Mae’n bleser gan Esgob Bangor gyhoeddi penodiad y Parchg Llewelyn Moules-Jones yn Ficer ac Arweinydd Ardal Weinidogaeth ar gyfer Ardal Weinidogaeth Bro Dwynwen, sy’n gwasanaethu’r cymunedau o amgylch Llanfairpwll, Brynsiencyn a Niwbwrch ar Ynys Môn.

Yn frodor o Fôn, y mae Llew yn hannu o linach hir o amaethwyr ar yr ynys Yn dilyn cyfnod ym Mhrifysgolion Bangor a Chaerdydd, cychwynodd Llew ei yrfa fel darlithydd mewn amaethyddiaeth, cyn treulio pymtheg mlynedd yn gweithio i Lywodraeth Cymru, wedi ei leoli yn bennaf yng Nghaerdydd.

Yna, wedi dwys ystyried galwad i’r offeriadaeth, cychwynodd Llew ei hyfforddiant yng Ngoleg Sant Mihangel ac yn diweddarach Athrofa Padarn Sant. Fe’i ordeinwyd yn ddiacon yn 2016 ac yn offeiriad yn 2017.

Yn dilyn blwyddyn o guradaeth yn Eglwys Gadeiriol Bangor, gwahoddwyd Llew i dreulio dwy flynedd olaf ei guradaeth yn Ardal Weinidogaeth Bro Cwyfan ar Ynys Môn dan gyfarwyddyd Canon Philip Barratt.

Wrth edrych ymlaen at ei rol newydd, dywedodd Llew:

“Er yn mynd i weld colli y ffrindiau arbennig rwyf wedi cael y fraint o weinidogaethu iddynt ym Mro Cwyfan, fe ydwyf yn edrych ymlaen yn eiddgar at gyfnod newydd cyffrous ac i barhau a’r gwaith o dyfu Teyrnas Dduw ym Mro Dwynwen.’’

Dywedodd Archddiacon Ynys Môn, Andy Herrick:

“Rwyf yn falch fod Llew wedi’i benodi i Fro Dwynwen ac y bydd felly’n aros gyda ni ar Ynys Môn. Gwnaeth y Parchg Eric Roberts waith mor dda, gan ddod â’r chwe eglwys ynghyd fel Ardal Weinidogaeth, a bugeilio’r gwahanol gynulleidfaoedd mor ffyddlon – gweinidogaeth dal i barhau ac yr ydym yn ddiolchgar iawn amdani. Bydd Llew yn gallu adeiladu ar y sylfaen gadarn honno gyda’i galon fugeiliol ac efengylaidd. Mae stori ffydd Llew ei hun yn gymhellon ac yn ysbrydoledig, a gwn ei fod wrth ei fodd yn arwain eraill i gamu’r un ffordd yng Nghrist, a thyfu’n gryfach yn eu ffydd o ddydd i ddydd. Edrychaf ymlaen at amseroedd da o’n blaenau wrth i gyfuniad unigryw o dalentau Llew gyfuno i sicrhau cynnydd mewn niferoedd a dyfnder ffydd ar draws Bro Dwynwen. A bydd yn gyffrous gweld ei rôl efengylaidd arbennig ar draws de Ynys Môn yn datblygu ac yn tyfu mewn partneriaeth ag Ardaloedd Gweinidogaeth cyfagos ac fel rhan o dîm gweinidogaeth Synod Môn.”

Dywedodd John Roberts a Nia Hall, Wardeiniaid Ardal Weinidogaeth Bro Dwynwen:

“Fel Wardeniaid yr Ardal Wenidogaeth, yr ydym yn falch o groesawu Llew fel Arweinydd yr Ardal Wenidogaeth i barhau â’r arweinyddiaeth addfwyn, feddylgar a gofalgar a’r sgiliau bugeiliol a ddangoswyd gan y diweddar Barchg Eric Roberts. Fel dyn lleol a fagwyd mewn teulu amaethyddol, yr ydym yn sicr y bydd yn ymgartrefu yn dda a dod a’i sgiliau a’i wybodaeth ei hun i’r Eglwys ac i’r gymuned ehangach, ac edrychwn ymlaen i gyd-weithio âg ef. Yn ddios bydd gwên Llew mor llydan ac un Eric fel mae’n ymuno â ni yn y wenidogaeth hon.”

Hefyd wrth sôn am yr apwyntiad, dywedodd Esgob Bangor, Andy John:

“Rwy’n falch iawn o gyhoeddi penodiad Llew yn Arweinydd Ardal Weinidogaeth Bro Dwynwen. Mae gwybodaeth Llew o’r ardal yn cyd-fynd â’i argyhoeddiad fod Duw ar waith yn yr holl gymunedau hyn. Bydd yn dod â’r math o egni a gweledigaeth i alluogi Teyrnas Dduw i dyfu ar draws yr ardal ac arwain yr eglwysi ymlaen i gam nesaf eu bywyd.”

Disgwylir y bydd Llew yn cychwyn ei weinidogaeth newydd fis nesaf. Mae’r trefniadau i alluogi ei drwyddedu, o ystyried y cyfyngiadau cyfredol, yn cael eu trafod. Rydym yn edrych ymlaen at ddathliad cyhoeddus o weinidogaeth newydd Llew maes o law. Gweddïwch dros Llew a phobl Bro Dwynwen wrth iddynt ddechrau pennod newydd yn eu bywydau.