Efallai bydd y gair ‘Ymgyrchu’ yn codi ofn a braw ar rai pobl, delweddau o orwedd i lawr ar y ffordd, bod mewn cadwyni wrth reiliau ac yn y blaen! Nid yw’r ffordd honno o ymgyrchu at ddant pawb ac mae yna ffyrdd eraill o wneud yn sicr fod ein lleisiau'n cael eu clywed.

Darlleniad o’r Beibl:Exodus 3:9-15

Meddai Duw, ‘Yn awr y mae gwaedd pobl Israel wedi dod ataf, ac yr wyf wedi gweld fel y bu’r Eifftiaid yn eu gorthrymu. Tyrd, yr wyf yn dy anfon at Pharo er mwyn i ti arwain fy mhobl, meibion Israel, allan o’r Aifft.’ Ond gofynnodd Moses i Dduw, “Pwy wyf fi i fynd at Pharo ac arwain meibion Israel allan o’r Aifft?” Dywedodd yntau, “Byddaf fi gyda thi; a dyma fydd yr arwydd mai myfi sydd wedi dy anfon: wedi iti arwain y bobl allan o’r Aifft, byddwch yn addoli Duw ar y mynydd hwn.”
Yna dywedodd Moses wrth Dduw, “Os af at feibion Israel a dweud wrthynt, ‘Y mae Duw eich tadau wedi fy anfon atoch; beth a ddywedaf wrthynt os gofynnant am ei enw?”. Dywedodd Duw wrth Moses, “YDWYF YR HYN YDWYF. Dywed hyn wrth feibion Israel, ‘YDWYF sydd wedi fy anfon atoch.” Dywedodd Duw eto wrth Moses, ‘Dywed hyn wrth feibion Israel, "Yr ARGLWYDD, Duw eich tadau, Duw; Abraham, Duw Isaac a Duw Jacob sydd wedi fy anfon atoch.’ Dyma fydd fy enw am byth, ac fel hyn y cofir amdanaf gan bob cenhedlaeth.

Myfyrdod

Roedd Moses wedi cyfarfod â Duw yn y berth sy’n llosgi ac erbyn hyn mae’n cael ei anfon i wynebu Pharo. Nid yw Moses yn rhy sicr ynghylch hyn ac mae eisiau gwybod beth yw enw Duw er mwyn gallu dweud pwy sydd wedi’i anfon. Mae Duw yn ateb gan ddweud ‘YDWYF sydd wedi dy anfon’. Mae Moses yn dal i geisio dod allan o hyn trwy ddweud fod arafwch ar ei leferydd, nes bod Duw yn dweud y bydd Aaron, sy’n siarad yn dda ac yn glir iawn, yn mynd i’w ganlyn.
Does dim ffordd allan i Moses, ac fe wyddom ddiwedd y stori – cychwyn y Pasg a gŵyl y bara croyw, y ddihangfa ar draws y Môr Coch a’r daith ymlaen i Wlad yr Addewid. Roedd Moses yn gwybod am y rhoddion roedd wedi eu cael a’r rhai nad oeddynt ganddo!
Ond doedd dim rhaid iddo ei wneud hyn i gyd ar ei ben ei hun, a does dim rhaid i ni. Ar y daith ddeugain mlynedd trwy’r anialwch, roedd yn rhaid i Moses gadw’r heddwch rhwng y bobl a’u hannog, eu galluogi a galw ar Dduw i’w bwydo. Roedd yn rhaid iddo hefyd sicrhau nad oedd momentwm a phenderfyniad y daith yn pylu. Nid gwaith hawdd!
Ar adegau, mae mor hawdd teimlo ein bod yn gwneud y cyfan allwn ni, ond yn ofer, ac felly win bod yn rhoi’r gorau iddi neu'n gadael y cwbl i bobl eraill; ac, efallai, defnyddio'n holl egnïon ar brosiect arall.

A yw hyn yn rhywbeth rydych chi wedi cael profiad ohono? Os felly, beth wnaethoch chi a sut oedd hynny’n effeithio arnoch chi?

