Annwyl Gyfeillion yng Nghrist,

Wrth i ni gychwyn ar flwyddyn galendr newydd, yr wyf yn ysgrifennu i ddymuno pob bendith i chi ar gyfer 2026 ac i ddiolch i chi am y nifer o ffyrdd yr ydych yn byw allan eich disgyblaeth ffyddlon a’ch gweinidogaeth. Boed i Dduw ein bendithio a’n harwain oll wrth i ni geisio siapio ein bywyd gyda’n gilydd ar batrwm Iesu Grist.

Mae wedi bod yn dda cadw mewn cysylltiad â'r hyn sy’n digwydd ledled yr esgobaeth drwy’r Deon a’r Archddiaconiaid a gweld yr holl straeon newyddion da sy’n dod allan o Fangor trwy’r gwahanol sianeli cyfryngau. Mae llawer i ddiolch i Dduw amdano.

Fel y gwyddoch, pan gyfarfu ym mis Tachwedd, trafododd y Corff Llywodraethu a chymeradwyo’r syniad o benodi esgob dros dro i Fangor. Rwyf wedi gwneud cynnydd da ar hyn ac wedi cael sgyrsiau ffôn â phump o bobl a sgyrsiau e-bost â chwech yn rhagor. Wrth imi ysgrifennu, mae dau berson yn rhoi ystyriaeth ddifrifol i’r rôl. Rydym bellach ar y cam o aros i weld a ydym yn derbyn arwyddion ffurfiol o ddiddordeb yn y rôl. Mae’n rhy gynnar i ymgeisydd dewisol ddod yn amlwg.

Pe bai unrhyw ymgeisydd yn cyflwyno cais ffurfiol, bydd gofyn iddynt fynd trwy broses ffurfiol o ddirnad. Bydd hyn yn cynnwys iddynt gwblhau’r un papurau ymgeisydd ag y byddai gofyn amdanynt ar gyfer coleg etholiadol, cael eu gwirio drwy’n prosesau diogelu arferol, a chwrdd ar wahân ag nifer o grwpiau o’r esgobaeth gan gynnwys aelodau’r Coleg Etholiadol ac aelodau o Dîm Staff yr Archesgob ynghyd â Chadeirydd y BCE. Rhoddir adborth gan gynrychiolwyr y grwpiau hynny cyn i gyfweliad ffurfiol gael ei gynnal ganol Chwefror gyda phanel cyfweld a fydd yn cynnwys aelodau o’r esgobaeth.

Ymunwch â mi, os gwelwch yn dda, i weddïo am ddoethineb a dirnadaeth wrth inni geisio ewyllys Duw ar gyfer penodi’r person iawn i arwain fel esgob Esgobaeth Bangor. Efallai yr hoffech ddefnyddio’r weddi hon, a ysgrifennwyd gan rywun o Fangor at y diben hwn.

Dad cariadus,

Diolchwn i ti am Esgobaeth Sant Deiniol, gyda’i hanes cyfoethog o 1,500 o flynyddoedd.

Diolchwn i ti am amrywiaeth y bobl y mae’n eu cynrychioli yng Ngogledd-orllewin a Chanolbarth Cymru, ac am eu hymrwymiad i ddiwylliant a iaith Gymraeg fyw a chryf.

Bendithia bawb sy’n ymwneud â’r weinidogaeth yma o bob math, yn lleyg ac ordeiniedig; o fewn adeiladau eglwysig ac allan yn y gymuned.

Dyro weledigaeth glir a meddyliau dewr ac agored i bawb sy’n rhan o’r broses o geisio esgob newydd.

Gofynnwn i ti yn awr ganfod person gweddigar a fydd yn ceisio adnabod a diwallu dy ewyllys ar ein cyfer, gyda meddwl agored i bethau newydd.

Dyro i ni berson o ddoethineb a phrofiad, gyda’r sgiliau a’r dewrder i weithredu fel Pont Wasanaeth, i ailsefydlu trefn ac undod yn ôl esiampl dy Fab, fel y bydd dy newyddion da yn parhau i gael ei rannu yma gydag egni a hyder o’r newydd yn y blynyddoedd sydd i ddod.

Yn ei Enw Ef, ein Harweinydd a’n Harglwydd.
Amen.

Archesgob Cherry