Oddi wrth yr Esgob

Mae Cadeirlan Deiniol Sant ac Ardal Weinidogaeth Bro Deiniol yn greiddiol i’n hesgobaeth. Y gymuned o Gristnogion o gylch Deiniol Sant roddodd enedigaeth i ddinas Bangor, ac, fel esgobaeth, tua’r Gadeirlan a’r ddinas yr edrychwn ni am batrwm o addoliad angerddol, gweinidogaeth fywiog a gwasanaeth cariadus.

Ar ôl diolch i Kathy Jones am ei gweinidogaeth yn ein plith fel Deon dros y pum mlynedd diwethaf, rhaid nawr edrych yn bwrpasol i’r dyfodol. Mae’r heriau sy’n ein hwynebu, yn y Gadeirlan a ledled eglwysi’r ddinas, yn finiog ac yn glir, ond felly hefyd mae’r cyfleoedd ar gyfer cenhadaeth a’r angen am dystiolaethu Cristnogol ffyddlon, creadigol.

Rwyf wedi adolygu sefyllfa’r Gadeirlan a Bro Deiniol gyda fy nghydweithwyr dros yr wythnosau diwethaf, ac wedi ystyried argymhellion Gofwy o’r Gadeirlan dan arweiniad Archddiacon Bangor yn gynharach eleni. Yng ngoleuni’r ddirnadaeth hon, rwyf wedi penderfynu gohirio penodi Deon newydd am gyfnod sylweddol o amser.

Fodd bynnag, fel y gallwn wneud cynnydd sylweddol a chwim ym Mangor, rwyf heddiw yn cyhoeddi nifer o benodiadau sylweddol i ddarparu arweinyddiaeth drawsnewidiol i’r Gadeirlan a Bro Deiniol ar gyfer y blynyddoedd a ddaw.

Ymysg y penodiadau hyn y mae:

• Is-Ddeon newydd i arwain gweinidogaeth a chenhadaeth y Gadeirlan ac i weithredu fel y prif offeiriad yn Ardal Weinidogaeth Bro Deiniol
• Cyfarwyddwr Cerdd newydd, a fydd â rôl hanfodol yn ail-fywiog addoliad y Gadeirlan
• Gweinidog Teulu newydd i wella gweinidogaeth y Gadeirlan a’r Ardal Weinidogaeth ym mysg plant, teuluoedd ac ysgolion
• aelodau newydd o’r Cabidwl i oruchwylio bywyd y Gadeirlan, gan gynnwys Canoniaid newydd o’r tu mewn a thu hwnt i’n hesgobaeth, ac, am y tro cyntaf, dau Ganon Lleyg

Yn eu cyfanrwydd, mae’r penodiadau hyn yn fuddsoddiad sylweddol o amser, dawn ac adnodd yng Nghadeirlan Deiniol Sant. Rwy’n falch iawn bod gennym bobl ddawnus o fewn cyrraedd inni, a fydd yn gweithio gyda ni i adeiladu gweinidogaeth feunyddiol y Gadeirlan a’r Ardal Weinidogaeth i’r ddinas a’r esgobaeth mewn ffyrdd ffyddlon a chreadigol. Rwyf hefyd wrth fy modd bod cymaint o gyfeillion wedi derbyn fy ngwahoddiad i ymuno â’r Cabidwl, ac felly i chwarae eu rhan wrth lunio bywyd y Gadeirlan i’r hir-dymor, gan arwain y newidiadau sylweddol y mae angen iddynt ddigwydd trwy eu craffu a’u goruchwyliaeth ddoeth.

Ymunwch â mi mewn gweddi dros y rhai yr wyf yn cyhoeddi eu penodiadau heddiw, a thros genhadaeth a gweinidogaeth yr Eglwys yn ein Cadeirlan a ledled dinas Bangor.

Hollalluog Dduw, a ysbrydolaist dy esgob Deiniol i gasglu o’i gwmpas gymuned o Gristnogion i gyd-fyw bywyd cytun; caniatâ i ni, sy’n anrhydeddu’r cof amdano, weithio i atgyfnerthu teulu dy Eglwys mewn ffydd, gobaith a chariad; trwy Iesu Grist ein Gwaredwr. Amen.

Yn bur iawn,

Y Gwir Barchg Andy John
Esgob Bangor
Y Nawfed Sul wedi’r Drindod
1 Awst 2021

Is-Ddeon a Chanon Drysorydd newydd

Mae’r Esgob wedi penodi’r Parchg Siôn Rhys Evans yn Is-Ddeon. Bydd Siôn felly’n gweithredu yn lle’r Deon yn y Gadeirlan, ac yn arwain Ardal Weinidogaeth Bro Deiniol. Bydd yn meddiannu sedd y Canon Drysorydd yn y Cabidwl.

