O Macclesfield i Gaergybi: Ficer ac Arweinydd Ardal Weinidogaeth newydd i Fro Cybi

Mae Esgob Bangor - y Gwir Barchedig Andy John - yn falch o gyhoeddi penodi’r Parchedig Robert Wardle fel Ficer ac Arweinydd Ardal Weinidogaeth Bro Cybi, sy’n gwasanaethu cymunedau Ynys Gybi - Caergybi, Bae Trearddur a Rhoscolyn - ar Ynys Môn. Mae Rob yn olynu’r Hybarch Andy Herrick, sy’n dod yn Ficer Cynorthwyol yn nhîm gweinidogaeth Bro Cybi, a fydd yn caniatáu iddo ganolbwyntio ei weinidogaeth fel Archddiacon Môn.

Mae Rob, ar hyn o bryd, yn aelod o dîm clerigwyr Gweinidogaeth Tîm Macclesfield.

Ganwyd Rob ym Manceinion, gan adael yr ysgol yn 16 oed i weithio yn y diwydiant adeiladu, ac yno y bu’n hunangyflogedig am y 31 mlynedd nesaf. Dechreuodd Rob ymddiddori mewn gwaith ieuenctid pan dyfodd ei blant ei hun i’w harddegau, cyfnod a oedd yn digwydd cydredeg â’i ddatblygiad yntau o ran ei ymrwymiad i’r ffydd.

Yn 2004 fe fentrodd gwneud cais i astudio yng Ngholeg Diwinyddol St John’s yn Nottingham, gan lwyddo ennill gradd dosbarth cyntaf mewn gwaith ieuenctid a chymunedol a diwinyddiaeth gymhwysol, gan sylweddoli fod ganddo’r gallu i wneud mwy na dim ond gwaith llaw!

Yn 2005, Rob oedd Cyfarwyddwr sefydlol rhaglen Ieuenctid a Chymunedol Cre8, sydd wedi ei chydnabod yn lleol ac yn genedlaethol am ei waith eang gyda phobl ifanc ac oedolion ar gyrion cymdeithas. Hyn fu’n graidd i’w weinidogaeth am y bymtheng mlynedd ddiwethaf.

Cyflwynodd Rob ei hun i’w ordeinio ac ymgymryd â hyfforddiant diwinyddol pellach yng Ngholeg King’s yn Llundain. Hyd at yn ddiweddar, bu Rob yn byw a gweithio o fewn 14 milltir i ardal ei fagwraeth, er bod ganddo gysylltiad hir ag Ynys Môn a Gogledd Cymru, gan fod ganddo deulu’n byw a gweithio yma ers blynyddoedd lawer.

Wrth edrych ymlaen at ei rôl newydd, meddai Robert, “Dwi’n teimlo wedi fy mendithio’n fawr o feddwl am y rhagolygon o weithio gyda phawb yn Ardal Weinidogaeth Bro Cybi. Fedra i ddim aros i ddechrau dod i nabod y bobl, i wasanaethu gyda nhw a gweld newid yn digwydd i bobl hyfryd Ynys Gybi.”

Dywedodd Archddiacon Rob, yr Hybarch Ian Bishop, Archddiacon Macclesfield, "Ordeiniwyd Rob yng Nghadeirlan Caer yn 2011 ac roedd ei weinidogaeth ym Macclesfield yn un anrhydeddus. Gweithiodd ar Stâd Moss am fwy na hynny ac fel Cyfarwyddwr Cre8, fe ddaeth â chreadigrwydd a gobaith mawr i stad dai drefol heriol. Mae ei dosturi a’i angerdd dros gyfiawnder cymdeithasol wedi bod yn gymhelliad i sbarduno rhywfaint o’r gwaith mwyaf dylanwadol ac ysbrydoledig a wnaed yn Esgobaeth Caer ac fe fydd pawn yn gweld ei golli’n fawr."

Yn ôl Esgob Bangor - y Gwir Barchedig Andy John, "Mae hi’n amlwg y bydd Rob a’i ddoniau helaeth yn gaffaeliad mawr i’w weinidogaeth newydd fel arweinydd ym Mro Cybi. Edrychaf ymlaen at weld sut y bydd Duw’n gallu gwneud defnydd o greadigrwydd Rob i ddod â’r Newyddion Da i holl bobl Ynys Cybi. Rydw i hefyd yn ddiolchgar iawn i’r Archddiacon Andy Herrick am ei ostyngeiddrwydd wrth gydnabod yr angen am y newid hwn, sy’n un cadarnhaol i weinidogaeth ein Hesgobaeth ar Ynys Môn ac ym Mro Cybi. Cofiwch weddïo dros Rob, ei deulu, y tîm gweinidogaeth a phobl Bro Cybi, Cre8 a Thîm Gweinidogaeth Macclesfield.’

Y disgwyl ydy y bydd Rob yn symud i Fro Cybi yn yr hydref, pan gynhelir gwasanaeth arbennig ar ddechrau ei weinidogaeth newydd yno.