Ym mha ffyrdd y cafodd eich ffydd ei chryfhau neu ei phrofi yn ystod y daith hon?

Rwyf wedi canfod doniau nad oeddwn erioed yn gwybod eu bod nhw gennyf i. Doniau y mae Duw wedi'u rhoi i mi na fyddwn i erioed wedi’u canfod pe na bawn i wedi dod i gysylltiad â phregethu neu arwain gwasanaeth. Mae’r canfyddiad hwn yn dangos cymaint yw cariad a thrugaredd Duw tuag ataf ac mae’n fy llanw â pharchedig ofn.

Mae dirnadaeth a hyfforddiant wedi fy ngalluogi i gwrdd â chymaint o Gristnogion o bob eglwysyddiaeth, mynegiant o ffydd a chefndir, ac mae wedi bod yn bleser gwirioneddol darganfod pa lwybr sydd gan Dduw i mi ochr yn ochr â thorf mor fywiog a chyffrous o dystion i gynlluniau Duw ar ein cyfer ni i gyd.

Pwy fu'r ffigyrau mwyaf dylanwadol yn eich taith ysbrydol, a pha effaith maen nhw wedi'i chael arnoch chi?

Fy arwr ysbrydol yw Sant Ffransis o Assisi. Mae Sant Ffransis yn ddiddorol oherwydd y ffordd yr oedd yn cofleidio gwahanglaf. Roedd gwahangleifion yn codi ofn mawr arno, roedd yn eu hystyried yn annymunol hyd yn oed. Ac eto, un diwrnod, cyfarfu â dyn ar y ffordd a oedd yn dioddef o'r clefyd ac er iddo droi i ffwrdd i redeg i ddechrau, trodd yn ôl a'i gofleidio a'i gusanu. Yn y foment honno sylweddolodd fod yr hyn a oedd wedi bod yn chwerw iddo wedi dod yn felys. Canfu fod gwir lawenydd a hapusrwydd i'w gael wrth gofleidio eraill mewn gostyngeiddrwydd a chariad, doed a ddelo, oherwydd dyma a wnaeth Iesu er ein mwyn ni.

Mae hyn yn bwysig iawn i mi gan ei fod wrth wraidd yr hyn y mae Iesu'n galw arnon ni i'w wneud, i edrych ar y rhai o'n cwmpas, ac ni waeth pwy ydyn nhw, na beth allai'r amgylchiadau fod, eu cofleidio â chariad. Mae'n rhywbeth sydd wedi peri trafferth i mi yn fy ngorffennol, rwyf wedi bod â rhagfarnau, rwyf wedi bod yn angharedig ac yn feirniadol, ond fe wnaeth Sant Ffransis fy atgoffa o'r alwad i garu yr oedd Iesu yn ei datgan a chywirodd hyn fy marn i ynghylch gostyngeiddrwydd a balchder.

A oes yna feysydd penodol o weinidogaeth neu wasanaeth yr ydych chi'n teimlo eich bod yn cael eich galw i’w cyflawni?

Rwyf wrth fy modd yn siarad â grwpiau ysgol am ffydd, arwain gweinidogaeth teuluoedd ifanc ac ymgysylltu â'r gymuned. Alla i ddim aros i allu rhannu llawenydd y Cymun a phawb, i ddweud wrthynt heb unrhyw ansicrwydd eu bod yn cael maddeuant ac yna eu hanfon ymaith gyda bendith gan Dduw sy'n llawn o'i nerth a'i gariad.

Rwyf wrth fy modd yn arwain gwasanaethau a phregethu yn ein heglwysi hardd a'n mannau naturiol fel ei gilydd. Rwy'n gobeithio y bydd fy ngweinidogaeth yn gymysgedd bywiog o'r holl elfennau hyn, wedi'u gwreiddio yn y Cymun, yn llawn gobaith a bendith ac yn estyn allan i'n cymunedau a'n teuluoedd mewn ffyrdd hynod draddodiadol a hefyd mewn ffyrdd newydd ac annisgwyl.

Pa gyngor fyddech chi'n ei roi i rywun sy'n ystyried galwedigaeth i'r offeiriadaeth am y tro cyntaf?

Ewch amdani! Efallai eich bod yn teimlo nad oes gennych yr amser i’w roi, neu nad oes gennych y sgiliau i'w gyflawni, neu efallai eich bod yn teimlo eich bod yn rhy hen neu'n rhy ifanc, neu'n rhy brysur neu'n rhy swil. Does dim ots. Gofynnwch i chi eich hun, 'A ydw i'n cael fy ngalw i'r weinidogaeth?'

Mae Duw wedi rhoi doniau i ni, mor hael â'r rhai a roddwyd i bawb arall. Mater i ni yw canfod beth ydyn nhw a’i defnyddio i adeiladu'r deyrnas. Fe wnaeth esgobaeth Bangor a Padarn Sant fy helpu i ganfod y doniau a oedd gen i ond nad oeddwn yn gallu eu gweld. Rwyf wedi dysgu llawer ac wedi magu hyder a'r gallu i garu.

Fy nghyngor i yw gofyn y cwestiwn a chwilio am eich doniau a gweld i ba gyfeiriad y bydd eich cam nesaf yn mynd â chi. Bydd tuag at Dduw.

Os ydych am archwilio’n bellach yn sgil hynny, siaradwch â'ch ficer lleol neu edrychwch ar ein gwefan.