Dechreuodd y cyfan ar y traeth

Yn fy mlwyddyn gyntaf o weithio, treuliais wythnos o wyliau’n gweithio fel gwirfoddolwr mewn tîm cenhadaeth traeth i Scripture Union. Cyneuodd hynny gariad ynof at weithio gyda phlant, felly ymunais â thîm y plant yn fy eglwys gartref. Cyneuodd gariad ynof at efengyliaeth hefyd - er nad oeddwn yn dda iawn am y gwaith hwnnw. Felly, dechreuais ddarllen llyfrau a mynd ar gyrsiau hyfforddi, a mynd ati’n benderfynol i geisio gwella yn y maes. Yna synhwyrais fod Duw yn fy ngalw i bregethu, ac felly dechreuais hyfforddi yn yr eglwys Fethodistaidd lle’r oeddwn yn aelod. Dair blynedd yn ddiweddarach, roeddwn yn bregethwr lleyg trwyddedig, ac yn dal i weithio gyda phlant, yn dal i weithio ar y tîm cenhadaeth traeth, yn dal i geisio gallu siarad yn well â phobl am Iesu.

Gadewch i ni symud ymlaen 7 mlynedd. Aeth rhywun o Scripture Union oedd yn ymweld â chenhadaeth y traeth yn ôl i’r brif swyddfa a dweud ‘Dw i’n meddwl fy mod wedi cyfarfod efengylydd.’ Roeddwn i’n methu credu bod Duw wedi agor drws fel yma i mi! Ymddeolais o’r rôl flwyddyn yn ôl, yn dilyn mwy na 30 mlynedd ar y staff. Trwy gydol y cyfnod hwnnw, roeddwn yn pregethu’n answyddogol yn yr eglwys Anglicanaidd lle’r wyf yn addoli nawr. Pan newidiodd fy rôl yn y gwaith, daeth fy swydd â mi i Gymru, ac awgrymwyd y dylwn gael trwydded. Yn dilyn dwy flynedd o hyfforddiant yn Sant Padarn, roeddwn yn efengylydd lleyg trwyddedig. Pan gefais fy nghyfweld gan y panel esgobaethol, gofynnwyd i mi a oeddwn wedi ystyried cael fy ordeinio. Nid dyna’r tro cyntaf i rywun ofyn hynny i mi. Ond, roeddwn yn siŵr nad hynny yr oedd Duw yn ei ofyn gennyf… tan ychydig flynyddoedd yn ôl pan ddechreuais deimlo bod Duw YN fy ngalw i fod yn offeiriad! Ac felly, ym mis Mehefin y llynedd cefais fy ordeinio’n ddiacon, ac ar 1 Orffennaf byddaf yn cael fy ordeinio’n offeiriad.

Mae Duw wedi fy arwain mewn cylch cyfan: rwy’n pregethu’n rheolaidd mewn eglwys dim ond milltir i ffwrdd o’r traeth lle cychwynnodd y cwbl. Anhygoel!