Ar ôl treulio degawdau’n byw ac yn gweithio’n fyd-eang, gyda chyfnodau yn Llundain, Berlin, Osaka, a Los Angeles, gwnaeth George ymddeol yn 40 oed ac agorodd siop datŵs yn Llundain. Yn ddiweddarach daeth yn arwerthwr llawn amser gyda’i dŷ ocsiwn ei hun yn Rhosan-ar-Wy ac yn werthwr eitemau casgladwy mewn siop yn Swydd Gaerloyw. Ond o dan yr inc a’r persona seren roc, mae ymrwymiad dwfn i’w ffydd ac awydd i gysylltu â phobl mewn ffyrdd annisgwyl ac ystyrlon.

Gydag angerdd am ffilmiau arswyd a diwinyddiaeth, mae George ar genhadaeth i gysylltu â’r gymuned, gan ddefnyddio ei brofiadau bywyd i ddod â ffydd i’r rhai na fydden nhw efallai yn dod o hyd iddo drwy lwybrau traddodiadol.

"Rwy’n credu ei bod hi’n anodd iawn nodi’r hyn sy’n ysbrydoli unrhyw un i fynd ar drywydd galwad i’r weinidogaeth," meddai George. "Ond i fi, mae’n debyg, er gwaethaf fy llwyddiannau yn fy ngyrfa flaenorol, roeddwn i bob amser yn teimlo bod rhywbeth ar goll, potensial nad oeddwn i’n ei gyflawni, ac fe wnaeth hynny fy nenu i i’r eglwys i gychwyn, a wnaeth, wrth gwrs, fy arwain i le’r ydw i nawr."

Wedi’i ordeinio yn 2020, mae George yn gweld ei rôl newydd fel offeiriad arloesi yn gyfle i gysylltu â’r rhai na fyddent fel arfer yn mynd i’r eglwys, gan ddefnyddio ei brofiadau bywyd unigryw i bontio’r bwlch rhwng diwylliant cyfoes a ffydd Gristnogol.

"Mae fy nghefndir a fy nhaith ffydd yn eithaf anarferol. Rwy’n clywed yn aml nad eich ficer arferol ydw i. Mae dod â phobl eraill i wybod sut y gall Duw newid eu bywydau yn fy ngalluogi i gwrdd â nhw lle y maen nhw, ar ba bynnag gam yn eu taith ffydd y gallai hynny fod.

Gan edrych ymlaen at symud i Gaergybi, mae George yn dweud, "Efallai bod gan lawer o bobl yn nhrefi a phentrefi Ardal Weinidogaeth Bro Cybi ffydd gref, rhywfaint o ffydd neu ddim ffydd ac rwy’n credu bod ymgysylltu â’r bobl hynny i rannu ein ffydd yn bwysig, ac rydyn ni’n gwneud hynny orau pan fyddwn ni’n caniatáu i Dduw ddefnyddio ein profiadau bywyd.

"Mae yna bobl heddiw sy’n gwybod fawr ddim am y ffydd Gristnogol. Nid yw rhai erioed wedi mynd i mewn i eglwys ond rwy’n gwybod bod pobl yn aml yn meddwl am ffydd p’un ai ydyn nhw’n gwybod hynny ai peidio; trwy ffilmiau, llenyddiaeth a cherddoriaeth. Maen nhw eisoes yn cysylltu â Duw, ond dydyn nhw ddim yn gwybod hynny eto.

"Gobeithio bod fy rôl yn golygu mai fi all fod y cysylltiad hwnnw rhwng bywyd cyfoes a ffydd fyw ac rwy’n teimlo’n ffodus iawn o allu gwneud hynny."

P’un ai yw hynny drwy ei Glwb Spooky HaT —grŵp ffilmiau arswyd a diwinyddiaeth —neu dim ond drwy fod yn bresenoldeb anfeirniadol, agored yn y gymuned, mae George yn benderfynol o ddod â neges cariad Crist at bawb, pa le bynnag y maen nhw ar eu taith ysbrydol.

"Mae ffilmiau arswyd yn ôl eu natur yn ymwneud yn llwyr â diwinyddiaeth. Ar eu lefel fwyaf sylfaenol maen nhw’n ymwneud â daioni yn goresgyn drygioni, ond yn aml iawn mae’r negeseuon ffydd yn y ffilmiau hyn yn ddyfnach ac yn fwy cymhleth na hynny.

"Gall yr hyn sy’n ymddangos ar yr wyneb o fod yn ‘gyflafan waedlyd ddi-chwaeth’ gael cryn dipyn i’w ddweud hefyd am natur iachawdwriaeth neu bosibilrwydd achubiaeth. Mae’r ffilmiau hyn yn gweithio ar sawl lefel. Gallan nhw fod yn adloniant rhad, achosi gwefr wedi’i anelu at ddemograffig penodol, er hynny, mae ond angen i chi grafu’r wyneb i ddod o hyd i gyfoeth o syniadau diwinyddol ac athronyddol sy’n aros i gael eu harchwilio."

Yn cynnwys ffilmiau Hammer Horror ac A Nightmare on Elm Street ymhlith ei ffefrynnau, mae George wedi gweld drosto’i hun sut y gall ffilmiau arswyd ysbrydoli taith ffydd rhywun. Mae aelodau grŵp arswyd a diwinyddiaeth Spooky HaT wedi dechrau mynd i’r eglwys. "Mae wedi bod yn llwyddiant mawr ac mae wedi dod â rhai o’r bobl sy’n dod i’r clwb i’r eglwys bob dydd Sul gydag un person bellach yn helpu ar ddydd Sul.

Nid oedd yr un o’r aelodau yn mynd i’r eglwys o’r blaen a bydden nhw wedi dweud nad oedd ganddyn nhw fawr ddim barn ar ffydd, os o gwbl. Ond rwy’n credu’n gryf, os ydyn nhw’n cael eu trin yn dda ac yn sensitif, mae modd defnyddio trafodaethau am ffilmiau arswyd i agor calonnau pobl i ffydd a’u harwain at wir berthynas â Duw.