Mae’n bleser gan Archesgob Cymru gyhoeddi bod y Parchg James Tout wedi’i benodi’n Gaplan yr Archesgob.

Swyddogaeth newydd James

Yn ogystal â gweddïo gydag, ac ar ran, Archesgob Cymru, bydd Caplan yr Archesgob yn adnoddai a chefnogi gweinidogaeth yr Archesgob. Bydd James yn gyfrifol cyfathrebu effeithiol yn digwydd ar draws a thu hwnt i’r dalaith gyda chyrff lluosog, ac yn cynorthwyo’r Archesgob yn ei baratoadau ar gyfer ymrwymiadau cyhoeddus.

Wrth siarad am y penodiad dywed yr Archesgob,

Rwyf wedi cael y pleser o gael James yn gydweithiwr o fewn Esgobaeth Bangor, lle bu’n gyfarwyddwr ein prosiect efengylu ‘Llan’. Bydd ei galon am genhadaeth ac efengylu yn gaffaeliad gwerthfawr yn ei rôl fel fy Nghaplan.

Galwedigaeth a gweinidogaeth James

Symudodd James, sy’n wreiddiol o Rydaman yn Sir Gâr, i ganolbarth Cymru yn 2010 ar ôl graddio o Brifysgol Caerdydd a Phrifysgol Fetropolitan Abertawe i ymgymryd â swydd fel athro Cemeg yn Ysgol Uwchradd Llanfyllin. Symudodd wedyn i The Marches School yng Nghroesoswallt lle gorffennodd ei yrfa addysgu fel Cyfarwyddwr Gwyddoniaeth a Phennaeth Cynorthwyol Cyswllt yn 2020.

Hyfforddodd James ar gyfer y weinidogaeth ordeiniedig yn rhan amser trwy Athrofa Padarn Sant ac fe’i hordeiniwyd gan Esgob Gregory yn 2019, gan wasanaethu ei deitl fel Curad Cynorthwyol yn weinidog di-dâl yn Eglwys y Plwyf San Silyn, Wrecsam.

Mae James, a'i fab Aled, yn frwd dros chwaraeon moduro ac unrhyw beth sy'n ymwneud â cheir. Maent hefyd yn mwynhau treulio amser gyda'u gilydd yn creu ac adeiladu gyda Lego. Mae amser gyda theulu a ffrindiau yn hynod o arwyddocaol i James – yn enwedig os yw bwyd yn gysylltiedig!

Dywed James,

Rwyf wrth fy modd yn ymgymryd â’r rôl newydd hon fel Caplan i’r Archesgob. Mae wedi bod yn fraint fawr cael arwain prosiect efengylu Llan am y ddwy flynedd ddiwethaf sy’n chwilio am ffyrdd newydd o ymgysylltu â phobl er mwyn iddynt ddod i gysylltiad â Duw a chael eu trawsnewid. Rwy’n falch iawn o allu parhau â gweinidogaeth o fewn Esgobaeth Bangor ac yn awr yn daleithiol hefyd. Mae’r cyfle i weithio gyda’r Archesgob, tîm hŷn Esgobaeth Bangor, yn ogystal â Chorff y Cynrychiolwyr ar adeg mor gyffrous o newid yn wefreiddiol.

Prosiect Llan

Mae James wedi cyfarwyddo prosiect efengylu ‘Llan’ Esgobaeth Bangor am y 2 flynedd ddiwethaf. Mae’r prosiect hwn wedi derbyn cefnogaeth gan Gronfa Efengylu’r Eglwys yng Nghymru ac mae’n driphlyg: Pererindod, Iaith a Menter Gymdeithasol.

Gan weithio ochr yn ochr â phartneriaid creadigol a chynulleidfaoedd lleol mae prosiect Llan yn ceisio ailddehongli ac ad-drefnu chwe eglwys bererindod fawr o fewn yr esgobaeth, gan wella eu gallu i adrodd stori ffydd yn y mannau hyn. Bydd y rhain yn dod yn lleoedd o groeso a noddfa i bererinion gyda'r prif nod o rannu'r Efengyl. O dan arweiniad James mae tîm Llan wedi bod yn datblygu llwybrau pererindod newydd ar draws yr esgobaeth yn ogystal ag adeiladu ar y rhai sydd eisoes yn bodoli. Bydd digwyddiad i lansio’r prosiect llenyddol ar hyd Llwybr Cadfan yn cael ei gynnal ddechrau mis Mawrth. Am fwy o wybodaeth am hynny gweler yma.

Mae Llan hefyd yn gweithio i sefydlu cymuned addolgar a phreswyl gyda ffocws ar yr iaith Gymraeg ym Methesda tra hefyd yn galluogi a gwella gweinidogaeth a chyfathrebu Cymraeg o fewn Ardaloedd Gweinidogaeth.

Trydydd amcan Llan yw sefydlu mentrau cymdeithasol sy’n galluogi mynegiant newydd o’r eglwys. Mae’r elfen hon o’r prosiect, unwaith eto, wedi’i gwreiddio mewn lleoliadau amrywiol ar draws yr esgobaeth. Bydd y mentrau hyn, yn eu tro, yn cynnig cyfleoedd gwahanol ar gyfer tyfu cymunedau addoli ac yn darparu pwyntiau mynediad i’r rhai sy’n ceisio Duw mewn ffyrdd newydd.

Mae cyflawni allbynnau Llan yn parhau i fod yn flaenoriaeth dros y misoedd nesaf. Er mwyn sicrhau bod momentwm cynyddol y prosiect yn cael ei gynnal, bydd Becks Davie-Tettmar yn symud o’i rôl bresennol o fewn Tîm Deiniol i fod yn Gyfarwyddwr Llan o ddechrau mis Mawrth, gan weithio law yn llaw â Jules Burnand, Elin Owen, Sara Roberts a’r teulu Llan ehangach. Mae Becks yn aelod hirsefydlog o dîm yr esgobaeth, ac mae ei hymrwymiad i efengylu a chenhadaeth yr Eglwys, ynghyd â’i phroffesiynoldeb a’i sgiliau rheoli prosiect, yn golygu bod dyfodol Llan mewn dwylo diogel.

Bydd James yn dechrau'r swydd newydd ar 28 Chwefror ac wedi’i leoli yn Esgobaeth Bangor, lle mae’r Archesgob yn parhau’n Esgob Bangor.