Magwyd Siôn ar Ynys Môn, ac mae wedi gweithio i’r Eglwys yn Llundain, Caerdydd a gogledd Cymru, gan wasanaethu nifer o blwyfi Anglicanaidd yn Llundain, Cytûn fel Prif Weithredwr Cynorthwyol, a’r Eglwys Fethodistaidd ym Mhrydain fel ei Chyfarwyddwr Gweinidogaeth a Dysg. Mae wedi bod yn Ysgrifennydd yr Esgobaeth ym Mangor ers 2014 ac, ers 2019, mae wedi gwasanaethu fel Curad yn Ardal Weinidogaeth Bro Tudno.

Fel Is-Ddeon, bydd Siôn yn gwasanaethu fel y prif offeiriad yn y Gadeirlan a’r Ardal Weinidogaeth, gan gadeirio cyfarfodydd y Cabidwl, rheoli staff y Gadeirlan, a gweithio’n agos gydag aelodau presennol y tîm gweinidogaeth: Canon Tracy Jones (Canon y Bywyd Cynulleidfaol), Canon Angela Williams (y Canon Emeritws), ac Elma Taylor (Darllenydd).

Er mwyn galluogi Siôn i wasanaethu fel Is-Ddeon, bydd yn cael ei secondio am hanner ei amser o’i rôl bresennol fel Ysgrifennydd yr Esgobaeth, a bydd yn dwyn ei weinidogaeth offeiriadol ym Mro Tudno i ben ym mis Medi.

Wrth sôn am ei rôl newydd, dywedodd Siôn:

“Cefais y fraint o dreulio 20 mlynedd yn gweithio i’r Eglwys mewn nifer o wahanol rolau, wyth o’r blynyddoedd hynny yn Esgobaeth Bangor, ac rwy’n falch o allu dwyn y blynyddoedd hynny o brofiad i’r rôl newydd hon. Rwyf yr un mor ymwybodol fy mod wedi f’ordeinio’n gymharol ddiweddar, ac fy mod yn etifeddu gofal o’r Gadeirlan oddi wrth Ddeoniaid yr wyf wedi’u hadnabod – Trevor Evans, Alun Hawkins, Sue Jones a Kathy Jones – yr oeddent oll yn meddu ar brofiad offeiriadol dwfn. Felly, rwy’n mynd i’r afael â’r alwad hon yn wylaidd, ac yn ymwybodol iawn o ymddiriedaeth yr Esgob ynof.

Nid yw’r cerrig milltir personol hyn yn ddim o’u cymharu â’r ffaith y bydd Cadeirlan Deiniol Sant, yn 2025, yn dathlu mileniwm a hanner ers dyfodiad Deiniol i’r lle hwn i sefydlu ei “lan” ac i adeiladu o’i gwmpas ei wrychyn plethwaith, y “bangor” gwreiddiol sy’n rhoi i’r ddinas ei henw. Mae llawer i’w wneud – i wella adeilad y Gadeirlan, i atgyfnerthu ein haddoliad, ac i adfywio ein cenhadaeth a’n tystiolaeth i bob rhan o’r ddinas a’r brifysgol – os yr ydym am ddathlu’r pen-blwydd hwnnw, mewn ychydig dros dair blynedd, yn hyderus a’n llawen.

Ac, wrth gwrs, mae ein cerrig milltir ni oll yn simsan o’u gweld yng ngoleuni’r Newydd Da tragwyddol y cawn ein galw i’w gyhoeddi o’r lle hwn – y ffydd, y gobaith a’r cariad a erys. Mae’r croeso cynnes a gefais eisoes gan Canon Tracy Jones, Canon Angela Williams ac Elma Taylor wedi fy nghalonogi, ac edrychaf ymlaen yn awr, gyda nhw, at gofleidio’r her sylfaenol o gyhoeddi’r Newydd Da tragwyddol hwnnw, ochr yn ochr â gweddill staff y Gadeirlan, holl gynulleidfaoedd Bro Deiniol, a Chabidwl y Gadeirlan. Gweddïwch drostyn nhw ac throsof finnau dros y misoedd a ddaw.”

