Dros Ŵyl Bedr eleni yng Nghadeirlan Deiniol Sant ym Mangor, cafodd 14 o bobl ymroddedig, dawnus eu hordeinio neu eu trwyddedu i weinidogaethu.

Fe’u gelwir i “adeiladu corff Crist fel y cyrhaeddwn oll hyd at yr undod a berthyn i’r ffydd ac i adnabyddiaeth o Fab Duw” (Effesiaid 4).

Dyna’u tasg ar y cyd – ond mae gan bob un hefyd eu straeon personol eu hunain am alwad Duw ar eu bywydau.

Yma, cawn sgwrs â Fiona am ei galwedigaeth fel Gweinidog Bugeiliol.

Dywedwch ychydig wrtha’i amdanoch eich hun.

Allen nhw ddim fod wedi chwalu’r patrwm ddwywaith, allen nhw? Mae’n debyg mod i’n eitha’ cymdeithasgar ac allblyg. Dw i wrth fy modd yn clybio. Dwi’n gwirioni’n llwyr ar glybio. Gorau oll po ucha’ ydi’r sain. Y curiad trwm, y ffenestri’n ratlo, y goleuadau – gwych.

Dwi bob amser wedi bod â ffydd ac am ei rhoi ar waith. Dwi’n berson ymarferol. Mae Iago’n sôn am ffydd fel rhywbeth ymarferol – Iago 2:17. "Mae ffydd ar ei phen ei hun, os nad oes ganddi weithredoedd, yn farw."

Pa un ydi’ch hoff fisgeden?

Dwi’n hoffi unrhyw fath o fisgeden. ’Mlaen â’r pwysau ’na!

Sut ddaethoch chi’n rhan o’r Bugeiliaid Stryd?

Pan oeddwn yn Northampton, ymddangosodd arwydd/poster am y Bugeiliaid Stryd ac rôn i’n meddwl, pe bawn i yn fy arddegau rŵan mi fyddwn i yng nghanol hynny. Mae gen i fab sy’n mwynhau’r tafarndai a’r clybiau ac felly mi wnes i ddod yn rhan o’r peth felly. Dim ond i wneud yn siŵr bod pobl yn ddiogel, yn y bôn, o fewn economi’r nos. Eu bod nhw’n cael amser da. Dyna oedd ar flaen fy meddwl. Roeddwn i’n teimlo mai fan’no, wir, oedd fy lle, dyna lle roeddwn i’n teimlo ’mod i’n cael fy ngalw.

O hynny awgrymwyd ’mod i’n hyfforddi fel Bugail Ymatebol. Y rheini sy’n cael eu galw i gynorthwyo pobol mae trychinebau cenedlaethol wedi effeithio arnyn nhw. Mi ges i’r cyfle i weld pobl ar yr adegau gorau a’r adegau gwaethaf ac ar yr adegau yn y canol. Y rhai sydd ar y cyrion, y digartref a’r rhai caeth i gyffuriau. Mi es i i Fanceinion ac i Grenfell. Dwi wedi canu Shine Jesus Shine allan ar strydoedd Northampton gyda thua hanner cant o hogiau a genod oedd yn hollol off eu pennau! Dwi ar y ffin. Dwi’n delio â’r bobol ar y cyrion.

Ffaith fach wrth fynd heibio i chi ydi bod Bugeiliaid Stryd yn aml yn cael eu galw’n ‘Flip Flop Fairies’.

Beth ydi o ynglŷn â’r bobol ar y cyrion sy’n eich denu i weithio efo nhw a beth ydi’r weledigaeth sy’n eich ysgogi?

Dach chi wedi gweld y strapiau arddwn yna efo WWJD (What Would Jesus Do)? Dwi bob amser yn meddwl wrtha’ i’n hun WWJB – Where Would Jesus Be? Mi fyddai o yn yr eglwysi, byddai, ond mi fyddai o lle mae’r bobol, gan gynnwys y bobol ar y cyrion, sef yn y tafarnau a’r clybiau. Dyna fyddai o’n ei wneud rŵan.

Dwi am iddyn nhw wybod bod rhywun yn eu caru.

A oeddech chi’n ymwneud â’r Eglwys cyn dod yn Fugail Stryd?

Mae fy nheulu wedi bod yn Gristnogion selog erioed. Rydyn ni bob amser wedi bod â’r mewnbwn hwnnw. Dwi’n chwarae’r organ yn yr eglwys. Doedd y dewis i beidio cymryd rhan ddim yno. Mae fy ngwreiddiau’n Eingl-Gatholig uchel iawn. Dwi wrth fy modd efo’r clychau a’r ar thus a’r holl regalia sy’n mynd efo’r peth. Mae canu’n bwysig iawn, a chanu’r Offeren. Roeddwn i’n arfer ei chanu mewn Lladin a Groeg. Mae canu fel gweddïo ddwywaith.

Mae llawer o bobol yn meddwl bod ffydd a Christnogaeth yn bethau difrifol. Iawn, oes, mae yna ochor ddifrifol. Ond mae’n rhaid bod yna hwyl hefyd! Dach chi wedi gweld y llun ‘Laughing Jesus’ (Willis Wheatley)? Dwi’n meddwl bod o’n hollol wych.

Sut ddigwyddodd y trwyddedu a beth mae’n ei olygu i chi?

Bai Dominic ydi o. Mi ddywedodd o fod angen cydnabod fy ngwaith fel Bugail Stryd a Bugail Ymatebol ac felly byddwn i’n cael fy nhrwyddedu fel Gweinidog Bugeiliol. Ond, mae fy ngwaith yn mynd i fod yn wahanol iawn i bawb arall a ddim ynghlwm â safle eglwys o gwbwl. Dwi’n mynd i fod yn mynd o gwmpas y tafarndai ac i mewn i’r clybiau nos. Dwi’n gweithio’n bennaf yn y Drenewydd ond gallwch fod yn Fugail Stryd yn unrhyw le. Mae hyn yn gydnabyddiaeth go iawn o’r hyn dwi wedi bod yn ei wneud.

Beth mae eich ffydd yn ei olygu i chi?

Mae’r Cymun Bendigaid yn ganolog i’m ffydd, bod Iesu wedi marw ac atgyfodi, gan faddau pechodau. Mae hynny’n greiddiol. Mae’n fater o wybod eich bod yn cerdded gyda Duw mewn diogelwch ac mewn cariad.

“Mae gen i fywyd tragwyddol gyda Christ, felly mae fy nyfodol yn ddiderfyn." Dwi ddim yn siŵr o lle daeth y dyfyniad yna ond roeddwn i’n meddwl ei fod o’n eitha’ da.

Pe bai rhywun yn dweud wrthych chi eu bod yn meddwl bod Duw am iddyn nhw gynnig mwy beth allech chi ei ddweud wrthyn nhw?

Byddwn yn dweud i fynd amdani ac i ymchwilio. Mae’n rhaid ei wneud gyda gweddi ond os dach chi’n gweddïo ond am hynny efallai na fyddwch yn ymchwilio i’r peth. Drwy ymchwilio iddo fo, mi fyddwch chi’n darganfod ydi o’n iawn i chi ai peidio.