Andrew Hughes

Diacon a fydd yn gwasanaethu curadiaeth yn Ardal Weinidogaeth Bro Cadwaladr (Gaerwen/Aberffraw)

Fe’m ganwyd yn Plymouth, lle’r oedd fy nhad yn gaplan gyda’r llynges, ond wedi treulio’r rhan fwyaf o’m bywyd yng Ngogledd Cymru. Bu’r Eglwys yn rhan annatod o’m bywyd erioed. Fe gefais fy medyddio yn Eglwys Crist, Caernarfon, bedydd esgob yn Eglwys y Santes Fair, Llanfairpwll, yn ogystal â bod yn gantor yng Nghadeirlan Bangor, lle gafodd fy nghariad at gerddoriaeth eglwysig ei feithrin.

Bûm yn gweithio yn y diwydiant bwyd am ddwy flynedd ar hugain cyn astudio rheoli busnes gyda thwristiaeth ac Almaeneg. Wedi’r cyfnod hwn i ffwrdd o’r diwydiant bwyd, fe deimlais alwad gan Dduw i wasanaethu yn yr Eglwys. Dechreuais y cwrs Archwilio’r Ffydd yn 2010 a arweiniodd at radd mewn Diwinyddiaeth a Disgyblaeth ar gyfer y Weinidogaeth. Fe fues i’n hyfforddi ac yn gwasanaethu fel Darllenydd cyn cael f’argymell i hyfforddi ar gyfer y weinidogaeth ordeiniedig.

Bu fy siwrne at ordeiniad yn un hir a heriol, ond hefyd yn llawn breintiau gan Dduw ac yn un gorfoleddus imi. Bu Duw’n profi cryfder fy ffydd, yn agor a chau drysau, ond dysgodd pob rhan o’r daith rhywbeth newydd i mi, gan feithrin fy ffydd.

Erbyn hyn, dwi’n edrych ymlaen at gyfnod newydd yn fy ngweinidogaeth ym Mro Cadwaladr, a hynny gyda chymysgedd o gyffro a’r ansicrwydd sy’n dod gyda menter. Lluniwyd pawb yn nelwedd Duw ac mae’n fraint cael gyd-gerdded â nhw, trwy lawenydd a galar, yn rhannu Newyddion Da’r Efengyl.

Hugh Jones

Diacon a fydd yn gwasanaethu curadiaeth yn Ardal Weinidogaeth Bro Tysilio (Porthaethwy/Benllech)

Fe’m ganwyd yng Nghaer sawl blwyddyn yn ôl bellach, i deulu oedd â llawer o dreftadaeth Gymreig iddi.

Fe fues i’n weithgar ym mywyd cyhoeddus trwy gydol fy mywyd, yn gwasanaethu’n ddiweddar fel cadeirydd Ardal Harddwch Naturiol Eithriadol Bryniau Clwyd a Dyffryn Dyfrdwy, yn ogystal â Bwrdd Cymunedau Mwy Diogel Gogledd Cymru.

Fe fues i’n weithgar yn Esgobaeth Caer, yn gwasanaethu ar Synod yr Esgobaeth a Synod Cyffredinol Eglwys Loegr. Am sawl blwyddyn roeddwn yn teimlo galwad gref at y Weinidogaeth fel Darllenydd ond roedd fy ngalwedigaeth fel peilot cwmni awyrennau yn tarfu ar fy astudiaethau.

Ond mae Duw yn un sy’n dyfalbarhau! Ar fy nhrydydd cynnig, fe lwyddais i gwblhau'r maes llafur hyfforddi tair blynedd ym Mhrifysgol Caer ac fe gefais fy nhrwyddedu fel Darllenydd yng Nghadeirlan Caer yn 2009.

Am flynyddoedd lawer, fe deimlais fod yr Ysbryd Glân yn fy ngalw i’r weinidogaeth yn yr Eglwys yng Nghymru, ac i Ynys Môn yn benodol. Fel canlyniad, fe ges i fy hun yn addoli yn Eglwys y Santes Fair ym Mhorthaethwy ac yn ymateb i’r angen i gefnogi Tîm Gweinidogaeth Bro Tysilio, dan arweiniad y Canon Angela Williams. Mae hi’n fraint i fod yn rhan o’r tîm hwn ac yn hyfryd cael gwasanaethu ynddo. Yn ysbrydol, dwi’n teimlo mai fama mae Duw am imi fod.

Cyfoethogwyd fy nhaith Gristnogol wedi’i chyfoethogi gan y cyfleoedd i addoli mewn Eglwysi’r Gymuned Anglicanaidd ledled y byd. Medraf gofio’n benodol y gwersi a ddysgwyd wrth wasanaethu’r Eglwys genhadol ym Mhapwa Gini Newydd, a fu’n fodd imi ddeall sut y mae hi’n bosib gwasanaethu ac addoli Duw mewn gwahanol ffyrdd, tra’n cynnal uniondeb yr Efengyl.

Credaf fod rôl Diacon Neilltuol yn un sy’n seiliedig ar wasanaeth, sy’n cynnig cyfleoedd cenhadol cyffrous a heriol, gan dywys yr Eglwys ymlaen i gyfnod newydd cyffrous.

