Mae'n bleser gan Esgob Bangor gyhoeddi penodiad y Parch Tom Saunders yn Ficer ac Arweinydd Ardal Weinidogaeth Dwylan, sy'n gwasanaethu'r cymunedau o amgylch Llanfairfechan, Penmaenmawr a Dwygyfylchi.

Magwyd Tom yng Ngogledd Ddwyrain Lloegr ac yn y Cotswolds. Ar ôl graddio mewn peirianneg gemegol, treuliodd wyth mlynedd yn gweithio yn y diwydiant olew yn yr Iseldiroedd ac yn y DU. 

Yn dilyn profiad o droedigaeth raddol yn ei ugeiniau cynnar, daeth yn Gristion, ac ychydig flynyddoedd yn ddiweddarach bu iddo ddirnad galwad i'r weinidogaeth. Ordeiniwyd ef yn offeiriad yn yr Eglwys Gatholig yn 2000, a chafodd brofiad eang mewn gweinidogaeth fugeiliol yn Essex a Dwyrain Llundain. Ar ôl deng mlynedd fel offeiriad mewn plwyf mawr a llewyrchus yn Southend-on-Sea, fe’i penodwyd i rôl esgobaethol uwch gyda chyfrifoldebau am efengylu, cenhadaeth a chynllunio strategol. 

Daeth 2016 â newidiadau mawr ym mywyd Tom wrth iddo dynnu nôl o weinidogaeth weithredol, priodi a symud i fyw gyda'i wraig Angela yn Nyffryn Conwy. Yn 2019 cawsant eu croesawu i'r Eglwys yng Nghymru, a daeth Tom yn aelod o dîm y weinidogaeth ym Mro Celynnin. 

Mae ganddo ddiddordebau mewn diwinyddiaeth Feiblaidd ac ysbrydolrwydd, mae'n aelod o Goleg Cyfarwyddwyr Ysbrydol, mae'n mwynhau darllen, cerdded a chanu, ac mae'n ddysgwr brwd o Gymru.

Wrth edrych ymlaen at ei rôl newydd, dywedodd Tom:

Mae gan bobl Ardal Weinidogaeth Dwylan gyfoeth o gymeriad, doethineb ac egni ysbrydol sy'n rhoi gobaith mawr i mi. Mae’r amseroedd hyn yn heriol, ond, ar yr un pryd, yn llawn addewid Duw ar gyfer y dyfodol. Rwyf wrth fy modd fy mod yn ymuno â nhw fel eu hoffeiriad a'u ficer newydd.

Dywedodd Archddiacon Bangor, Mary Stallard:

Mae Tom yn offeiriad hynod brofiadol o'r Eglwys Gatholig sydd wedi dod o hyd i gartref yn yr Eglwys yng Nghymru ac sydd â llawer i'w gynnig inni yn y weinidogaeth. Daw Tom â gweinidogaeth weddigar, cariad at weithio i adeiladu cymunedau o ffydd a phrofiad o weithio gyda gwahanol ieithoedd. Fel Archddiacon rwyf eisoes wedi teimlo fy mod yn cael cefnogaeth Tom lle mae wedi bod yn barod i gynorthwyo gyda nifer o interregna. Rwyf mor falch y bydd yn ymgymryd â'r weinidogaeth hon ac yn edrych ymlaen at weithio'n agosach gydag ef yn y dyfodol. Rwy’n siŵr y bydd Tom ac Angela yn teimlo’n gartrefol yn gyflym yn Dwylan.

Dywedodd y Parchg David Parry, Arweinydd Ardal Weinidogaeth Bro Celynnin lle mae Tom wedi bod yn rhan o'r tîm gweinidogaeth:

Mae gweinidogaeth offeiriadol ddoeth ac addfwyn Tom wedi cyfrannu cymaint at ein holl gynulleidfaoedd. Mae ef ac Angela yn cael eu hedmygu am eu caredigrwydd a'u hymrwymiad i weddi. Mae Dwylan yn sicr o lwyddo gydag arweinyddiaeth Tom.

Hefyd wrth sôn am yr apwyntiad, dywedodd yr Esgob, Andy John:

Rwy'n falch iawn o gyhoeddi penodiad Arweinydd Ardal Weinidogaeth newydd ar gyfer Dwylan. Daw'r Parchg Tom Saunders â chyfoeth o brofiad i'r penodiad hwn, yn gyntaf yn yr Eglwys Gatholig ac yn ddiweddarach fel Anglican yn yr Eglwys yng Nghymru. Mae Tom yn ddyn hynod ysbrydol ac mae ei gariad parod at Grist a phobl yn gwahodd ffydd a chymuned newydd yn eglwysi Dwylan. Rwy'n dymuno pob bendith iddo ef ac Angela wrth iddynt edrych ymlaen at ddechrau'r weinidogaeth ym mis Chwefror.

Bydd Tom yn cychwyn ei weinidogaeth newydd y mis nesaf. Oherwydd y cyfyngiadau presennol, bydd Tom yn cael ei drwyddedu mewn gwasanaeth preifat yn Nhŷ'r Esgob ar Ddydd Mawrth Ynyd, 16 Chwefror 2021. 

Gweddïwch dros Tom a phobl Dwylan wrth iddynt gychwyn ar bennod newydd yn eu bywydau.