Colect

Dad hollalluog,
rhoddaist dy unig Fab i farw dros ein pechodau
ac i gyfodi drachefn i’n cyfiawnhau:
caniatâ i ni fwrw ymaith surdoes malais a drygioni
er mwyn inni dy wasanaethu’n wastadol mewn purdeb bywyd a gwirionedd;
trwy haeddiannau dy Fab Iesu Grist ein Harglwydd sy’n fyw ac yn teyrnasu gyda thi,
yn undod yr Ysbryd Glân, yn un Duw,
yn awr ac am byth.

Esgob nesaf Bangor

Mae Esgobaeth Bangor yn ceisio penodi ei esgob nesaf.

Mae hwn yn gyfnod arwyddocaol ym mywyd yr esgobaeth. Rydym yn chwilio am arweinydd a fydd yn ailadeiladu ymddiriedaeth, yn cryfhau trefniadau goruchwylio, ac yn darparu cyfeiriad clir ar gyfer y dyfodol.

Bydd Esgob Bangor yn bresennol ac yn weladwy ar draws yr esgobaeth, yn meithrin perthnasoedd ac ymddiriedaeth, yn cyhoeddi’r efengyl yn glir ac yn hyderus, ac yn gweithio’n effeithiol mewn cyd-destun dwyieithog lle mae’r Gymraeg a’r Saesneg yn cael eu trin yn gyfartal.

Rydym yn chwilio am unigolyn gweddigar, cadarn yn ei ofal bugeiliol, ac sy’n gallu arwain gyda chlirdeb a thosturi.

Y dyddiad cau ar gyfer datganiadau o ddiddordeb ac awgrymiadau yw 12pm ddydd Mercher 29 Ebrill 2026.

Os hoffech gael eich ystyried ar gyfer y rôl hon, neu os hoffech awgrymu person i'w ystyried, cysylltwch ag Ysgrifennydd y Coleg Etholiadol drwy e-bost yn electoralcollege@churchinwales.org.uk.

Mae’r Coleg Etholiadol yn cyfarfod rhwng 16 a 18 Mehefin 2026 yn Eglwys Drindod Sanctaidd, Llandudno i ethol Esgob nesaf Bangor.

Ffenestr goffa HMS Conway i’w dadorchuddio mewn eglwys ar Ynys Môn

Bydd ffenestr wydr liw yn coffáu’r llong hyfforddi HMS Conway yn cael ei dadorchuddio yn Eglwys Llanedwen, Llanfairpwllgwyngyll ar 18 Ebrill.

Bydd y seremoni yn cynnwys cysegru’r ffenestr a gosod baner Conway i orffwys. Caiff ei harwain gan y Parchg Simon Douglas Lane, caplan anrhydeddus HMS Conway.

Mae’r gofeb yn adlewyrchu cysylltiad hir y llong â’r ardal. Am flynyddoedd lawer, byddai cadetiaid yn mynychu gwasanaethau yn Eglwys Llanedwen, gan gerdded o Blas Newydd i addoli ochr yn ochr ag Ardalydd Môn a’i aelwyd.

Mae’r digwyddiad wedi’i drefnu fel cyfarfod preifat i gyn-gadetiaid HMS Conway, ynghyd â chynrychiolwyr Cyfeillion HMS Conway a Chlwb Conway. Oherwydd cyfyngiadau lle, mae mynediad wedi’i gyfyngu i westeion gwahoddedig a phlwyfolion yn unit.

Clychau’n cael eu clywed yn eglwys Betws-y-Coed ar ôl 150 mlynedd

Canwyd clychau yn Eglwys y Santes Fair, Betws-y-Coed, am y tro cyntaf ar gyfer gwasanaeth ar Sul y Pasg, gan nodi cwblhau prosiect hirdymor i osod cylch llawn o glychau yn y tŵr.

