Yr Ail Sul ar Bymtheg wedi'r Drindod

Ymlonyddu gyda'n gilydd

1. Goleuwch gannwyll.

2. Darllenwch:

A dywedodd Duw, "Bydded goleuni." A bu goleuni. Gwelodd Duw fod y goleuni yn dda; a gwahanodd Duw y goleuni oddi wrth y tywyllwch. A bu hwyr a bu bore, y dydd cyntaf.

Genesis 1:3-5

Dyma’r dydd y gweithredodd yr Arglwydd; gorfoleddwn a llawenhawn ynddo.

Salm 118:24

Trafod gyda'n gilydd

Noder: Mae hwn yn ymarfer eithaf anodd. Cofiwch fod croeso i chi ei addasu ar gyfer eich teulu chi. Y bwriad yw helpu plant i feddwl am roi'r gorau i rywbeth y maen nhw'n ei feddwl sy'n bwysig er mwyn cael rhywbeth hyd yn oed yn well. Efallai y byddai gêm o Top Trumps yn well os oes gennych chi set. Ffordd hawdd arall o’i gyfleu fyddai rhoi 5 bisgïen ac yna gynnig hufen ia yn eu lle. Fydden nhw’n barod i roi’r bisgedi’n ôl er mwyn cael yr hufen ia?

Neu, os ydych yn fodlon gyda’r ymarfer canlynol yna....

Byddwch angen:

• nodiadau post-it neu ddarnau o bapur
• pen

Ysgrifennwch bump peth sy’n bwysig i chi fel unigolyn ar ddarnau o bapur / nodiadau post-it.

Pan fyddwch chi wedi’i eu cael i gyd, ceisiwch benderfynu pa bump yr hoffech chi fel teulu eu cadw. Pa bethau pwysig fyddai’n rhaid i rywun roi’r gorau iddyn nhw er mwyn i chi fel teulu gadw dim ond pump?

• Pa mor hawdd oedd hi i roi’r gorau i rywbeth?
• Pa mor hawdd oedd hi i ddewis y pump peth pwysicaf?
• Pa mor hawdd oedd hi i gyfaddef fod gan rywun arall well syniad na chi?
• Pa mor hawdd oedd hi i roi’r gorau a pham?

Dychmygu gyda'n gilydd 

Gwrandewch ar y stori ganlynol gyda’ch gilydd:

Darllen gyda'n gilydd 

Mae’r darn o’r Beibl heddiw yn un byr iawn. Mae’n dweud:

Y mae teyrnas nefoedd yn debyg i drysor wedi’i guddio mewn maes; pan ddaeth dyn o hyd iddo, fe’i cuddiodd, ac yn ei lawenydd y mae’n mynd ac yn gwerthu’r cwbl oedd ganddo, ac yn prynu’r maes hwnnw.

‘Eto y mae teyrnas nefoedd yn debyg i fasnachwr sy’n chwilio am berlau gwych. Wedi iddo ddarganfod un perl gwerthfawr, aeth i ffwrdd a gwerthu’r cwbl oedd ganddo, a’i brynu.

Yn union fel y ddraig, Beti, mae’r bobl yn y storïau roedd Iesu’n eu hadrodd wedi gwerthu popeth oedd ganddyn nhw er mwyn gallu prynu’r trysor.

A beth yw’r trysor – y trysor mwyaf a welodd y byd erioed?

Teyrnas nefoedd yw’r trysor. Dyma’r adegau a’r mannau lle gallwn ni weld Duw mewn gofal o'n byd. Dyma’r adegau a’r mannau lle mae yna gariad, haelioni, maddeuant, doethineb, amynedd a ffyddlondeb. Oni fyddai’n rhyfeddol pe bydden ni’n gallu cael teyrnas nefoedd ym mhob man ac ym mhob peth?!

Myfyrio gyda'n gilydd

Dyw Iesu ddim yn dweud wrthym ni am werthu ein holl deganau, ein gwelyau, soffa, teledu, cartrefi na’n dillad. Ond mae Iesu’n gofyn i ni gofio fod teyrnas nefoedd mor bwysig fel y dylen ni fod yn barod i roi’r gorau i bopeth er ei mwyn hi.

Mae hynny’n anodd.

Gweddïo gyda'n gilydd

Byddwch angen:

• bocsys Wyau
• siswrn
• gwlân cotwm / wadin
• ‘trysor’ – yn ddelfrydol perl neu fwclis
• tâp gludog
• glud

Torrwch allan ddwy ‘gwpan' o’r bocs wyau

Trowch un â’i phen i lawr a glynwch y ddau ddarn gyda’i gilydd gyda’r tâp gludog i ffurfio cragen.

Gludwch y darn o wlân cotwm ar ddarn isaf y gragen a rhowch y perl ar ei phen.

Wrth i chi ddal y gragen a’r perl yn eich llaw, gofynnwch i Dduw eich helpu i gofio pa mor werthfawr yw teyrnas nefoedd.

Gorffen gyda'n gilydd

Bydded i Dduw, ffynhonnell gobaith, eich llenwi â phob llawenydd a thangnefedd wrth ichwi arfer eich ffydd, nes eich bod, trwy nerth yr Ysbryd Glân, yn gorlifo â gobaith.

Diffoddwch y gannwyll.