Mae banc bwyd prysur ym Mangor sy’n paratoi ar gyfer rhuthr o bobl mewn angen dros y Nadolig wedi cael rhodd o gyflenwadau gan fusnes yn y dref.

Daeth Lock Stock Self Storage, sydd â thri safle ym Mangor, i Fanc Bwyd y Gadeirlan Bangor, yng Nghlos y Gadeirlan, i roi cyflenwadau o basta, tatws, sawsiau, pwdinau a mwy.

Mae’r banc bwyd ar agor dri diwrnod yr wythnos, dydd Llun, dydd Mercher a dydd Gwener, am awr bob dydd ac wedi’i staffio dros y 12 mlynedd ddiwethaf gan dîm ymroddedig o fwy na 30 o wirfoddolwyr.

Mae’n swatio oddi ar Glos y Gadeirlan yn y ddinas a dywedodd aelod o’r tîm, Lesley Evans: “Rydyn ni’n ddiolchgar iawn i Lock Stock am y rhodd hael hon ar ein hadeg brysuraf o’r flwyddyn.

“Mae cynnydd mawr wedi bod i’r niferoedd ers y pandemig ac rydyn ni’n gweld llawer o ffoaduriaid yn dod atom ni, i ddechrau o Wcráin ond yn gynyddol o Asia ac Affrica.

“Rydyn ni fel rheol yn darparu tua 50 o barseli bwyd ond bydd hynny’n cynyddu adeg y Nadolig wrth i bobl geisio sbwylio eu hunain a’u teuluoedd ac efallai mynd heb fwyd.

“Rydyn ni’n canfod ein bod ni’n gweld mwy o bobl mewn gwaith nawr nad ydyn nhw’n gallu ymdopi ar eu cyflogau a hefyd pobl hŷn. Mae’n ofnadwy ond mae’n ffaith.

“Mae’r ffigurau sy’n dangos bod yr unigolyn cyffredin ddim ond dau siec cyflog i ffwrdd o fod angen defnyddio banc bwyd yn ein syfrdanu – dyna faint o amser mae’n cymryd i wario eich cynilion.

“Rydyn ni’n ffodus o gael rhoddion fel yr un yma gan Lock Stock ac mae’n braf cael pethau hyfryd y gallwn ni eu dosbarthu i bobl ar yr adeg arbennig hon o’r flwyddyn.”

Meddai Rheolwr Ardal Lock Stock ar gyfer Gogledd-orllewin Cymru, Lee Hanson: “Rydyn ni’n hoffi cymryd rhan yn y cymunedau rydyn ni’n gweithredu ynddyn nhw a dyma ein ffordd o ddweud diolch am eu cefnogaeth.

“Mae gennym ni dri safle yma ym Mangor ac mae hwn yn amlwg yn wasanaeth y mae wir ei angen a gobeithio y bydd Lock Stock wedi chwarae rhan i ddod ag ychydig o hwyl y Nadolig i aelwydydd lleol.

“Mae’r tîm o wirfoddolwyr yma yn amlwg yn gwneud gwaith ardderchog ar yr hyn sy’n gyfnod anodd iawn i gynifer o bobl ac rydym ni’n hoffi cefnogi’r gymuned yn y mannau lle’r ydym ni’n cyflawni busnes pa un a yw’r elusennau fel Bwyd Banc y Gadeirlan Bangor neu ysgolion a grwpiau cymunedol lleol.”

Mae Gillian Slade, deietegydd sydd wedi ymddeol, yn defnyddio ei harbenigedd i sicrhau bod y parseli bwyd yn cynnwys detholiad maethlon o fwydydd a dywedodd: “Rydyn ni’n trefnu’r pecynnau i ddarparu bwyd am dri diwrnod a hanner.

“Mae’r pecynnau ar gyfer pobl sengl, parau, teuluoedd â dau o blant dan wyth oed ac ar gyfer y rhai â phlant hŷn ac rydyn ni hefyd yn darparu ar gyfer deietau llysieuol a dietau arbennig eraill gan fod yn rhaid i ni ddarparu ar gyfer gwahanol grwpiau ethnig a chrefyddau.

“Maen nhw’n cynnwys tri brecwast, tri chinio a thri chinio’r hwyr yn ogystal â byrbrydau a diodydd ac rydyn ni’n ceisio cynnig rhywfaint o lysiau a ffrwythau ffres.”

Lock Stock, a sefydlwyd yn Ninbych ym 1999, yw cwmni storio mewn cynwysyddion mwyaf y DU â bron i 4,500 o unedau yn darparu dros bedair miliwn troedfedd giwbig o le mewn 29 o barciau storio ar draws gogledd a chanolbarth Cymru, Swydd Amwythig a Glannau Mersi.

Os hoffech ragor o wybodaeth am waith Banc Bwyd y Gadeirlan Bangor, ewch i https://www.bangorfoodbank.org/

Lluniau: Rheolwr Rhanbarthol Lock Stock Self Storage Lee Hanson yn danfon rhodd fwyd i wirfoddolwyr Banc Bwyd y Gadeirlan Bangor Gillian Slade, chwith, a June Cadogan.

Llun gan Mandy Jones Photography.