Roedd mwy na 150 o bobl yn bresennol yn y Cymun Teuluol a bendith yr ŵyn, lle canwyd y clychau cyn y gwasanaeth. Mae’r prosiect yn cyflawni cynlluniau sy’n dyddio’n ôl dros 150 o flynyddoedd, pan adeiladwyd yr eglwys gyda darpariaeth ar gyfer cylch llawn o glychau.

Eglwysi yn Cyfrif ar Natur

Yr haf hwn, bydd mynwentydd ein heglwysi yn dod yn borth i genhadaeth, gan wahodd pobl i ddarganfod bywyd gwyllt lleol, natur a phresenoldeb Duw yn eu cymunedau.

Mae Wythnos Caru Eich Mynwent a Churches Count on Nature (6–14 Mehefin) yn gwahodd pobl i sylwi ar a chofnodi’r amrywiaeth fiolegol gyfoethog yn mynwentydd ein heglwysi. Dilynir hyn gan Wythnos Natur Cymru (5–13 Gorffennaf), sy’n annog gwerthfawrogiad ehangach o’r byd naturiol ar draws ein cymunedau. Gyda’i gilydd, mae’r wythnosau hyn yn cynnig ffordd syml a hygyrch o groesawu pobl i dir yr eglwys, yn aml am y tro cyntaf.

Rydym yn annog pob Ardal Weinidogaeth i gymryd rhan. Gall hyn fod mor syml ag agor eich mynwent  a’i hyrwyddo fel lle i ymweld ag ef, neu drefnu taith natur, arolwg neu fan tawel ar gyfer myfyrio. Ar adeg pan fo amryw yn chwilio am gysylltiad â natur, mae hwn yn ffordd ymarferol a chadarn o rannu presenoldeb yr Eglwys a gwahodd eraill i’w ddarganfod drostynt eu hunain.

Swyddi

Ficer ac Arweinydd Ardal Weinidogaeth Bro Cwyfan

Mae gweinidogaeth wledig yng Ngorllewin Ynys Môn yn fywiog ac amrywiol. Mae ein heglwysi wrth galon eu cymunedau, yn lleoedd o weddi ac allgymorth, yn rhannu ym mywyd bob dydd y trefi a’r pentrefi ac yn croesawu’r miloedd o ymwelwyr sy’n dod yma bob blwyddyn.

Byddech yn dod at eglwysi sy’n derbyn gofal da, sy’n gadarn yn ariannol, ac sy’n cael eu cefnogi gan dîm gwych o bobl sydd am weld eu heglwys yn tyfu mewn ffydd a chenhadaeth.

O draethau poblogaidd Rhosneigr i RAF y Fali, ac at dirnod enwog Eglwys Sant Cwyfan yn y Môr, mae Ardal Weinidogaeth Bro Cwyfan yn cwmpasu rhan unigryw o Ynys Môn.

Rydym yn chwilio am rywun a fydd yn:

• Frwdfrydig dros dyfu’r eglwys a datblygu cyfleoedd estyn allan.
• Gwerthfawrogi addoliad traddodiadol tra’n ymgysylltu’n greadigol i ddatblygu ffyrdd newydd o gasglu pobl mewn gweddi.
• Ymrwymedig i weithio gyda Chyngor yr Ardal Weinidogaeth i gynllunio’n strategol ar gyfer y dyfodol.
• Gweithio’n gydweithredol gyda phobl leyg, gan annog eu doniau a meithrin galwedigaethau.

Mae’r swydd yn addas i siaradwr Cymraeg neu rywun sy’n barod i ddysgu Cymraeg. Rydym yn cynnig cefnogaeth lawn ar gyfer dysgu a datblygu i’r rhai sy’n dymuno dysgu iaith y nefoedd.

Hyfforddiant Diogelu

Ydych chi wedi archebu eich hyfforddiant diogelu Modiwl C?

• Dydd Llun 23 Mawrth 2026, 10:00yb – 1:00yp, Neuadd Eglwys y Groes, Maesgeirchen, Bangor, LL57 1UB

Rhaid i chi drefnu eich hyfforddiant ar y wefan Yr Eglwys yng Nghymru.