Curad i fynd yn Ficer ar y Cyd ym Mro Seiriol

Mae Esgob Bangor – y Gwir Barchedig Andy John – yn falch o allu cyhoeddi penodiad y Parchedig Lesley Rendle fel Ficer ar y Cyd yn Ardal Weinidogaeth Bro Seiriol yn Synod Môn. Bydd Lesley’n rhan o Dîm Gweinidogaeth Bro Seiriol, a fydd dan arweiniad yr Arweinydd Ardal Weinidogaeth, Canon Robert Townsend, sydd ei hun newydd ei benodi. Mae Bro Seiriol yn gwasanaethu cymunedau ardal Biwmares, Llanddona, Llangoed a Phenmon ar benrhyn de-ddwyreiniol Ynys Môn.

Mae Lesley ar hyn o bryd yn gurad yn Ardal Weinidogaeth Bro Tysilio, sy’n gwasanaethu cymunedau o amgylch Porthaethwy a Benllech.

Yn wreiddiol o Gilgwri, bu Lesley‘n weithwraig cymdeithasol gyda gofal plant cyn symud i Droitwich yn Swydd Gaerwrangon, lle bu’n Ymgynghorydd Plant yn Esgobaeth Caerwrangon am 10 mlynedd. Wedi hynny, symudodd yn ôl i Gilgwri fel caplan ysgol cyn symud i Ynys Môn. Fe’i hordeiniwyd yn Ddiacon yn 2017 ac yn Offeiriad yn 2018.

Wrth edrych ymlaen at ei rôl newydd, meddai Lesley, “Mae hi wedi bod yn bleser pur i fod wedi gallu gwasanaethu Duw ochr yn ochr â phobl Bro Tysilio, Canon Angela Williams a’m cydweithwyr yn y Tîm Gweinidogaeth dros y chwe mlynedd ddiwethaf.

Dwi’n hynod ddiolchgar i bobl Bro Tysilio am y croeso a’r gefnogaeth a gefais wrth imi gyd-deithio â nhw o’r diwrnod cyntaf un y trwyddedwyd y tîm gweinidogaeth newydd, a hynny fel Darllenydd, Ordinand ac yna fel Curad drostyn nhw. Dwi wedi mwynhau eu cwmni a’u cyfeillgarwch, eu brwdfrydedd dros yr Efengyl a’u parodrwydd i fod yn agored i drafod ffurfiau newydd o’r weinidogaeth. Bu’n fraint go iawn i weld cysyniad yr Ardal Weinidogaeth yn gwreiddio, yn datblygu ac yn ffynnu o fewn calonnau a meddyliau, diolch i Dduw am feithrin mor ffyddlon Duw. Dwi mor ddiolchgar imi allu bod yn rhan o’r broses honno.

Bellach mae fy ngolygon yn troi at bennod nesaf fy ngweinidogaeth yma ar Ynys Môn wrth imi baratoi i symud i Fro Seiriol i ymuno â’r bobl yno ar eu taith gyda Duw. Edrychaf ymlaen at fod yn rhan o’r tîm newydd sydd am ffurfio dan arweiniad Canon Robert Townsend, yn ogystal â darganfod lle mae Duw am ein harwain wrth inni archwilio gyda’n gilydd yr hyn mae’n ei olygu i fod yn bobl Dduw yn y rhan hon o’r ynys. Heb os fe fydd yna amseroedd heriol o’n blaenau ond wrth inni bwyso’n ddibynnol ar arweiniad a ffyddlondeb Duw, felly hefyd y medrwn edrych ymlaen at Ei fendithion wrth inni rannu yn Ei genhadaeth.”

Dyma sylwadau Canon Angela Williams, Ficer ac Arweinydd Ardal Weinidogaeth Bro Tysilio: “Dwi’n diolch o waelod calon i Dduw am Lesley. Mae hi wedi bod yn fraint go iawn i weithio yn ei chwmni dros y bum mlynedd ddiwethaf. Mae Griff, holl aelodau’r Tîm Gweinidogaeth, finnau a holl bobl Bro Tysilio wedi gwerthfawrogi ac elwa o’i doniau a’i cholegoldeb yn ystod y cyfnod hwnnw. Dymunwn bob bendith ar y bennod newydd hon yn ei gweinidogaeth wrth iddi ymarfer y doniau a roddwyd iddi gan Dduw ym Mro Seiriol (lle mae hi bellach yn byw).

Lle bynnag y bydd Lesley, fe fydd hi’n gaffaeliad mawr wrth adeiladu Teyrnas Dduw ac wrth gysylltu’r eglwys â’r gymuned. Heb os, byddwn yn gweld ei cholli yn ein mysg fel Tîm, ond yn falch y bydd Bro Seiriol yn elwa’n sylweddol o gael presenoldeb Lesley ar eu Tîm. Dymunwn gyfoeth o fendithion i'r Canon Robert, Lesley a’i theulu, ynghyd â holl Dîm Bro Seiriol a phob llwyddiant i’r dyfodol.”

Dywedodd Esgob Bangor - y Gwir Barchedig Andy John, “Bu Lesley yn gaffaeliad mawr i’r Tîm Gweinidogaeth ym Mro Tysilio, gan ddod ag amrywiaeth o ddoniau a phrofiad at gamau cyntaf ei gweinidogaeth ordeiniedig. Wrth weithio ochr yn ochr â phobl Bro Seiriol, yn y Tîm Gweinidogaeth newydd yno, mae hi’n sicr o brofi cyfnodau o lawenydd a her, ond bydd ei hyfforddiant, ynghyd â’i churadiaeth ym Mro Tysilio, wedi ei pharatoi’n llawn digon am hynny.

Gweddïwch dros Lesley yn ei gweinidogaeth newydd ym Mro Seiriol.”

Bydd Sul olaf Lesley ym Mro Tysilio ar 20 Hydref. Bydd hi’n dechrau ar ei rôl ym Mro Seiriol ar ddydd Mercher, Tachwedd 6, pryd y cynhelir gwasanaeth arbennig i ddathlu dechrau ei gweinidogaeth newydd am 7yh yn Eglwys Sant Cawrdaf, Llangoed (LL58 8PS).