Ychwanegodd Kathryn, "Rwy’n llawn cyffro i weld sut y gallwn ni archwilio ffyrdd newydd o gyrraedd pobl drwy’r eglwysi hyn wrth iddyn nhw gael eu haildrefnu i ddiwallu anghenion y gymuned leol. Ein gweledigaeth yw sicrhau bod addoli’n parhau a bod ein heglwysi’n dod yn ganolbwynt ar gyfer digwyddiadau cymunedol am flynyddoedd i ddod."

Wrth groesawu Kathryn i Gaergybi, dywedodd Archddiacon Môn, John Harvey, "Rwy’n falch iawn o gyhoeddi mai Kathryn yw aelod diweddaraf ein hesgobaeth. Bydd ei harweinyddiaeth yn amhrisiadwy wrth i’n heglwysi ni yng Nghaergybi ddechrau pennod newydd gyffrous o dwf ac ymgysylltu â’r gymuned. Rydyn ni’n gofyn am eich gweddïau i gefnogi Kathryn a’i gŵr Bob yn ystod y cyfnod pontio hwn."

Bydd Kathryn yn adleoli i’r ardal gyda’i gŵr Bob yn y Flwyddyn Newydd. Bydd y dyddiad trwyddedu swyddogol yn cael ei gyhoeddi maes o law.

Ynglŷn â Kathryn

Cafodd Kathryn ei magu mewn teulu Cristnogol, yr hynaf o dair merch, gan dderbyn rolau arwain yn naturiol o oedran ifanc. Ar ôl gyrfa hir fel nyrs, cafodd ei galw yn annisgwyl i gael ei hordeinio, er iddi ddweud wrth ei Ficer yn flaenorol na fyddai hi "fyth bythoedd" yn ei ystyried, gan ei bod yn fodlon fel warden eglwys a gweinidog Gofal Bugeiliol wedi’i chomisiynu. Cafodd ei hordeinio’n ddiacon yn Esgobaeth Birmingham yn 2014, a gwasanaethodd ei churadiaeth yn Eglwys Sant Paul, Blackheath.

Swydd gyntaf Kathryn oedd ficer tair eglwys yn yr Ardal Ddu (Black Country), gan weithio ar draws gwahanol draddodiadau. Yn 2020, symudodd i Gymru i wasanaethu pedair eglwys arfordirol a gwledig yn Ardal Genhadaeth Aber a Mynydd Esgobaeth Llanelwy. Mae hi’n mwynhau bod yn rhan o gymunedau addoli sy’n canolbwyntio ar gysylltu ag eraill gyda chariad Duw, gan gredu y gall gweithredoedd cyffredin arwain at ganlyniadau dwyfol anghyffredin.

Mae Kathryn yn briod â Bob ac mae ganddi ddau fab sy’n oedolion a hefyd dau ŵyr ifanc. Mae ei gŵr yn gyfarwydd ag Ynys Môn drwy ei waith gwirfoddol gyda Chwilio ac Achub Môn. Gyda’i gilydd maen nhw’n mwynhau cerdded, gwylio adar, a chael profiadau ym myd natur. Mae hobïau Kathryn yn cynnwys gwau, crosio, a gwneud cardiau.