Datblygiad cyffrous sydd ganddom ar y gweill yn Esgobaeth Bangor yw gwasanaethu cymun misol o’r enw ‘Duw a Dysgwyr’. Bydd y gwasanaethau yma yn cael eu cynnal yng Nghadeirlan Deiniol Sant ym Mangor yn fisol gan gychwyn ar ddydd Llun, 17 Mehefin am 12.30pm. 

Bydd y gwasanaeth cymun arferol yn cael ei addasu ac yn fwy na dim ei arafu ar gyfer dysgwyr y Gymraeg. Bydd geiriau allweddol a chyngor ar sut i ynganu rhai geiriau ar gael . Bydd pregeth fer a syml ei Chymraeg gyda geiriau allweddol a chyfieithiad ar gael i’r gynulleidfa, a byddwn yn canu dau emyn ysgafn ac adnabyddus. Mae’r gwasanaeth yn cael ei anelu at bob safon o ddysgwyr yn y gobaith y bydd o gymorth iddynt gymryd rhan ymhob addoliad ar draws yr Esgobaeth. 

Yn dilyn y gwasanaeth ac mewn cydweithrediad â Menter Iaith Bangor bydd cyfle i bawb gael ymarfer eu Cymraeg mewn awyrgylch saff a chefnogol a chael tamaid o ginio ysgafn ar yr un pryd. Mae croeso i bawb ymuno â ni yn y gwasanaeth hwn boed yn siaradwr rhugl neu’n ddysgwr. 

Byddai o gymorth pe byddech yn cofrestru eich awydd i ymuno â ni fel bod ganddom syniad ym mlaen llaw o’r niferoedd. .