Fel gyda’r gair ‘ymgyrchu’, gallai'r gair 'cyllid' eich gadael yn dyfalu beth sy'n mynd i gael ei ofyn ohonoch! Yn COP26 cafodd cefnogaeth ariannol ei addo i helpu, galluogi a chefnogi gwledydd sy'n datblygu a chenhedloedd llai i wneud y newidiadau sydd ei angen i'w harwain at ddyfodol mwy cynaliadwy ar gyfer y blaned.

Darlleniad o’r Beibl: Luc 21: 1 – 4 a Mathew 13: 44-46

Cododd Iesu ei lygaid a gwelodd bobl gyfoethog yn rhoi eu rhoddion i mewn yng nghist y drysorfa; yna gwelodd wraig weddw dlawd yn rhoi dwy hatling ynddi. Meddai “Yn wir, rwy’n dweud wrthych fod y weddw dlawd hon wedi rhoi mwy na phawb; oherwydd cyfrannodd y rhain i gyd o'r mwy na digon sydd ganddynt, ond rhoddodd hon o'i phrinder y cwbl oedd ganddi i fyw arno."

Meddai Iesu ‘Mae teyrnas nefoedd yn debyg i drysor wedi ei guddio mewn maes; pan ddaeth dyn o hyd iddo, fe’i cuddiodd, ac yn ei lawenydd y mae’n mynd ac yn gwerthu’r cwbl sydd ganddo, ac yn prynu'r maes hwnnw. Eto, y mae teyrnas nefoedd yn debyg i fasnachwr sy’n chwilio am berlau gwych; wedi iddo ddarganfod un perl gwerthfawr, aeth i ffwrdd a gwerthu’r cwbl oedd ganddo, a’i brynu”.

Myfyrdod

Yn aml, nid yw trafod arian a chyllid yn cael ei annog; mae bron iawn yn bwnc tabŵ, hyd yn oed mewn eglwysi! Eto, mae’r arian sy’n dod i mewn ac yn mynd allan yn rhoi pwysau gwirioneddol ar eglwysi, fel ar ein bywydau ni o ddydd i ddydd, yn enwedig ar gyfnod pan mae prisiau'n codi.

Os ydych chi’n rhan o gymuned eglwys, faint ydych chi’n ei wybod am y costau o gynnal gweinidogaeth a chenhadaeth a gofalu am yr adeiladau yn eich ardal?

Mae’r beibl yn llawn o gyfeiriadau at arian, o’r casglwyr trethu’n cymryd gormod o arian i fasnachwyr yn rhwystro’r ffordd i mewn i’r deml yn Jerwsalem, o’r ddameg am y talentau i’r ddau ddarlleniad o’r beibl uchod, a'r gymhariaeth rhwng y cyfoethog a'r tlawd. I Iesu mae’r pwyslais ar gyfiawnder.

Mae’r darn cyntaf o Luc yn ein galw i ystyried beth ydyn ni’n ei roi ac a fyddwn ni’n colli hynny ai peidio. Yn y ddameg, mae Iesu’n awgrymu na fyddai’r cyfoethog yn sylwi, yn eu bywydau bob dydd, ar golli eu rhodd, ond, ar y llaw arall, y byddai'r wraig. Nid yw’r ddameg yn sôn wrthym sut oedd y rhai yn gwrando yn ymateb i’r stori! Ond yn fwy na hynny, mae Iesu’n gofyn i ni ystyried pam ein bod yn rhoi a beth mae’r rhoi hwnnw'n ei olygu i ni, nid faint sydd gennym neu nad sydd gennym i’w roi.

Yn COP26, gofynnwyd i’r gwledydd a’r cenhedloedd datblygedig i roi, i addo, mwy o gefnogaeth ariannol i alluogi gwledydd sy'n datblygu a chenhedloedd ar ynysoedd bychain, i addasu i leihau effeithiau newid hinsawdd, gwaith na fydden nhw gallu ei fforddio ar eu pen eu hunain. Yr awgrym oedd y byddai, erbyn 2025, yr addewid ariannol ar y cyd wedi dyblu, ac felly'n galluogi rhoi llawer mwy o gefnogaeth i'r ardaloedd yn y byd sydd ei angen mwyaf.

Er mwyn i’r gweithredu fod yn effeithiol yn erbyn effeithiau parhaus a chynyddol newid hinsawdd, mae’n rhaid i’r byd ‘fod ynddi gyda’i gilydd’, yn cefnogi ei gilydd ar draws y byd; a ble bo angen, yn ariannol.

Wrth edrych ar yr ail ddarn o’r beibl, mae Iesu’n sôn am deyrnas nefoedd, yn dweud ei fod fel trysor i yn disgwyl cael ei ddarganfod ac, unwaith y bydd wedi’i ddarganfod, y bydd popeth yn cael ei roi i’w brynu. Gallai hyn swnio braidd yn faterol, ond un ffordd o edrych ar y ddameg hon yw gyda llygaid ffydd, gweld y trysor fel ein ffydd. Dyma ffydd sydd, unwaith y mae wedi’i darganfod, yn ein galw i ofalu am y byd rydym yn byw ynddo ac i wneud ac i roi popeth y gallwn i helpu i adeiladu gwell dyfodol i’r cenedlaethau i ddod.

Beth mae’r ddwy ddameg yn ei ddweud wrthych chi am arian a rhoi o safbwynt ffydd a bod yn rhan o deyrnas Duw?

Efallai bod arian yn bwnc byddai’n well gennym beidio â siarad amdano, ond mae’n faes anodd iawn ei osgoi gan ei fod yn effeithio ar bob un ohonom pob dydd; yn y cartref ac yn yr eglwys!

Gweddi

Dduw sy'n amgylchynu popeth,
yn dal fel un holl ddarnau’r cread,
yn chwilio am gyfiawnder, trugaredd a chariad
a rhannu cyfoeth y byd yn deg,
er mwyn i bawb fyw yn ddiogel ac yn llesol,
yn gallu anadlu awyr lân ac yfed dŵr glân.
Rwyt yn ein galw ni i fod yn bobl hael,
boed i mi / ni fod yn hael wrth i mi / ni roi
a rhoi i mi / ni y dewrder i wrthwynebu,
i herio ac i wynebu [yn addfwyn]
y rhai sydd â’r awdurdod i wneud gwahaniaeth,
ac i anrhydeddu’r addewidion maen nhw wedi’u haddo.
Duw sy'n amgylchynu popeth,
agor fy / ein llygaid i harddwch
a realiti’r byd hwn,
ac i’r gwahaniaeth y gallaf i / gallwn ni ei wneud.
Amen.

Ychydig o awgrymiadau

Wyddoch chi sut mae’ch ardal leol chi’n gwario'i harian, yn enwedig i gefnogi’r newidiadau angenrheidiol i wella’r amgylchedd?

• Ysgrifennwch at eich aelod o’r Senedd i ofyn faint sydd wedi’i addo i gefnogi newidiadau yma ac ar draws y byd.
• Os oes gennych chi gynilion neu fuddsoddiadau, wyddoch ble mae’ch arian ac a yw’r cefnogi ynni gwyrdd ai peidio?
• Meddyliwch pa mor aml y mae sôn am arian yn yr eglwys a faint sy'n gwybod am gostau ariannol yr eglwys.

  ---