hefyd yn fraint i gynnig o f’amser i gyd-gerdded â Gweinidogion Trwyddedig Lleyg, rhai sydd wedi hen ennill eu ‘plwyf’ a’r rhai newydd, sydd â lle pwysig yn y dasg o addoli Duw, tyfu’r eglwys a charu’r byd.”

Wrth wneud sylw ar benodiad Pam, meddai Esgob Andy, “Bydd annog a datblygu’r doniau a gweinidogaeth holl bobl Dduw yn hanfodol wrth i’r Esgobaeth geisio cyflawni’r genhadaeth a roddwyd inni gan Dduw. Mae Pam yn dwyn cyfoeth o brofiad gyda hi i’w rôl newydd ac fe wn y bydd hi’n gweithio’n dda gyda Dominic. Cofiwch weddïo dros Pam a Dominic a phawb o’r Gweinidogion Trwyddedig Lleyg yn ein Hesgobaeth.”