Er mwyn hwyluso secondiad Siôn o’i rôl fel Ysgrifennydd yr Esgobaeth, a sicrhau parhad arweinyddiaeth o fewn Tîm Deiniol, tîm canolog yr esgobaeth, bydd dau o gydweithwyr Siôn yn y tîm yn ysgwyddo cyfrifoldebau newydd. Bydd Owain Prichard, fel Cyfarwyddwr Systemau a Gweithrediadau, yn arwain wrth gydlynu a rheoli swyddogaethau eiddo, cyllid a gweinyddol Tîm Deiniol. Bydd Becks Davie-Tettmar, fel Cyfarwyddwr Prosiectau a Rhaglenni, yn arwain wrth gydlynu a rheoli pob agwedd arall ar waith y tîm, sef y portffolios Meithrin Disgyblion a Galwedigaethau, Addysg ac Ymgysylltu, a Llan.

Wrth sôn am y newidiadau sydd o’n blaenau, dywedodd Owain a Becks:

“Rydym yn edrych ymlaen at gydlynu’r gefnogaeth a gynigiwn o Dîm Deiniol i genhadaeth a gweinidogaeth ym mhob cwr o’r esgobaeth. Mae cymaint o fynegiadau o obaith yn dod i’r amlwg mewn llawer o leoedd yng nghanol yr heriau niferus yr ydym i gyd yn eu hwynebu ar hyn o bryd, a byddwn ni a’n cydweithwyr yn Nhîm Deiniol yn gweithio’n galed i fod law yn llaw ag Ardaloedd Gweinidogaeth yn y tymor a ddaw.”

Cyfarwyddwr Cerdd newydd yn ymuno â'r Gadeirlan

Joe Cooper fydd Cyfarwyddwr Cerdd nesaf y Gadeirlan. Dechreuodd Joe ei hyfforddiant cerddorol yng nghôr Eglwys Golegol Pedr Sant, Wolverhampton lle’r oedd hefyd yn Ysgolhaig Organ. Mae wedi astudio’r organ gyda Henry Fairs a Daniel Moult ac arwain gyda Paul Spicer a Jeffery Skidmore. Mae gan Joe radd Meistr o Goleg Brenhinol Cerdd Birmingham, ac mae’n dderbynnydd Gwobr Wolfenden am arwain. Mae Joe, sydd eisoes wedi dechrau dysgu Cymraeg, yn byw gyda’i bartner Simon, sydd hefyd yn gerddor hyfforddedig, ac mae’r ddau ohonyn nhw’n edrych ymlaen yn fawr at symud i Fangor a dod yn rhan o deulu’r Gadeirlan. Bydd Joe yn gweithio ochr yn ochr ag Organydd y Gadeirlan, Martin Brown, a chyn bo hir bydd yn edrych i recriwtio Ysgolheigion Corawl ac aelodau newydd i adnewyddu ac ehangu gweinidogaeth gorawl y Gadeirlan.

Wrth sôn am ei benodiad, dywedodd Joe:

“Rwy’n edrych ymlaen at ymuno â chi yng Nghadeirlan Deiniol Sant o fis Medi. Rydyn ni i gyd wedi byw trwy gyfnod o bryder ac ansicrwydd, ond wrth i ni gamu o gysgod y pandemig rwy’n gobeithio y gallwn ni adeiladu gyda phositifrwydd.

Rwyf wedi bod yn Gyfarwyddwr Cerdd yn Eglwys Sant Alphege, Solihull am yr wyth mlynedd diwethaf, lle rwyf wedi trochi yn y traddodiad corawl, gan wneud yr adran gerdd yn offeryn cenhadol sy’n cyffwrdd â bywydau pobl ledled y fwrdeistref. Fy ngobaith ym Mangor yw ymgysylltu â’r ddinas a’r esgobaeth gyda’r un dychymyg ac ymrwymiad.”

Apwyntio Gweinidog Teulu newydd

Mae Naomi Wood yn fam i Ethan, sy’n bump, Sophia, sy’n dair, ac mae’n briod â Richard. Mae hi wedi bod yn ymwneud â gweinidogaeth plant eglwysig lleol, esgobaethol a thaleithiol ers graddio fel athrawes ysgol gynradd yn 2004. Mae Naomi yn siaradwr Cymraeg rhugl, wrth ei bodd yn bod yn greadigol, ac yn angerddol am ddweud wrth blant a’u teuluoedd am Iesu Grist mewn ffyrdd hygyrch.

Ar hyn o bryd mae Naomi yn gwasanaethu fel Swyddog Gweinidogaeth Plant a Theuluoedd esgobaethol, a bydd yn cael ei secondio i wasanaethu’r Gadeirlan a’r Ardal Weinidogaeth am ddau ddiwrnod a hanner yr wythnos.