Mae David yn ymuno â ni yn barod i feithrin yr egin werdd a welsom dros y blynyddoedd diwethaf, yn nodedig felly wrth inni drwyddedu cymaint o Weinidogion Trwyddedig Lleyg newydd dros Ŵyl Bedr y llynedd, ac yn ein gweinidogaethau arloesi llewyrchus. Ond mae hefyd yn adnabod, fel minnau, yr heriau sy’n ein hwynebu i godi cenhedlaeth newydd o alwedigaethau i wasanaethu Crist a'r Eglwys. Edrychaf ymlaen at ei groesawu yn ôl i Fangor a’r Gadeirlan, lle magwyd galwedigaeth David ei hun.

Andrew John, Archesgob Cymru

Bydd rôl newydd David yn ei weld yn gweithio ochr yn ochr â’n Harweinwyr Ardaloedd Gweinidogaeth a’n harloeswyr i alluogi datblygiad gweinidogaethau newydd, yn ogystal â chefnogi’r mentrau galwedigaethol sy’n deillio o brosiect Llan a gweinidogaeth myfyrwyr y Gadeirlan.

Bydd David hefyd yn goruchwylio ein myfyrwyr gweinidogol a’n curadiaid, ein hymwneud ag Athrofa Padarn Sant, ein rhaglen datblygu gweinidogaethol parhaus, a’n cyfarfodydd Grŵp Cadfan.

Yn hyn oll, bydd David yn gweithio’n agos gyda’r archddiaconiaid a chyda chydweithwyr mewn esgobaethau eraill, yn enwedig i’r dwyrain yn Llanelwy wrth i ni geisio cydweithio’n agosach ar draws Gogledd Cymru.

Bydd David wedi’i leoli ym Mangor, ochr yn ochr ag aelodau eraill Tîm Deiniol, a gyda chartref ysbrydol a chanolfan ar gyfer ei weinidogaeth offeiriadol ei hun yn y Gadeirlan.

Mae’r Parchg David Morris yn Gyfarwyddwr Ordinandiaid gwerthfawr iawn ac yn gydweithiwr yn Esgobaeth Llandaf, lle mae hefyd wedi bod yn offeiriad plwyf rhagorol mewn lleoliadau trefol a gwledig. Mae’n ddrwg iawn gennym golli David ond gwyddom y bydd ein cyfeillion yn Esgobaeth Bangor yn mwynhau’n aruthrol ei agwedd gyson a doeth at faterion y weinidogaeth a’i synnwyr digrifwch direidus. Anfonwn ef i’r Gogledd gyda’n bendithion a’n diolch yn fawr iawn am bopeth y mae wedi’i gyflawni a’i gyfeillgarwch i gynifer.

June Osborne, Esgob Llandaf

Bydd yn bleser croesawu David yn ôl i ddinas Bangor. Mae’r Canon Tracy Jones yn adnabod David yn dda o’i gwasanaeth fel Detholwr Taleithiol, ac mae’n ymuno â mi i groesawu penodiad David i ymuno â thîm gweinidogaethu’r Gadeirlan. Rydym ni, ynghyd â’m cydweithwyr o fewn Tîm Deiniol, yn edrych ymlaen at ei gefnogi yn ei weinidogaeth ledled ein hesgobaeth.

Siôn Rhys Evans, Is-Ddeon ac Ysgrifennydd yr Esgobaeth