Mae Esgob Bangor ac Archesgob Cymru yn falch o gyhoeddi penodiad y Parch Vince Morris yn Arweinydd Ardal Weinidogaeth a ficer Bro Tudno. Yn ei swyddogaeth newydd, bydd Vince yn gwasanaethu cymuned Llandudno, sy'n cael ei hadnabod fel brenhines trefi glan môr gogledd Cymru oherwydd dyma dref gwyliau glan môr fwyaf Cymru.

Ar hyn o bryd Vince yw Arweinydd Ardal Weinidogaeth a ficer Bro Cwyfan. Bydd ei drwyddedu yn digwydd ddydd Mawrth 16 Ebrill yn Eglwys y Drindod Sanctaidd, Llandudno.

Wrth edrych ymlaen at ei rôl newydd, dywedodd Vince, "Mae wedi bod yn fendith ac yn fraint cael gwasanaethu pobl Bro Cwyfan dros y tair blynedd diwethaf. Gweithio ac addoli ochr yn ochr â thîm mor wych ac ymroddedig o glerigwyr a gweinidogion lleyg, gan helpu i adeiladu a datblygu gweinidogaeth plant a gofal bugeiliol ar draws ardal y weinidogaeth.

"Rwy'n teimlo’n hynod o gyffrous ac mae’n anrhydedd cael dychwelyd i weithio yn Llandudno ac rwy’n edrych ymlaen at yr heriau o ddatblygu gweinidogaethau newydd, yn ogystal ag ehangu rhai presennol a helpu i ddatblygu a rhannu cariad Crist ym mrenhines trefi glan môr gogledd Cymru."

Bydd Vince yn arwain y ddwy gymuned eglwysig ym Mro Tudno, sef Y Drindod Sanctaidd, Llandudno, eglwys Fictoraidd fawr yng nghanol y dref, ac Eglwys Sant Tudno, eglwys hynafol ar Ben y Gogarth.

Mae gan Vince gariad dwfn yn barod tuag at bobl Llandudno a’r lle ei hun.

Wrth groesawu Vince i Fro Tudno, meddai’r Hybarch David Parry, Archddiacon Bangor, "Mae hwn yn benodiad gwych. Mae gan Vince gariad dwfn yn barod tuag at bobl Llandudno a’r lle ei hun. Rwy'n siŵr y bydd ei arweinyddiaeth ymroddedig a gweddigar yn helpu Bro Tudno i ffynnu mewn cenhadaeth ac i gryfhau eu bywyd o ffydd a rennir."

Diolchodd Archddiacon Môn, John Harvey, i Vince am ei wasanaeth i Fro Cwyfan a chanmolodd ei natur gydweithredol; "Byddwn yn gweld eisiau Vince yn Ardal Weinidogaeth Bro Cwyfan ac Archddiaconiaeth Ynys Môn. Rwyf wedi mwynhau ein gwaith cydweithredol gyda'n gilydd, ac wedi cael anogaeth gan Vince wrth archwilio ffyrdd dychmygus o ddod â phobl ynghyd mewn addoliad a brawdoliaeth yn y Fro.

"Dymunaf fendith Duw arno ef a Louise a'u plant wrth iddyn nhw baratoi i symud i Fro Tudno."

Ynghylch y Parch Vince Morris

Cafodd Vince ei eni a'i fagu yn Rhydychen, lle dechreuodd archwilio ei ffydd am y tro gyntaf. Cyn ymuno â’r offeiriadaeth, bu Vince yn gweithio mewn amryw o swyddi, gan gynnwys fel technegydd graffeg ym Mhrifysgol Oxford Brookes. Tra oedd yn byw yn Swydd Efrog, cyfarfu a phriodi ei wraig Louise ac yn ddiweddarach ymgartrefodd y ddau yng ngogledd Cymru.

Yn 2016, cychwynnodd Vince ar ei hyfforddiant ar gyfer ei ordeinio yn Athrofa Padarn Sant yng Nghaerdydd. Ar ôl lleoliadau yn y Drindod Sanctaidd yn Llandudno, a hyfforddiant ym Mro Gwydyr, cafodd ei ordeinio'n ddiacon ym mis Mehefin 2018 ac yn offeiriad yn 2019. Yn 2021 fe'i penodwyd yn Arweinydd Ardal Weinidogaeth a ficer Bro Cwyfan yng nghornel gogledd-orllewin Ynys Môn.

Ganwyd dau blentyn Vince yng ngogledd Cymru ac mae ef a'i wraig yn ddysgwyr Cymraeg brwdfrydig.

Mae Vince yn mwynhau criced, rygbi a phêl-droed (er ei fod wedi'i gyfyngu i'r eisteddleoedd y dyddiau hyn yn anffodus) ac yn ei amser hamdden mae'n gweithio'n agos gyda Chadetiaid Awyr y Llu Awyr Brenhinol ledled gogledd Cymru.

Mae gan Vince ddiddordeb angerddol mewn addysg a gweithio gyda phobl ifanc a theuluoedd ac mae'n edrych ymlaen at weithio gydag eraill i ddatblygu gweinidogaethau newydd i adlewyrchu'r gymuned a'r ardal gyda phawb ym Mro Tudno a Llandudno.

Cadwch Vince a'i deulu yn eich gweddïau.