Mae’n bleser gan Esgob Bangor gyhoeddi penodiad y Parchg Richard Wood yn Ficer ac Arweinydd Ardal Weinidogaeth ar gyfer Ardal Weinidogaeth Bro Tysilio, sy’n gwasanaethu cymunedau ardaloedd Porthaethwy, Pentraeth a Benllech ar Ynys Môn.

Ar hyn o bryd Richard yw Arweinydd Ardal y Weinidogaeth ym Mro Madryn ym Mhenrhyn Llŷn. Magwyd Richard yng Nghaerloyw. Daeth yn Gristion trwy ddylanwad gweinidogaeth Eglwys Bedyddwyr lleol y bu’n ei mynychu gyda’i fam. Symudodd i Gymru i astudio Daearyddiaeth ym Mhrifysgol Aberystwyth, yno croesawyd ef i Eglwys Sant Mihangel lle datblygodd ei ffydd yn bellach. Fel rhan o’i ymchwil personol i’r ymdeimlad posib o ymuno â’r weinidogaeth ordeiniedig, cymerodd flwyddyn allan o’i astudiaethau i fod yn rhan o gwrs disgyblaeth a gynhaliwyd gan Eglwys Soul Survivor yn Watford.

Tra yn Aberystwyth cyfarfu Richard â’i wraig Naomi. Cafodd ei ordeinio yn 2008, cyn gwasanaethu fel Curad yn Aberaeron ac yna’n Ficer Tîm yn Llanelli. Bu iddo symud i Esgobaeth Bangor, a Bro Madryn yn 2013. Mae pob un o’r lleoliadau hyn wedi ei alluogi i adeiladu a chynyddu ei allu fel dysgwr a siaradwr Cymraeg. Mae Richard wedi bod yn rhan o sawl agwedd ar fywyd ehangach yr Eglwys yng Nghymru ac mae ganddo ddiddordeb gwirioneddol ar weld y pwyslais mewn Efengylu yn cael ei gynyddu.

Mae Richard a Naomi wedi mabwysiadu dau blentyn, Ethan a Sophia, sydd wedi ychwanegu llawer o lawenydd-ynghyd â blinder i’w bywydau!! Mae Richard yn mwynhau pêl-droed a chriced, yn canu’r gitâr ac yn hoff o ‘ffidlan’ gyda theclynnau a thechnoleg. Yn ddiweddar mae hefyd wedi dechrau rhedeg fel rhan o her a osodwyd iddo gan Naomi.

Wrth edrych ymlaen at ei rôl newydd, dywedodd Richard:

Mae wedi bod yn fraint ac yn fendith gwasanaethu a gweinidogaethu gyda phobl Bro Madryn dros y saith mlynedd a hanner diwethaf. Rydym ni wedi gweld Duw yn gwneud pethau rhyfeddol ynom ni a thrwom ni. Felly mae yna dristwch wrth i ni gydnabod mai dyma’r amser iawn i ni fel teulu symud ymlaen. Rwy’n llawn gobaith y bydd Bro Madryn, mewn ffydd a chariad, yn parhau i rannu Newyddion Da Iesu yn ei chymunedau.

Mae cael bod yn rhan o’r eglwys ym Mro Tysilio yn gyffrous iawn. Mae’r cariad a’r gofal a gynigiwyd trwy’r Canon Angela ac eraill yn ystod y blynyddoedd diwethaf yn ein rhoi mewn sefyllfa dda, a gyda nifer gyfleoedd. Bydd yna heriau, ond gallwn fod yn gwbl hyderus yn naioni a ffyddlondeb Duw.

Dywedodd Archddiacon Ynys Môn, Andy Herrick:

Rwyf yn edrych ymlaen i gael Richard, ynghyd â Naomi, Ethan a Sophia, ar Ynys Môn. Mae Richard yn olynydd naturiol i’r Canon Angela. Mae Richard yn dod â chalon fugeiliol gref, y gallu i arwain addoliad yn greadigol, a rhagolwg sy’n canolbwyntio ar genhadaeth a fydd yn dod â thwf a bywiogrwydd pellach i Fro Tysilio.

Hefyd wrth groesau’r apwyntiad, dywedodd Esgob Bangor, Andy John:

Rwy’n falch iawn o gyhoeddi penodiad y Parchedig Richard Wood i’r rôl hon. Bydd colled ar ôl Richard ym Mro Madryn, ond edrychaf ymlaen at ei groesawu ef a’i deulu i Fro Tysilio. Daw Richard â chyfoeth o brofiad, ac mae wedi bod yn gaffaeliad i’r esgobaeth ers iddo gyrraedd yn 2013.

Disgwylir y bydd Richard yn dechrau ei weinidogaeth newydd ym mis Mehefin. Cyhoeddir trefniadau ar gyfer ei drwyddedu yn agosach at yr amser. Gweddïwch dros Richard, ei deulu a phobl Bro Tysilio a Bro Madryn.