Wrth i ni ystyried newid hinsawdd, Llywodraeth Prydain sy'n rhedeg y broses, yn ei ddatblygu yn ystod misoedd i ddod ac yn sicrhau nad yw'n cael ei anghofio cyn y cyfarfod nesaf ym mis Tachwedd 2022. Y Llywodraeth sydd i fod i ystyried popeth sydd wedi'i addo yn COP26, gweithredu ar hynny a chadw'r momentwm i fynd am y daith sydd o’n blaen. Mae’r gwaith paratoi drosodd, gwaith y dyfodol fydd ysgogi a chysylltu.
Gallwn gymharu hyn a phererindod. Mae llawer o waith paratoi ar y dechrau, ar y daith i gyrraedd man y bererindod ac yna, i ddod yn ôl adref. Ond ar ôl cyrraedd adref mae’r gwaith yn dechrau mewn gwirionedd wrth i ni fyfyrio ar sut mae hyn wedi’n herio ac wedi’n newid, wedi’n tynnu’n agosach at Dduw, wedi dyfnhau ein ffydd.
Wrth i ni ystyried problemau newid hinsawdd, y llywodraethau ac arweinwyr diwydiant a busnes sy’n gorfod canfod ffyrdd o weithio gydag asiantaethau eraill a dechrau gwireddu’r addewidion. Yr hyn allwn ni ei wneud efallai, yw gwneud yn siŵr nad ydyn nhw’n anghofio.

Gweddi

Dduw yr holl greadigaeth
a ddatganodd fod popeth yn dda ar ddechrau amser.
Rydym yn cydnabod nad ydym wedi gofalu
am fwydo’r ddaear o dan ein traed
na’r moroedd a phopeth sy’n byw ynddyn nhw,
na’r aer sy’n rhoi bywyd i’r holl greadigaeth.
Rwyf i / Rydym ni eisiau gwneud iawn.
Rwyf i / Rydym ni eisiau darganfod ffyrdd o gyfiawnder.
Rwyf i / Rydym ni’n ceisio byd o gynaliadwyedd a chydraddoldeb.
Rho i mi / ni y dewrder i ddefnyddio fy / ein llais
i siarad yn erbyn difaterwch a diffyg gweithredu,
i ddarganfod beth yw dy alwad ymgyrchu di i mi / ni
trwy’r daith ddiddiwedd
o’m /’n chwilio am ddealltwriaeth trwy ffydd,
fel na fydd popeth a gafodd ei addo yn COP26 yn cael ei anghofio.
Mewn ffydd, O Dduw, rwyf i / rydym ni’n addo chwarae fy / ein rhan
mewn cynnal dy fyd i’r cenedlaethau i ddod.
Yn enw’r Duw, sydd, YDWYF,
ac Iesu a’r Ysbryd Glân,
y gwneir y weddi hon. Amen.

Ychydig o awgrymiadau

• Wyddoch chi pwy yw eich cynghorwyr lleol? Gallwch ysgrifennu atyn nhw a gofyn a yw newid hinsawdd ar eu hagenda a pha newidiadau y bydden nhw’n eu gwneud mewn cymunedau lleol.
• Wyddoch chi pwy yw eich aelod o’r Senedd? Gallwch ysgrifennu atynt, neu at y Gweinidog dros Faterion yr Amgylchedd a Hinsawdd i ofyn beth y maen nhw’n ei wneud yma yng Nghymru.
• A yw newid hinsawdd yn cael ei drafod yn eich eglwys, ai mewn pregethau, grwpiau astudio neu mewn cyfarfodydd cynulleidfaol neu Ardal Genhadaeth? Os nag yw, gallech ei awgrymu ei fod yn cael ei gynnwys ar yr agenda?
• Dysgwch ragor am effeithiau newid hinsawdd ar fywydau ar draws y byd.
• Oes yna bobl eraill yn eich eglwys a’ch Ardal Genhadaeth a fyddai’n hoffi cyfarfod i drafod beth ellid ei wneud, fel unigolion a chyda’ch gilydd, i gael dyfodol mwy cynaliadwy?
• Gweddïwch dros y rhai sy'n ymgyrchu dros fyd gwyrddach a diogelach i fyw ynddo.