Eryl Parry

Diacon Arloesi a fydd yn gwasanaethu curadiaeth yn Ardaloedd Weinidogaeth Bro Celynnin (Conwy) ac Ardal Genadu Aberconwy (Esgobaeth Llanelwy)

Dwi’n galw fy hun yn Sgowsar Cymraeg! Yn un a fagwyd i deulu o Gymry yn Lerpwl, fe es i weithio i John Lewis fel hyfforddai graddedig mewn gwahanol leoliadau yn y DU. Wedi dychwelyd i Lerpwl, fe sefydlais a rhedeg canolfan gynadledda i Archesgobaeth Babyddol Lerpwl, cyn sefydlu a datblygu’r gweithgareddau masnachol ar gyfer y ddwy Gadeirlan yn Lerpwl. Cefais fwynhad gweithio gyda rhwydweithiau cyfoedion ehangach i dyfu twristiaeth a hybu adnewyddiad yn Lerpwl.

Yn 2016, symudais i Gonwy. Mae cenedlaethau o’m teulu’n hanu o Ogledd Cymru ac wedi bod yn aelodau ffyddlon eglwysi yn yr Esgobaeth hon. Felly mae’r gwreiddiau’n ddwfn yma ac er na wnes i erioed ddychmygu fy hun yn gadael bywyd y ddinas, mae symud yma wedi teimlo fel ‘dod adre’ mewn rhyw fodd.

Mae’r Duw a addolwn ni yn un sy’n llawn yr annisgwyl, ond mae’n gwybod beth sydd o’n blaenau ni cyn inni wybod, i’r graddau fel bod hyd yn oed newid dramatig mewn bywyd yn gallu teimlo fel galwad amlwg: i’r union fan a’r lle ac i’r union bwrpas: Gweinidogaeth Arloesol.

Mae inni stori o obaith i’w gyfleu a’i ddehongli i’r rhai hynny sydd ar hyn o bryd ‘oddi allan i waliau’ ein heglwysi. Bu fy nghyndeidiau’n gwasanaethu eglwys a fu’n meddiannu safle llawer mwy canolog mewn cymdeithas, felly mae ceisio gwasanaethu ‘ar y cyrion’ yn ymddangos yn dasg anodd tu hwnt. Ond mae’n her gyffrous ar y llaw arall, ac yn un sy’n gofyn creadigrwydd, dewrder a menter.

Y cysur ydy nad mentro wrth ein hunain fydden ni. Mae cyfeillgarwch a gwneud ffrindiau newydd yn llawenydd pur. Dwi wrth fy modd yn gweithio gyda, ac adeiladu timau, felly’n edrych ymlaen go iawn at adeiladu ein bywyd gyda’n gilydd wrth inni geisio ewyllys Duw a gwasanaethu’i bobl yn y presennol a thros y blynyddoedd sydd i ddod.”

Siôn Rhys Evans

Diacon a fydd yn gwasanaethu curadiaeth yn Ardal Weinidogaeth Llandudno

Yn dilyn magwraeth ar Ynys Môn, dechreuais i fy ngwaith o fewn bywyd yr Eglwys mewn plwyfi Anglicanaidd yng nghanol Llundain. Yn ddiweddarach fe wasanaethais fel aelod o dîm Cytûn, sefydliad ecwmenaidd cenedlaethol Cymru, cyn cael fy mhenodi yn rhan o dîm cydlynu cenedlaethol yr Eglwys Fethodistaidd ym Mhrydain. Yno, bues i’n gyfrifol am ddatblygiad gweinidogaethol, addysg ddiwinyddol a sawl prosiect isadeiledd arwyddocaol, yng nghyd-destun newid corfforaethol sylweddol. Dychwelais i Ogledd Cymru fel Ysgrifennydd yr Esgobaeth yn Esgobaeth Bangor ar ddiwedd 2013.

Dw i’n edrych ymlaen at yr anrhydedd o wasanaethu'r Eglwys a'r esgobaeth fel diacon dros y flwyddyn nesaf. Mae sawl math o wasanaethu a thystiolaethu Cristnogol. Braint a braw yw cael y cyfle i weinidogaethu yn y ffordd newydd hon o fewn yr esgobaeth, law yn llaw â chyfeillion lleyg ac ordeiniedig. Eu ffyddlondeb a'u creadigrwydd hwy sy’n ei gwneud hi’n amser mor gyffrous i fod yn rhan o'r Eglwys yn y fan hon ar hyn o bryd.

Stephen Rollins 

Diacon a fydd yn gwasanaethu curadiaeth yn Ardal Weinidogaeth Bro Ystumanner (Tywyn, Meirionnydd)

Cefais fy ngeni, fy magu a’m bedyddio yn Llundain, gan astudio Saesneg a Lladin ym Mhrifysgolion Southampton a Lerpwl. Bues i’n dysgu yn Folkestone a Buckingham cyn treulio pedair ar ddeg o flynyddoedd dramor yn Bermuda, Singapore a Gogledd Cyprus.

