Dros Ŵyl Bedr eleni yng Nghadeirlan Deiniol Sant ym Mangor, cafodd 14 o bobl ymroddedig, dawnus eu hordeinio neu eu trwyddedu i weinidogaethu. 

Fe’u gelwir i “adeiladu corff Crist fel y cyrhaeddwn oll hyd at yr undod a berthyn i’r ffydd ac i adnabyddiaeth o Fab Duw” (Effesiaid 4).

Dyna’u tasg ar y cyd – ond mae gan bob un hefyd eu straeon personol eu hunain am alwad Duw ar eu bywydau.

Yma, cawn sgwrs â Roz am ei galwedigaeth fel Gweinidog Teulu.

Dywedwch ychydig wrtha’i amdanoch eich hun.

Y drafferth yw, pan ydych chi'n hen faint o amser sydd gennych chi?! Dwi wedi bod yn briod ers bron i 48 mlynedd ac rydym yn dal i siarad â’n gilydd. Rwy'n mwynhau pobi heblaw ei fod yn eich gwneud chi’n dew. Rwy’n hoff iawn o nofio ac roeddwn yn gweld colli hynny pan gaewyd popeth. Dwi ychydig yn rhy hen bellach i nofio yn y môr ond, os ydi hi’n dawel yn y pwll, dwi'n mwynhau dweud fy ngweddïau wrth nofio. Dwi hefyd yn cerdded llawer. Mae rhai o’r teithiau cerdded gorau wedi bod efo ffrindiau pan oedd hi’n pistyllio bwrw. Dwi wastad wedi llowcio llyfrau. Mae’r hyn mae pobl yn ei wneud a sut maen nhw’n byw o ddiddordeb mawr i mi. Dwi’n Llywodraethwr yn Ysgol San Siôr yma yn Llandudno. Dwi hefyd yn un o Ymwelwyr yr Esgob ar gyfer Esgobaeth Llanelwy. Mae’r ddwy swydd yn hyfryd gan fy mod yn dal i gael gweld y plant.

Pa un ydi’ch hoff fisgeden?

Teisen Berffro Gartref Mary Berry.

Lle dechreuodd y cyfan i chi?

Dwi’n Gristion gydol oes. Pan oeddwn tua chwe blwydd oed penderfynais fy mod am fod â Iesu yn fy mywyd. Mi ges i fy magu yn yr Eglwys Ddiwygiedig Unedig ac yno wnes i aros nes i mi briodi. Roeddwn i wastad am fod yn athrawes a bues i’n arweinydd Ysgol Sul er pan ôn i tua deng mlwydd oed. Tra oeddwn yng Ngholeg West Hill yn Birmingham cefais yr anffawd o gwrdd â rhywun ar y cwrs gwaith ieuenctid. Dyna Mike, fy ngŵr, a roeddwn i’n gweithio efo fo ac roedd yn wych. Pan symudodd i Ganolfan Ieuenctid Cryw a’r Cylch, roedd y gwaith ieuenctid yno’n enfawr gyda dros fil o bobl ifanc yr wythnos. Roeddwn i’n gweithio yn yr ysgol drws nesaf. Roeddwn i’n gallu gwneud fy ngwaith a mynd i’r clwb ar ôl hynny a dod i adnabod y bobl ifanc.

Dywedwch wrtha’i am yr Eglwys Iau yn Llandudno. Sut ddigwyddodd hynny?

Roedden ni’n arfer mynd â’n hŵyr i’r eglwys efo ni a roedden ni’n mynychu’r Ysgol Sul efo’n gilydd. Yn y diwedd, roeddwn i’n arwain y grŵp ond roeddwn bob amser yn teimlo bod yr elfen o addoliad ar goll, roedd yn bob amser gymaint o frys a gallai’r clerigion fyth ddod i adnabod y teuluoedd. Pan ddaeth y Ficer newydd penderfynwyd rhoi cynnig ar Eglwys Iau. Daeth y teuluoedd ac addoli ynghyd - fel teulu. Roedd bob amser yn gysylltiedig â’r litwrgi ac roedd yn hynod effeithiol. Mi wnaethon ni ei symud ar-lein yn ystod y pandemig ac mae wedi bod yn llwyddiannus iawn gyda mwy o bobl ar-lein nag o oedd gynnon ni wyneb yn wyneb.

Beth ddaeth â chi i’r teulu Anglicanaidd?

Mae hynny’n gwestiwn diddorol. Pan wnes i gyfarfod a’r gŵr, roedd yn aelod ymroddedig o’r Eglwys Gatholig Rufeinig ac yn hyfforddi i fod yn weithiwr ieuenctid proffesiynol. Ar ôl priodi yn yr Eglwys Ddiwygiedig Unedig ond gyda phriodas Gatholig Rufeinig, mi wnaethon drio eglwysi anghydffurfiol a rhai Catholig ond roedden ni’n ei chael yn anodd. Yn y diwedd mi fues i’n dysgu plant ficer Cryw ac roeddwn yn hoff o’r teulu. Mi ddes i â’m merch hynaf i gael ei bedyddio yno a roedden ni’n ei hoffi! Yna mi symudon ni i dref newydd Peterborough a mynd i’r eglwys unedig ac fel mae’n digwydd ficer Anglicanaidd oedd yno ar y pryd ac roedd yr eglwys yn wych. A dyna ni’n Anglicaniaid!

Beth mae cael eich trwyddedu yn ei olygu i chi?

Mae’n gadarnhad o bopeth rwyf wedi’i wneud drwy gydol fy mywyd fel oedolyn. Mae gwneud y cwrs, ac yn enwedig bod â Chyfarwyddwr Ysbrydol, wedi herio fy mywyd gweddi ac wedi fy helpu i wneud yr hyn dwi’n ei wneud yn well. Mae’n fwy o gyfrifoldeb.

Beth mae eich ffydd yn ei olygu i chi? Sut beth fyddai bod heb ffydd?

Fyddwn i ddim yma. Mae fy ffydd yn golygu popeth i mi. Dyna’r ‘yno’, dyna’r gwybod yna. Mae mor arbennig a phwysig gwybod y bydd Duw yn eich helpu. Dydw i’n ddim byd heb Dduw.

Pe byddai rhywun yn dweud wrthych eu bod am gynnig mwy, beth allech chi ddweud wrthyn nhw?

Ewch amdani ond peidiwch â mynd amdani’n fyrbwyll. Gwrandewch ar yr hyn mae pobl eraill a’r Hollalluog yn ei ddweud. Os mai dyma’r peth iawn, mi gewch chi’r nerth i’w gyflawni.