Offeiriad Arloesol

Fe alwodd fy ffrind hyn yn ‘ficera crwydrol’ – ac rwy'n hoff iawn o'r teitl hwnnw! Rwyf wrth fy modd yn cyfarfod â'r rhai a fyddai'n galw eu hunain ‘yn ysbrydol ond nid yn grefyddol’, ac yn dechrau eu helpu ar eu taith ffydd. Dydw i ddim yn mynd â Duw atyn nhw – mae'r Ysbryd Glân eisoes ar waith ac rwyf innau’n ymuno. Mae gennym ni dreftadaeth Gristnogol anhygoel yn y wlad hon, felly wrth i mi wasanaethu fel caplan ar Ynys Enlli neu adeiladu cymuned addoli newydd i fyny yn eglwys hynafol anghysbell Llangelynnin, rwy'n teimlo cysylltiad â'r llif hir hwnnw o dystion a'u gweddïau. Rwyf wir yn sefyll ar ysgwyddau cewri. Mae offeiriadaeth arloesol yn agos iawn at gaplaniaeth – y gwrando dwfn ar bobl a lle. Yna, mae’n ymwneud â sut rydyn ni'n dechrau dirnad sut mae Duw yn gweithredu a pha fath o 'le o berthyn' y gallwn ni ei greu. Gyda'n gilydd, rydym yn adeiladu tîm ac felly mae'n dechrau …

Un tîm o'r fath yw cymuned grwydrol Addoli yn y Gwyllt sydd wedi bod yn bleser arbennig dros yr ychydig flynyddoedd diwethaf, lle gall y rhai sy'n teimlo bod cerdded yn ddefnyddiol yn eu bywyd ysbrydol, gael eu denu’n agosach at Dduw ac eraill yn ein ymgynulliadau misol. Weithiau mae pobl yn gofyn i mi ‘pwy yw'r bobl hyn?’ ac fe allen i ddefnyddio hen ymadrodd Saesneg ‘the nones and dones’ (y rhai nad ydyn nhw erioed wedi cael eu denu at fywyd yr eglwys, neu sydd wedi ei adael). Ond fyddai hynny ddim yn cwmpasu pawb, oherwydd mae gan bob un ohonom ni stori, ac mae yna lawer o resymau pam y gallai rhywun ddewis dod i gerdded gyda ni (gan gynnwys y rhai sy’n ymroddedig i fywyd yr eglwys ac sy’n teimlo bod yr hyn maen nhw'n ei gael yn yr awyr agored yn helpu i roi persbectif, cwmnïaeth a heddwch iddyn nhw).

Dydy gweinidogaeth arloesol ddim yn cystadlu ag addoli plwyfol traddodiadol. Rwy’n credu'n gryf y gall helpu i adnewyddu a chefnogi.

Darllenwch fwy am Eryl: Cyfres Pilgrimage y BBC i sbarduno diddordeb newydd yn Nhaith Pererin Gogledd Cymru

Gweinidog Lleyg Trwyddedig

Bron i 40 mlynedd yn ôl cefais “fy nghydnabod a fy nghomisiynu” fel pregethwr lleol yn yr Eglwys Fethodistaidd a dechreuais fy nhaith yn y weinidogaeth leyg.

Pan symudais i Gymru yn 2012, penderfynais addoli yn fy eglwys leol ym Mhenmachno. Yn dilyn trafodaethau gyda'r offeiriad ar y pryd, sefydlwyd addoliad misol ar gyfer pobl o bob oed a oedd yn cynnwys pobl o wahanol enwadau ac yn cyfuno talent anhygoel ein cymuned leol.

Fodd bynnag, collais y cyfleoedd i bregethu. Roeddwn i wastad wedi teimlo bod Duw, trwy Ei Ysbryd, yn siarad â mi mewn ffordd bwerus iawn a phan ddaeth y gwahoddiad i mi gael fy nhrwyddedu i arwain yr addoli yn seiliedig ar fy mhrofiad ac argymhelliad fy Arweinydd Tîm – roeddwn i ar ben fy nigon!

Rwy'n mwynhau'r fraint o arwain yr addoli fel Darllenydd ac, yn y rôl hon, rwyf wedi arwain sesiynau hyfforddi ar ysgrifennu gweddïau sy’n cael eu hadrodd ar ran eraill ac wedi gweithio gyda'n heglwysi yn Ardal y Weinidogaeth i ddatblygu cyfleoedd addoli i bobl o bob oed. Mae llawer i'w wneud o hyd yn fy Ardal Weinidogaeth fy hun ond rwy'n credu y dylai Gweinidogion Lleyg Trwyddedig gael eu dyrchafu i gefnogi a datblygu’r addoli a chenhadaeth eu Hardaloedd Gweinidogaeth eu hunain ac, fel y Gweinidog Lleyg Trwyddedig ar gyfer Bangor, dyna sy'n fy nghyffroi am fy rôl bresennol.

Yr hyn sydd ei angen yw i “Gristnogion cyffredin”, fel chi a fi, gamu ymlaen.

Bydd dyfodol ein heglwysi yn dibynnu ar leygwyr yn dod ymlaen ac yn mynd ati i helpu i lunio’r eglwys a fydd yn gwasanaethu yn y dyfodol trwy wrando ar ein cymunedau a gofyn iddyn nhw beth sydd ei angen arnyn nhw, wrth weddïo'n ffyddlon ac yn gyson am arweiniad yr Ysbryd.

Rydym yn eglwys sy'n gwasanaethu ac yn cael ein galw i ddangos yr Efengyl Cariad i bawb rydym ni’n cwrdd â nhw yn ein cymunedau.

Rwy'n berson “gwydr hanner llawn” ac rwy’n hyderus bod ffordd ymlaen i genhadaeth a thystiolaeth yr Eglwys; yr hyn sydd ei angen yw i “Gristnogion cyffredin”, fel chi a fi, gamu ymlaen.

Darllenwch fwy am Keith: Penodi Swyddog Gweinidogaeth Trwyddedig Lleyg