Yn ystod y blynyddoedd hynny, yn enwedig yng Nghyprus, synhwyrodd fy nghaplan lleol bod galwad posib imi i’r weinidogaeth ordeiniedig, felly fe ddechreuais astudio ddiwinyddiaeth trwy ddysgu o bell! Dychwelais i Brydain yn 2002 a diweddu yn Swydd Berkshire, lle bûm yn addysgu mewn colegau a gweithio fel caplan lleyg, yn ogystal â pharhau gyda’m hyfforddiant. Ymddeolais yn 2016 a symud i fyw i Ogledd Cymru.

Gydag anogaeth frwdfrydig gan fy nghlerigwyr lleol yn Nhywyn - Parch Richard Vroom, Parch Janet Fletcher ac yn fwy diweddar dan oruchwyliaeth y Parch Ddr Ruth Hansford - fe fues i’n gweithio gyda Bro Ystumanner fel Arweinydd Addoliad a Gweinidog Ewcharist, gan gymryd y Cymun Bendigaid at y rhai hynny sy’n methu mynychu eglwys.

Fe fu’r daith yn un hir i mi at Ordeiniad, ond dwi wedi derbyn llawer o anogaeth ar hyd y ffordd. Mae fy nyled i fy nheulu yn fwy nag y gallaf ei fynegi. Yn wir, wrth imi ddechrau fy ngweinidogaeth ordeiniedig, mae’r parchedig ofn, ynghyd â’r gorfoledd a deimlaf yn wyneb y fraint aruthrol hon wedi’i blethu gyda theimlad o ryddhad a diolchgarwch i gymaint o bobl.

Nick Webb

Diacon a fydd yn gwasanaethu curadiaeth yn Ardal Weinidogaeth Bro Cadwaladr (Gaerwen/Aberffraw)

Yn wreiddiol o Surrey, fe raddiais mewn Astudiaethau Beiblaidd ym Mhrifysgol Sheffield. Yn dilyn hynny, fe fues i’n rheolwr marchnata cyn gweithio gyda recriwtio ac yna dod yn hyfforddwr a galluogydd busnes hunangyflogedig i raglenni rheoli newid a datblygu arweinyddiaeth, gan weithio gyda chwmnïau ledled Ewrop a Chyfandiroedd America.

Fe fues i hefyd yn gweithio fel cerddor addoliad Cristnogol, cynhyrchydd celfyddydau creadigol a phregethwr lleyg gyda sawl eglwys annibynnol a’r Bedyddwyr yn Sheffield a Manceinion, a hefyd fel aelod bwrdd gyda Communitas International (Christian Associates gynt), mudiad cenhadol byd-eang yn ffocysu ar gymunedau secwlar, “ôl-Gristnogol”, dinesig yn bennaf.

Wedi ymddeol i Ynys Môn, roeddwn yn dal i deimlo galwad i weithio gyda phobl a mudiadau wrth iddyn nhw nodi, adeiladu a chynnal newidiadau cadarnhaol yn eu bywydau a dyma fi’n dechrau dilyn galwad i weinidogaethu fel diacon neilltuol gyda’r Eglwys yng Nghymru. Mae i ddiaconiaid neilltuol weinidogaeth o wasanaeth, yn gweithio gyda’r Esgob ac offeiriaid ac yn ffocysu’n bennaf ar y bwlch hwnnw sy’n drothwy rhwng yr eglwys a’r byd.

Bellach mi rydw i’n edrych ymlaen at ddatblygu fy ngalwad fel diacon neilltuol yn eglwysi a chymunedau Ardal Weinidogaeth Bro Cadwaladr. Mae’n her sylweddol, yn ôl siars yr Esgob i fod yn “gennad teyrnas Crist, gan gyhoeddi’r efengyl mewn gair a gweithred”, ond serch hynny, yn galonogol wrth ystyried disgwyliadau gwasanaethu’r gymuned leol a dirnad sut i helpu pobl i ymateb i alwad Duw mewn ffyrdd ffres a chyffrous.

Simon Freeman

Offeiriad a fydd yn parhau i wasanaethu ei guradiaeth yn Ardal Weinidogaeth Bro Gwydyr (Betws y Coed)

Dwi wedi mwynhau’n fawr fy mlwyddyn fel diacon, yn gwasanaethu pobl Bro Gwydyr. Ddysgais i gymaint gan fy mheriglor hyfforddiant - Parch Stuart Elliott - yn ogystal â phobl yr Ardal Weinidogaeth, ynghylch gwasanaethu cymuned ac addoliad a hefyd cynnal yr Ardal Weinidogaeth o ddydd i ddydd. Yn benodol, cefais fwynhad o ochr fugeiliol ffy ngweinidogaeth ddiaconaidd.

Edrychaf ymlaen at ddatblygu cam nesaf fy ngalwad fel offeiriad. Fe fyddaf yn dyfnhau fy ngwybodaeth, ymrwymiad a’m gwasanaeth i Dduw, yr Eglwys a’r bobl rydw i’n eu gwasanaethu, wrth imi ddechrau cyflawni'r hyn y credaf y ces i fy ngalw i’w wneud.