Llwybrau Hen a Newydd

Darllen gyda'n gilydd 

Mae'r newyddion da am Iesu y Meseia, Mab Duw yn dechrau fel hyn: Mae'n dweud yn llyfr y proffwyd Eseia:

“Edrych – dw i'n anfon fy negesydd o dy flaen di, i baratoi'r ffordd i ti” – “Llais yn gweiddi'n uchel yn yr anialwch, ‘Paratowch y ffordd i'r Arglwydd ddod! Gwnewch y llwybrau'n syth iddo!’” 

Dyna beth wnaeth Ioan – roedd yn bedyddio pobl yn yr anialwch ac yn cyhoeddi fod hyn yn arwydd eu bod yn troi cefn ar eu pechodau ac yn derbyn maddeuant gan Dduw. Roedd pobl cefn gwlad Jwdea a dinas Jerwsalem yn heidio allan ato. Pan oedden nhw'n cyfaddef eu pechodau roedd yn eu bedyddio nhw yn afon Iorddonen. Roedd Ioan yn gwisgo dillad o flew camel gyda belt lledr am ei ganol, ac roedd yn bwyta locustiaid a mêl gwyllt. Dyma oedd ei neges: “Mae un llawer mwy grymus na fi yn dod ar fy ôl i – fyddwn i ddim digon da i fod yn gaethwas yn plygu i lawr i ddatod carrai ei sandalau. Dw i'n defnyddio dŵr i'ch bedyddio chi, ond bydd hwn yn eich bedyddio chi â'r Ysbryd Glân.”

Tua'r adeg yna daeth Iesu o Nasareth, Galilea i gael ei fedyddio gan Ioan yn yr Iorddonen. Yr eiliad y daeth Iesu allan o'r dŵr, gwelodd yr awyr yn rhwygo'n agored a'r Ysbryd Glân yn disgyn arno fel colomen. A dyma lais o'r nefoedd yn dweud: “Ti ydy fy Mab annwyl i; rwyt ti wedi fy mhlesio i'n llwyr.”

Marc 1: 1-11

Myfyrio gyda'n gilydd

Ydych chi erioed wedi gweld ffordd newydd yn cael ei hadeiladu?

Os ydych chi’n byw ar Ynys Môn byddwch wedi gweld gwaith yn cael ei wneud ar yr A55, lawer o weithiau.

Os ydych chi wedi gyrru trwy Bontnewydd byddwch wedi gweld y ffordd osgoi newydd yn cael ei hadeiladu.

Dyma sut mae’r cynlluniau’n bwriadu iddi edrych. Ond mae llwythi o waith i’w wneud yn gyntaf.

Dyma sut yr oedd yn edrych ddiwedd mis Medi eleni ar ôl dros flwyddyn o waith, ac mae dal rhagor i’w wneud! 

Adeiladwch eich ffordd newydd eich hunain drwy ddefnyddio’ch set o drenau, blociau, Hot Wheels (neu unrhyw bethau eraill sydd gennych o'ch cwmpas)

Wrth wneud hynny, siaradwch gyda’ch gilydd i benderfynu:

• Ble mae’n dechrau?
• Ble mae’n mynd?
• Sut y bydd yn cyrraedd yno? Oes unrhyw rwystrau yn y ffordd? Ydych chi angen o rhagor o help?

Ar ôl gorffen, dewch yn ôl at y bwrdd.

Gweddio gyda'n gilydd

Mae’n eithriadol o hawdd cyffroi am y Nadolig ac anghofio am yr Adfent. Ond, yr Adfent yw’r amser i ni baratoi ein hunain ar gyfer Iesu – nid dim ond addurno’n cartrefi a gobeithio am anrhengion.

Sut allwn ni baratoi’n hunain ar gyfer Iesu? Mae’n rhaid i ni gliro llwybr at ein calonau. Mae hynny’n golygu y dylem ni ddweud sori am yr adegau pan oedden ni wedi caniatáu i bethau eraill fod yn bwysicach na Duw. Efallai ein bod wedi’n llygad dynnu gan bethau eraill, efallai nad ydym wedi caru Duw gyda’n holl galon, ein holl enaid a’n holl feddwl ac nad ydym ni wedi caru eraill fel rydym ni’n ein caru ni ein hunain.

Byddwch angen:

• Ailgylchu / ysbwriel glân
• Bin ailgylchu
• Tâp Selo

1. Defnyddiwch yr ysbwriel i wneud model o berson.
2. Mae pob darn o ysbwriel yn ein helpu i feddwl am y ffyrdd nad ydym wedi bod yn canolbwyntio ar Dduw.
3. Yn araf, tynnwch y model oddi wrth ei gilydd a'i osod yn bin ailgylchu cywir.
4. Wrth i chi wneud hynny, gofynnwch i Dduw eich helpu i daflu yr holl bethau yn eich bywyd sydd wedi dod yn bwysicach i chi na Duw. Gofynnwch y bydd eich calon, eich enaid a’ch meddwl yn barod i groesawu Iesu y Nadolig hwn.

Gweddïwch y weddi hon gyda'ch gilydd os ydych yn dymuno:

Hollalluog Dduw, anfonaist dy unig Fab, Iesu, i ddangos y ffordd i ni.

Helpa ni i fod yn barod yr Adfent hwn i groesawu Iesu.

Mae’n ddrwg gennym am yr adegau nad ydym wedi dy wneud di y peth pwysicaf.

Helpa ni i ddilyn y llwybr cywir er mwyn i ni allu adnabod Iesu ac iddo Ef allu byw yn ein calonnau y Nadolig hwn ac am byth.

Amen

Gorffen gyda'n gilydd

Bydded i Dduw, ffynhonnell gobaith, eich llenwi â phob llawenydd a thangnefedd wrth ichwi arfer eich ffydd, nes eich bod, trwy nerth yr Ysbryd Glân, yn gorlifo â gobaith.

Diffoddwch y gannwyll.